Klei Aê Diê Blŭ: Rôm 7:14-25
Êlan kliăng: “Kâo amâo thâo săng ôh klei kâo ngă. Kyuadah kâo amâo ngă ôh klei kâo čiăng, ƀiădah kâo ngă klei kâo bi êmut” (Rôm 7:15)
Klei êmuh ksiêm mĭn: Khua ƀĭng kna Y-Pôl yăl dliê bi êdah kơ ya klei bi blah prŏng hlăm ai tiê ñu? Si ngă ñu msir mkra hĕ klei bi blah anei? Si ngă drei ngă čiăng dưi hŏng klei bi blah hlăm ai tiê?
Khua ƀĭng kna Y-Pôl ur krao kơ klei ñu amâo dưi ngă ôh hlăm klei bi blah hŏng klei soh. Mơ̆ng hruê aê aduôn drei Y-Ađam leh anăn H’Êwơ ƀơ̆ng hĕ boh kăm hlăm war Êđen, anak mnuih dơ̆ng thâo kral klei jăk leh anăn klei jhat (Klei Mphŭn Dơ̆ng 3:22). Anak mnuih thâo kơ klei bhiăn jing myang, jih jang mnuih čiăng sơăi ngă klei jăk, ƀiădah kđeh ghă hĕ digơ̆ kyuanăn digơ̆ amâo dưi ngă klă ênŭm ôh. Êjai anak mnuih bi êmut snăk kơ klei ngă soh, snăn kđeh lĕ lŏ mtrŭt leh đru anak mnuih dưi ngă soh kluôm ênŭm. Klei bi blah amâo mâo êlan dưi tlaih anei dôk hlăm lam ai tiê jih jang mnuih, hlăm anăn mâo wăt phung đăo kơ Krist mơh.
Sa cô mnuih mâo klei đăo ktang kơ Khua Yang Yêsu msĕ si Khua ƀĭng kna Y-Pôl, thâo săng kơ klei bhiăn, hur har mtô Klei Mrâo Mrang Jăk, mâo lu klei brei mơ̆ng Yang Mngăt Jăk dưi bi hlao klei ruă duam leh anăn suôt yang jhat ăt kăn dưi tlaih lei kơ klei bi blah dleh dlan anei. Ñu ƀuh klă kơ klei kđeh bi blah hŏng klei mĭn čiăng ngă klei jăk. Ñu lač mnơ̆ng jăk amâo dôk hlăm ñu ôh, čiăng lač amâo dôk hlăm kđeh ñu ôh (êlan 18). Klei soh plah mă hĕ klei anak mnuih čiăng ngă klei jăk. Anak mnuih amâo dưi ngă bruă jăk čiăng mâo klei bi mtlaih ôh. Ñu ur hŏng klei luč klei čang hmăng snei: “Knap mñai yơh kâo! Hlei pô srăng bi mtlaih kâo mơ̆ng asei mlei thâo djiê anei?” Leh anăn hdră êlan kơ klei dleh dlan anăn jing: “Bi mni kơ Aê Diê hlăm Yêsu Krist, Khua Yang drei!” (êlan 24-25a). Klei dưi hlăm klei bi blah anăn amâo djŏ kyua klei gĭr ngă djŏ tui si klei bhiăn ôh, ƀiădah klei dưi anăn kyua hŏng klei myang Khua Yang Yêsu kluôm dhuôm. Phung đăo kơ Krist jing phung Khua Yang bi mtlaih leh mơ̆ng săng đai klei soh, mâo Yang Mngăt Jăk kđăm leh anăn mŭt kiă kriê hlăm ai tiê. “Klei pô čiăng” amâodah “klei kđeh čiăng” mơ̆ng mnuih hđăp ăt dôk hlăm lam ai tiê mnuih, dôk kăp mmông găl srăng kgŭ leh anăn ngă tui si ñu čiăng. Khua ƀĭng kna Y-Pôl pô lač leh hŏng klei mĭn, ñu jing hlŭn kơ klei bhiăn Aê Diê ƀiădah hŏng kđeh ñu, ñu jing hlŭn kơ klei bhiăn klei soh (êlan 25b). Kyuanăn, phung đăo đăm ngă klei amâo uêñ, dlăng hơăi mang kơ klei ktang klei soh ôh. Satan jing pô blŭ luar leh anăn klei luar ñu êgao kơ klei thâo săng anak mnuih. “Snăn hlei pô mĭn ñu dôk dơ̆ng, brei ñu răng huĭdah ñu srăng lĕ buh” (I Kôrantô 10:12). Drei knŏng srăng mâo klei dưi hŏng klei myang klei mmăt tơdah drei brei Khua Yang Yêsu mŭt dôk jing Khua ti jhưng mtao ai tiê drei leh anăn gưt kơ Ñu kluôm ênŭm. Tơdah drei awăt ngă hĕ klei soh, brei drei kmhal hĕ mtam, wah lač hŏng Anăn Khua Yêsu čiăng mâo klei pap brei leh anăn khut khat lui jih klei soh, lŏ wĭt hdĭp kơ Khua Yang.
Si ngă drei brei Khua Yang jing Khua leh anăn gưt nanao kơ Ñu mơ̆?
Wah lač: Ơ Khua Yang, kâo lač jăk kơ Ih kyua klei khăp leh anăn klei Ih gĭr hŏng kâo! Mâo lu blư̆ kâo brei klei kâo pô čiăng jing khua leh anăn klei hdĭp kâo amâo mâo sa mta bruă jing ôh. Wăt snăn dưn mơh, Ih ăt khăp kơ kâo, hŏng klei sĭt suôr Ih wĭt lač kơ kâo tơdah kâo wah lač kơ Ih. Đru kâo thâo gưt asăp kơ Ih čiăng kơ kâo dưi bi knal kơ klei hơ̆k mơak mơ̆ng klei dưi hlăm Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
