Tes Haujlwm 4:36-37, 9:26-28
Nqe cim:
“Yog li ntawd, nej ib tug yuav tsum txhawb ib tug zog, thiab ib tug pab ib tug, ib yam li niaj hnub no nej ua” (I Thexalaunikes 5:11)
Lus nug rau sawvdaws xav:
– Lub npe Npananpas lub ntsiab yog licas?
– Npananpas ua lubneej raws li lub ntsiab ntawm nws lub npe licas?
– Vim licas peb yuav tsum ua tus txhawb zog nyob hauv Pawg Ntseeg?
Phau Tes Haujlwm sau txog qabhau ntawm Npananpas nyob tiam Pawg Ntseeg xubthawj. Npananpas lub npe tiag hu ua Yauxej, tiamsis luag pheej muab nws hu ua Npananpas, muaj lub ntsiab hais tias “tus uas txhawb zog”. Nws muab nws daim teb muag, coj cov nyiaj tuaj fij rau tus Tswv siv coj mus pab cov neeg txomnyem (Tes Haujlwm 4:36-37). Tomqab ntawd, thaum Xaulus ntsib Tswv Yexus, los ntseeg thiab tuaj hauv lub nroog Yeluxalees xav koom nrog cov thwjtim ua ib pab tiamsis lawv tsis ntseeg nws, ces Npananpas ua tus choj muab lawv sib txuas ua ke (Tes Haujlwm 9:26-28).
Npananpas tau ua lubneej raws nraim li lub ntsiab ntawm nws lub npe. Nws dhau los ua tus neeg pab tsa, pab txhawb lwm tus lub zog tiv dhau kev sim siab kom xwv ua siab ntev ua tus Tswv haujlwm. Nws ua timkhawv zoo txog Paulus rau cov Timthawj hauv Yeluxalees. Vim muaj nws Timthawj Paulus tes haujlwm thiaj tau lwm tus paub txog thiab lees yuav. Tomqab no nkawd ob leeg thiaj tau txib mus qhia Txojmoo Zoo (Tes Haujlwm 13:1-13). Npananpas lub neej nto npe los ntawm qhov uas nws yog tus neeg nplig siab, txhawb zog thiab txhim kho lwm tus. Nyob hauv kev mus xa Txojmoo Zoo, muaj ib zaug Timthawj Paulus tsis kam coj tus tub hluas Yauhas Malakaus mus vim zaug ua ntej ntawd mus txog tog nws thim rov qab (Tes Haujlwm 13:13). Yuav kom pab thiab txhawb zog tau rau tus tub hluas no, Npananpas thiaj ncaim ntawm Timthawj Paulus thiab coj Malakaus nrog nws mus ua ke (Tes Haujlwm 15:36-40). Kev txhawb zog ua rau tus hluas Malakaus muaj lub neej pauv hloov. Thaum yuav tas simneej, Timthawj Paulus tau lees yuav Malakaus kev ua haujlwm (II Timautes 4:11). Npananpas tau ncaj ncees ua haujlwm rau tus Tswv ntawm tes haujlwm nplig siab, txhawb lwm tus lub zog tawg paj txi txiv.
Niaj hnub nimno, nyob hauv tej kev ntxhov siab ntawm lubneej, nrog rau kev tawmtsam ntawm “cov thawj, tej uas muaj hwjchim loj thiab tej uas muaj hwjchim uas kav tiam tsaus ntuj”, tus Tswv cov menyuam cheemtsum kev nplig siab, txhawb zog thiab txhim kho kom txhua tus tiv dhau tej kev sim siab hauv lubneej xwv thiaj tawg paj txi txiv rau tus Tswv. Kev ua tus neeg txhawb zog hauv Pawg Ntseeg nimno tseemceeb thiab cheemtsum kawg li. Txawm yog ib nyuag lo lus txhawb zog, ib teg haujlwm sib hlub, lossis tsuas nyob ua ke sib pab ua haujlwm xwb los yeej ua tau lub hauvpaus txhawb zog loj rau lwm tus. Yog peb tsis sib koom siab, tsis sib txhawb zog ces yuav yog zoo sijhawm rau lub ntiajteb tawmtsam thiab kovyeej peb. Thov tus Tswv pab peb txawm yuav ntsib ntau yam kev sim siab thaum ua neej ntseeg nrog neeg ntiajteb los peb yeej ua tus txhawb zog, pab lwm tus tiv dhau thiab ua haujlwm tawg paj txi txiv rau tus Tswv.
Thov Vajtswv,
Tus Tswv, nyob hauv lubneej uas dab ntxwsnyoog pheej ncig mus ncig los thiab nrhiav sijhawm tawmtsam, thov pab nyuam yaus nyob ruaj hauv Koj, ncaj ncees ua tus nplig siab, txhawb lwm tus lub zog kom ua tau lubneej tawg paj txi txiv rau Koj. Nyuam yaus tuav Yexus Khetos lub npe thov, Amees.
Nyeem Vajluskub hauv peb lub xyoos: II Kevcai 13
Kênh Youtube BHKTHN:
