Loos 6:15-23
Nqe cim:
“Tiamsis nimno Vajtswv twb tso nej dim ntawm txojkev txhaum los ua Vajtswv cov tubqhe lawm. Qhov uas nej tau yog Vajtswv ntxuav kom nej muaj lub siab dawbhuv thaum kawg nej thiaj tau txojsia ntev dhawv mus ibtxhis”(Loos 6:22).
Lus nug rau sawvdaws xav:
– Cov neeg uas nyob hauv tus Tswv kev hlub muaj tus cwjpwm thiab lub neej li cas?
– Yog ua cas timthawj Paulus hais mus hais los lub neej qub thiab tej nuj nqis ntawm lub neej qub no?
– Zaj kawm hnub no muaj lub ntsiab li cas rau peb?
Timthawj Paulus qhia meej hais tias tus uas tau Vajtswv suav tias ncaj ncees nws tsis nyob rau hauv txoj kevcai lawm tiamsis nws nyob rau hauv Vajtswv koob hmoov (nqe 15). Qhov no tsis tau txhais hais tias cov ntseeg tau ywj pheej ua txhaum raws li siab ntshaw ces yeej tau Vajtswv koob hmoov zam txim. Paulus hais tias “Tsis txhob ua li ntawd!” txhua tus yuavtsum txiav txim siab xaiv saib yus yuav pehawm thiab ua leejtwg haujlwm. Ua leejtwg qhev ces yuavtsum mloog tus tswv ntawd lus. Ib tus tswv nyias muaj nyias haukev cob qhia kom yus tus qhev paub ua haujlwm raws li yus siab nyiam. Muaj ob txoj kev xaiv, ntawd yog xaiv ua qhev rau kev txhaum ces coj mus rau kev ploj kev tuag lossis xaiv mloog Vajtswv lus ces coj mus tau txojsia ib txhis. Yog li thaum ib tus neeg xaiv mloog tus tswv twg lus ces nws lub neej kuj yuav xaus mus li ntawd hloov pauv tsis tau (nqe 16). Yog peb hais tias peb yog Vajtswv tus qhev peb yuavtsum tau mloog Vajtswv lus.
Cov neeg uas nyob hauv txoj koob hmoov, lawv yog cov uas paub zoo txog txoj kev txomnyem, kev txajmuag thaum tseem ua kev txhaum qhev. Lawv tau txais koob hmoov ntawm Vajtswv Vaj Peb Leeg los ntawm qhov uas lawv ntseeg Tswv Yexus, lawv tau Vajtswv zam txim thiab xaiv mloog li Nws tej lus qhia kom txawj ua tau lub neej zoo. Vim Vajtswv yog tus dawbhuv thiab ncaj ncees, txhua tus uas nyob rau hauv Nws txoj kev tswj yuavtsum muab lub neej dawbhuv thiab txojsia ib txhis los ua lub homphiaj rhais ruam mus kom txog qhov kawg (nqe 22).
Hauv ntu Vajlukub hnub no, timthawj Paulus hais mus hais los txog lub neej qub ua kev txhaum qhev rau hauv tej kev phem kev qias, ces yuav tau sau kev txajmuag thiab nuj nqis ntawm txoj kev txhaum yog kev tuag. Cov ntseeg tsis raug txoj kevcai txiav txim, tiamsis tsis tau txhais hais tias peb muaj cai mus txhaum nyob rau lub ntiajteb no. Ib yam li Adas thiab Evas nyob hauv vaj Edees hnub thaud, nkawd tsis raug ib txoj kev txhaum twg khi tiamsis nkawd txiav txim siab tsis mloog Vajtswv lus cia ua raws li dab Ntxwsnyoog txoj kev dag ntxias thiaj poob rau kev txhaum. Yog li ntawd ib tus ntseeg tseeb yuavtsum vamkhom Vajtswv kev pab thiab ua lub neej mloog Nws lus kom dhau tau los ua ib tus neeg ncaj ncees thiab muaj txojsia ib txhis hauv Tswv Yexus. Tiamsis ib tus ntseeg, lam ntseeg muaj npe kom tau Vajtswv kev hlub, nws yuav rov mus taug txoj kev qub dua thiab sau tej uas nws txhais tes tseb uas yog kev tuag.
Thov Vajtswv,
Tus Tswv, thov pab nyuam yaus mloog Koj lus mus tas simneej. Thov Vaj Ntsujplig los nyob hauv nyuam yaus lub siab kom ua tau lub neej ncaj ncees mus txog hnub kawg. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas mloog Vajtswv lus kawg siab?
Nyeem Vajluskub hauv peb lub xyoos: Mathais 13
Kênh Youtube BHKTHN:
