Loos 7:14-25
Nqe cim:
“Kuv tsis to taub tej uas kuv ua; vim li cas kuv ua tej uas kuv tsis nyiam ua, tiamsis tej uas kuv nyiam kuv ho tsis ua” (Loos 7:15).
Lus nug rau sawvdaws xav:
– Timthawj Paulus sau txog txojkev sib tawmtsam twg hauv nws lub siab?
– Nws daws tej teebmeem no licas?
– Yuav ua licas peb thiaj kov yeej pluav rog hauv nruab siab?
Timthawj Paulus xyu txog nws txojkev qaug zog thaum sib tawmtsam nrog kev txhaum. Txij thaum pojkoob yawmtxwv Adas Evas noj lub txiv Vajtswv txwv hauv lub vaj Edees, tibneeg pib paub qhov phem thiab qhov zoo (Chivkeeb 3:22). Tibneeg paub hais tias txoj kevcai yog tseemceeb, leejtwg los yeej xav ua txoj zoo tiamsis raug lubcev nqaij tawv thaiv ntis thiaj ua tsis tau zoo. Tiamsis thaum tibneeg ntxub ua qhov phem ces ho raug lub cev nqaij tawv yuam thiab tshoov mus ua txoj phem. Pluav rog tsis muaj kev dim no tshwmsim nyob hauv txhua tus tibneeg, tsis hais cov ntseeg Yexus los kuj ntsib huv tibsi.
Ib tug uas muaj kev ntseeg Tswv Yexus ruaj khov zoo li Timthawj Paulus, paub txoj kevcai, kub siab lug qhia Txojmoo Zoo, tau Vaj Ntsujplig pub ntau txoj koobhmoov kho mob thiab ntiab dab, tiamsis nws yeej tsis tau tshwj tawm ntawm pluav rog uas nyuaj no. Nws zeem paub meej txog lub cev nqaij tawv tav tibneeg lub siab xav ua yam zoo. Nws hais tias nws txawj xav ua zoo tiamsis nws lub cev ua rau nws ua tsis tau yam zoo (nqe 18). Kev txhaum twb txeeb tswj tibneeg txojkev xav ua zoo lawm. Tibneeg yuav xav ua yam zoo kom tau cawmdim los yeej tsis tau. Timthawj Paulus thiaj tas kev cia siab thiab tsa suab hais tias: “Ua cas kuv yuav nyuaj siab ua luaj li? Leejtwg thiaj yuav cawm tau kuv dim ntawm lub siab uas coj kuv mus raug kev ploj kev tuag?” thiab nws teb ntxiv hais tias: “Kuv ua Vajtswv tsaug uas peb tus Tswv Yexus Khetos twb pab kuv dim lawm!” (nqe 24-25a). Kev muaj yeej tsis yog los ntawm qhov uas siv zog ua raws li txoj kevcai tiamsis yog vamkhom tagnhro rau Cawmseej Yexus lub hwjchim.
Cov ntseeg Yexus yog cov uas tau Tswv Yexus cawmdim ntawm kev txhaum txoj saw hlau khi, tau Vaj Ntsujplig ntaus cim thiab tswjkav hauv siab. Tiamsis, “tus kheej kev xav” lossis “kev ntshaw sab qaij tawv” ntawm tus neeg qub yeej tseem muaj nyob tob tob hauv tibneeg nruab siab, tos txog sijhawm tshwmsim rov tuaj ua phem. Timthawj Paulus qhia paub hais tias nws siv lub siab ua Vajtswv txoj kevcai qhev tiamsis siv lubcev los ua txojkev txhaum li qhev (nqe 25b). Vim li ntawd, tus ntseeg Yexus tsis txhob khav, txhob ntaus nqi qis rau kev txhaum lub dag zog peevxwm. Xatas yog tus hais lus dag muaj tswvyim phem dhau tibneeg kev totaub. “Yog leejtwg xav hais tias nws twb sawv khov kho lawm, nws yuav tsum ceevfaj nyob tsam nws ntog” (I Kauleethaus 10:12). Peb tsuas kovyeej kev tsaus ntuj lub hwjchim thaum niaj hnub cia Tswv Yexus tswjkav hauv siab thiab ua raws Nws siabnyiam. Yog tias qaug zog ua txhaum, peb yuav tsum lees kev txhaum, taij thov txog Tswv Yexus lub npe kom tau zam txim thiab txiav txim siab tso kev txhaum tseg, tig rov los ua neej pub rau tus Tswv.
Thov Vajtswv,
Tus Tswv, nyuam yaus ua Koj tsaug vim Koj txojkev hlub thiab ua siab ntev rau nyuam yaus! Ntau zaug nyuam yaus cia tus kheej tswjkav thiab raug swb nyob hauv lubneej. Txawm li ntawd, los Koj tseem hlub, cawm nyuam yaus dim thaum nyuam yaus taij thov. Thov pab nyuam yaus paub mloog Koj lus kom kovyeej txhua hnub. Nyuam yaus tuav Yexus Khetos lub npe thov, Amees.
Peb puas cia tus Tswv ua thawj thiab mloog Nws lus lawm tau?
Nyeem Vajluskub hauv peb lub xyoo: Levis Kevcai 4
Kênh Youtube BHKTHN:
