Klei Aê Diê Blŭ: Klei Yap 12:1-16
Êlan kliăng: “Y-Môis ur kơ Yêhôwa, “Ơ Aê Diê, kâo kwưh kơ Ih, bi hlao brei gơ̆.”” (Klei Yap 12:13)
Klei êmuh ksiêm mĭn: H’Miriam leh anăn Y-Arôn blŭ êkŭt kơ Y-Môis kơ ya klei? Ya klei Y-Môis ngă tơdah ƀuh Aê Diê bi kmhal H’Miriam? Ya klei hriăm kơ drei mơ̆ng klei yăl dliê anei?
Trăn Klei Aê Diê Blŭ anei yăl dliê kơ klei amâo thâo bi djŏ ti krah tlâo čô ayŏng adei sa amĭ ƀă: Y-Arôn ayŏng khua, H’Miriam amai leh anăn Y-Môis adei êkei. Jih tlâo čô ayŏng adei Aê Diê yua djă bruă yuôm sơăi hlăm phung ƀuôn sang Israel leh anăn mâo klei phung ƀuôn sang mpŭ. Ƀiădah lĕ, knŏng hjăn Y-Môis djă bruă gĭt gai. Kyua klei anăn yơh H’Miriam kbiă ai tiê nač. Ñu dơ̆ng bi kdơ̆ng hŏng adei ñu leh anăn ktŭng mbĭt hŏng Y-Arôn mơh. Êlâo hĭn diñu bi kdơ̆ng hlăm gŏ sang, “blŭ êkŭt” kơ klei Y-Môis dôk mô̆ mniê Êthiôpi. Êdei anăn lŏ blŭ ƀuah lač dah djŏ mơ̆ knŏng hŏng Y-Môis hĕ Yêhôwa blŭ leh?
Êlan 2 brei thâo Aê Diê hmư̆ jih klei anei. Ñu amâo mơak ôh kơ knhuah leh anăn bruă H’Miriam leh anăn Y-Arôn ngă, kyuanăn Ñu iêô jih tlâo čô ayŏng adei hriê bi tuôm hŏng Ñu. Khua Yang lač klă hŏng ayŏng amai Y-Môis snei, gơ̆ jing mnuih Aê Diê ruah brei jing dĭng buăl Aê Diê mdê hĭn hŏng phung khua pô hưn êlâo mkăn. Gơ̆ sĭt suôr ti anăp Aê Diê leh anăn Aê Diê blŭ hŏng gơ̆ tlă anăp, brei dưi ƀuh rup Ñu. Aê Diê ƀuah diñu dua si ngă diih jhŏng “blŭ bi kdơ̆ng hŏng dĭng buăl Kâo”. Klei Aê Diê ngêñ trơ̆ng kơ diñu leh anăn bi kmhal H’Miriam hŏng klei djŏ phŭng (êlan 6-10).
Tơdah ƀuh H’Miriam djŏ phŭng, Y-Arôn hmao ƀuh mtam klei soh diñu leh anăn kmhal. Ñu akâo kơ Y-Môis pap brei kơ diñu leh akâo kơ Aê Diê pap brei bi hlao adei ñu. Hrô kơ klei phưi lui čiăng rŭ ênua, bi Y-Môis ur kwưh mtam kơ Aê Diê pap bi hlao brei amai ñu (êlan 11-13). Hlăm klei găn truh kơh ƀuh klă klei khăp ayŏng amai adei! Aê Diê hmư̆ wĭt lač klei Y-Môis akâo leh anăn bi hlao H’Miriam.
Klei hriăm tal sa drei hriăm ktuê jih klei yăl dliê anei, Y-Môis amâo lŏ mgăl wĭt ôh. Klei anei mñă kơ drei, tơdah arăng bi êmut, nač iăng, blŭ êkŭt, drei amâo yuôm lŏ mgăl wĭt ôh. Ăt đăo kjăp kơ Khua Yang kpă ênô ƀuh jih jang bruă. Ñu srăng jing Pô dŏng mgang drei. Klei hriăm tal dua kơ klei khăp ayŏng amai adei. Hlăm gŏ sang, grăp čô mâo sơăi klei brei leh anăn klei Aê Diê iêô mdê mdê. Đăm brei ôh klei nač ngă kơ drei blŭ êkŭt kơ ayŏng adei drei pô. Bi mklăk wĭt, tơdah ayŏng amai adei drei tuôm hŏng klei truh, wăt tơdah pô amâo khăp čiăng kơ drei dưn, ăt kăn ăl ngêñ, rŭ ênua phưi lui rei, ƀiădah hŏng jih ai tiê akâo kwưh kơ Khua Yang pap brei. Hŏng klei khăp ayŏng amai adei leh anăn jih ai tiê dưm klei đăo kơ Pô phat kđi kpă yơh, srăng đru drei găn gao jih klei lông dlăng hlăm gŏ sang čiăng hrăm mbĭt djă kngan mă bruă kơ Aê Diê.
Si ngă drei mâo klei nač mơ̆ tơdah ƀuh ayŏng amai adei drei kdlưn hĭn kơ drei?
Wah lač: Ơ Khua Yang, akâo Ih mñă kơ kâo mơ̆ng klei hriăm anei kơ klei khăp ayŏng amai adei hlăm gŏ sang. Brei kâo thâo ƀuh hdră Aê Diê mkra kơ klei hdĭp gŏ sang kâo, čiăng kơ kâo thâo bi khăp, bi đru, hĭn kơ bi nač, blŭ êkŭt hdơ̆ng pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 12-13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
