Klei Aê Diê Blŭ: Philip 2:14-16
Êlan kliăng: “Čiăng kơ diih jing êngeh amâo mâo klei dưi ƀuah ôh, jing phung anak Aê Diê amâo mâo klei čhŏ ôh ti krah ênuk phung soh leh anăn jhat. Ti krah diñu diih mtrang msĕ si pui mngač hlăm lăn ala” (Philip 2:15)
Klei êmuh ksiêm mĭn: Khua ƀĭng kna Y‑Pôl brei thâo, si brei phung đăo hdĭp ti krah lăn ala anei? Tui tiŏ knhuah hdĭp anei, ya boh tŭ srăng mâo? Ya klei drei ƀuăn rơ̆ng?
Ti djiêô dŭm knuih brei weh đuĕ hĕ (êlan 14), khua ƀĭng kna Y‑Pôl lŏ brei mơh dŭm klei mtă jăk bi mđĭ ai, brei phung đăo tui tiŏ êjai dôk hdĭp ti krah lăn ala.
Tal sa, hŏng drei pô, brei phung đăo “jing phung anak Aê Diê amâo mâo klei čhŏ ôh”. Amâo djŏ ôh knŏng hlei pô amâo blŭ dŭñ dŭñ hlăm knhuang êlan jing doh jăk kơh dưi jing anak Aê Diê, ƀiădah kyua drei mâo klei bi mtlaih leh, snăn đăm lŏ blŭ dŭñ dŭñ leh anăn tăng mgăl ôh hŏng Khua Yang hlăm knhuang êlan jing doh jăk, čiăng dưi jing phung anak tui si klei Aê Diê čiăng. Êlâo hĭn “amâo mâo klei čhŏ ôh” čiăng lač amâo mâo anôk dưi ƀuah ôh, amâo mâo soh ôh. Ñu lŏ mñă klei mĭn anei ti tluôn anăn mtam, tơdah blŭ kñăm brei drei “amâo mâo klei dưi ƀuah ôh”. Phung đăo brei hung kơ anôk kñăm amâo klei soh kƀah hlăm klei hdĭp mngăt amâodah ai tiê kpă, čiăng kơ phung lăn ala amâo mâo dưi ƀuah ôh kơ klei hdĭp kpă ênô drei. Čuê tluôn anăn jing sa klei hdĭp “amâo mâo klei čhŏ ôh” čiăng lač jing doh êngeh. Dôk hdĭp ti krah lăn ala, ƀiădah phung đăo amâo dưi ư ai mbĭt ôh hŏng klei mĭn lăn ala yap jing ênoh yuôm leh anăn kpă ênô diñu.
Tal dua, hŏng lăn ala, brei phung đăo “mtrang msĕ si pui mngač hlăm lăn ala”. “Pui mngač” jing boh blŭ yua čiăng lač kơ mlan kơ phung mtŭ. Phung tue wơr êlan hlăm mlam mmăt, si klei digơ̆ čiăng mâo klei mngač mơ̆ng mlan leh anăn mtŭ, ăt msĕ snăn mơh phung lăn ala čiăng mâo klei mngač Khua Yang mtrang ktlă mơ̆ng phung đăo kơ Krist. Drei amâo hdĭp msĕ si lăn ala ôh čiăng kơ lăn ala jum drei, ƀiădah brei drei mtrang mngač, atăt êlan kơ lăn ala hŏng klei “djă pioh klei blŭ klei hdĭp”. Drei mtrang mngač kơ lăn ala kyua drei MÂO “klei blŭ klei hdĭp”, HDĬP HŎNG “klei blŭ klei hdĭp”, leh anăn HIU HƯN “klei blŭ klei hdĭp”. Mta klei phung đăo ba hriê ti lăn ala anei, amâo djŏ ôh “klei đăo” ƀiădah jing “klei blŭ klei hdĭp”.
Tal tlâo, hŏng Phung Sang Aê Diê (êlan 16). Khua bĭng kna Y‑Pôl tuh leh jih klei hdĭp ñu, săn asei mlei djăp mta klei kyua Khua Yang leh anăn Phung Sang Aê Diê. Ñu thâo kral ênoh yuôm sĭt, klei mơak sĭt, klei êđăp ênang sĭt, leh anăn đru lu klei hdĭp mnuih mkăn thâo kral Khua Yang. Mơ̆ng klei hdĭp msĕ snăn yơh jing klei bi mđĭ ai, klei hơêč hmưi, leh anăn klei mưn kơ Phung Sang Aê Diê (Y‑Philêmôn 7; III Y‑Yôhan 3-4).
Hdĭp ti krah “phung soh leh anăn jhat”, phung anak ƀuôn sang Aê Diê amâo tlaih ôh klei arăng ngă jhat, phung lăn ala ñĕ đuĕ. Drei amâo lŏ wĭt ngă hŏng klei bi kdơ̆ng ôh, ƀiădah “djă pioh klei blŭ klei hdĭp, mtrang msĕ si pui mngač hlăm lăn ala” čiăng dưi găn gao klei lông dlăng leh anăn đru kơ lu mnuih thâo kral Khua Yang mơ̆ng knhuah klei hdĭp drei.
Si ngă drei hmiêt mkăp mơ̆ brei Khua Yang yua pioh mtrang mngač ti anôk drei dôk hdĭp?
Wah lač: Ơ Khua Yang, akâo Ih brei klei hdĭp kâo năng hŏng Klei Mrâo Mrang Jăk, hŏng klei hdĭp kâo grăp hruê ƀrư̆ msĕ hĭn hŏng Khua Yang, srăng đru phung ka mâo klei bi mtlaih mâo myun dưi thâo kral Khua Yang leh anăn hriê kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
