Mathais 7:1-6
Nqe cim:
“Nej cov uas yog neeg ntsejmuag ncaj siab nkhaus! Nej cia li xub muab yav ntoo hauv nej lub qhovmuag tso, nej thiaj yuav pom kev muab qhov nyuag hmoov ntoo hauv nej tus kwvtij lub qhovmuag” (Mathais 7:5)
Lus nug rau sawvdaws xav:
– Vajtswv Txojlus qhia hais tias “tsis txhob txiav txim rau lwm tus” muaj lub ntsiab li cas?
– Dev thiab npua hauv nqe 6 taw txog hom neeg twg?
– Vajtswv Txojlus qhia paub leejtwg yog cev lus cuav, leejtwg yog tus ntsej muag ncaj siab nkhaus? Koj siv zaj kawm no li cas rau pawg ntseeg?
Ib txhia siv Mathais 7:1 los hais tias tsis txhob txiav txim rau leejtwg, txhais hais tias tsis tau ntaus nqi, lossis hais tawm lwm tus qhov yuam kev, yog leej twg tawm tswvyim rau tej kev txhaum, ces raug suav hais tias yog tus neeg thab plaub, tsis muaj kev hlub… Tiamsis qhov tseeb tiag, Vajtswv Txojlus qhia hais tias yog tsis ntuas cov neeg ua txhaum ces thiaj yog tus tsis muaj kev hlub (Levis Kevcai 19:17).
Tswv Yexus hais tias: “Nej tsis txhob muab tej yam uas muaj nqis pov rau dev, nyob tsam dev tig los tom nej. Nej tsis txhob muab tej hlaws muaj nqis pov rau ntawm npua hauv ntej, npua yuav muab tsuj xwb” (nqe 6). Dev thiab npua yog yam tsiaj uas tsis paub txog tej khoom dawbhuv muaj nqis. Ib yam li ntawd, cov uas muaj lub siab tawv, tsis xav ntseeg, thiab saib tsis taus txoj kev cawmdim, ces Tswv Yexus tsis nkim sijhawm tshaj tawm txoj Moo Zoo rau lawv, xws li cov neeg hauv Naxales (Malakaus 6:4-6), lossis zoo li vajntxwv Helauj (Lukas 23:8-9). Nyob hauv Mathais 7:15-16 tus Tswv tau qhia tias: “Nej yuav tsum ceevfaj cov cev lus cuav; thaum lawv tuaj cuag nej, lawv ua txuj ua li lawv yog cov yaj, tiamsis lawv lub siab phem ib yam li hma. Thaum nej pom lawv tes haujlwm nej yuav paub…” Ib tug cev lus cuav yog ib tug neeg uas ua neej tsis raws li nws tej lus qhia. Thaum tus Tswv qhia hauv lub Tuam Tsev, Nws teb cov uas tsis ntseeg Nws tej lus qhia hais tias, “Tsis txhob txiav txim raws li nej qhovmuag pom xwb, tiamsis yuav tsum txiav txim raws li txojkev ncaj ncees” (Yauhas 7:24). Yog li ntawd, muaj qee yam los ntawm Vajtswv kev coj thiab siv Vajluskub, tej zaum peb yuav paub thiab tawm tswvyim yog rau lwm tus tej lus hais thiab nws tes haujlwm ua yog lossis txhaum, zoo lossis phem.
Raws li cov lus hais ua ntu zus hauv Mathais tshooj 7, Tswv Yexus tabtom cem cov neeg ntsej muag ncaj siab nkhaus txoj kev txiav txim, ntawd yog tus cwjpwm tshwm hauv txoj kev khavtheeb tuaj. Tshawb nrhiav lwm tus txoj kev txhaum uas me me zoo li qhov nyuag hmoov ntoo tiamsis hos zais rawv yus txoj kev txhaum loj uas zoo li yav niag ntoo cia. Vajtswv xav kom peb los tshuaj xyuas peb tus kheej nrog Vajtswv Txojlus, lees peb tej kev txhaum thiab tso peb tej kev txhaum tseg ua ntej uas peb xav pab tswvyim rau lwm tus. Timthawj Paulus hais tias thaum Koj pom ib tug kwvtij twg “…ua txhaum nej cov uas muab siab rau ntseeg, nej yuav tsum ua tib zoo ntuas tus ntawd kom nws rov qab los ua zoo…” (Kalatias 6:1). Los ntawm txoj kev xav zoo, tshwm hauv kev hlub tuaj, peb yuavtsum ua tib zoo ntuas tus uas ua txhaum ntawd. Tswv Yexus qhia tias thaum muaj ib tug kwv tij hauv pawg ntseeg ua txhaum rau yus, yus cia li mus nrog nws tham thaum uas yog ob leeg xwb. Yog nws tsis mloog, mam li coj ob peb leeg mus ua timkhawv, yog tsis mloog ntxiv thiab mam muab cob rau pawg ntseeg. Txhais hais tias siv zog hais kom haum ob tog rau hauv txoj kev hlub thiab kev ua siab ntev (Mathais 18:15-17). Saib yus zoo dua txiav txim rau lwm tus yuav tsim muaj teebmeem ntxiv, siv Vajtswv Txojlus ntuas hauv kev hlub ib leeg yuav txhawb tau ib leeg.
Thov Vajtswv:
Tus Tswv, thov Koj pab nyuam yaus paub txeev tshuaj xyuas nyuam yaus tus kheej dhau ntawm Koj Txojlus, thiaj pom txog qhov uas nyuam yaus tsis muaj zog thiab txawj ua yuam kev, kom nyuam yaus paub ua siab ntev, sib hlub kom hla dhau tej teebmeem muaj nyob hauv pawg ntseeg. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tabtom daws teebmeem hauv pawg ntseeg los ntawm txoj hau kev twg?
Nyeem Vajluskub hauv peb lub xyoos: Yausuas 15
Kênh Youtube BHKTHN:
