Klei Aê Diê Blŭ: Y-Yêrêmi 50:33-46
Êlan kliăng: “Ƀiădah Pô Bi Tui digơ̆ jing ktang; anăn ñu jing Yêhôwa kơ phung kahan. Sĭt nik ñu srăng jing pô mgang klei digơ̆, čiăng kơ ñu dưi brei klei mdei kơ lăn čar digơ̆, ƀiădah amâo mâo klei mdei ôh kơ phung dôk hlăm ƀuôn Ƀaƀilôn.” (Y-Yêrêmi 50:34)
Klei êmuh ksiêm mĭn: Si klei ƀuăn kơ Pô Bi Tui dôk mbĭt hŏng phung ƀuôn sang Ñu ruah? Đao gưm mơ̆ng Pô Bi Tui srăng truh hŏng hlei pô? Ya klei mđĭ ai diih tơdah tlă anăp hŏng klei arăng ktư̆ juă, amâo mtăp mđơr hlăm klei hdĭp anei?
Rup êđai biăp tuôm hŏng êmông gŭ tiŏ mă, bi hmô klă nik kơ boh klei phung Israel ti gŭ klei ngă jhat leh anăn kiă kriê jhat ƀai mơ̆ng mtao Asiri leh anăn mtao Ƀaƀilôn. Diñu amâo khăp, amâo bi êdu kngan, ƀiădah, diñu “…mă ba digơ̆ jing mnă kơ̆ng digơ̆ kjăp, diñu hngah amâo brei digơ̆ đuĕ nao ôh” (êlan 33). Ti anăp phung roh ktang leh anăn jhŏng, phung ƀuôn sang Aê Diê amâo djăp ai ktang hgao jih čiăng wĭt kơ ƀuôn sang ôh. Ƀiădah phung ƀuôn sang Aê Diê srăng amâo jih klei čang hmăng tơdah mâo Pô Bi Tui dôk mbĭt. Ñu “…jing ktang; anăn Ñu jing Yêhôwa kơ phung kahan”(êlan 34a), leh anăn msĕ si Klei Ñu lač, Ñu srăng mgang klei dưi mơ̆ng digơ̆.
Phung ƀuôn sang Aê Diê dưi mđĭ ai tơdah thâo Aê Diê ăt pap nanao, leh anăn hlăm trăn anei, phung ƀuôn sang Aê Diê lŏ dưi mđĭ ai hĭn tơdah thâo đao gưm klei ngêñ Aê Diê ăt suê̆ mơ̆ng hruh čiăng bi kmhal phung ngă jhat kơ phung ƀuôn sang Ñu. Boh blŭ “sa ƀĕ đao gưm” dưi mñă êma blư̆ hlăm trăn Klei Aê Diê Blŭ anei hlăm jih jang phung msĕ Kalde, phung Ƀaƀilôn, phung khua pô hưn êlâo soh leh anăn phung kahan ktang diñu, phung mgao, kơ aseh leh anăn êdeh aseh diñu, jih jang ngăn drăp diñu arăng srăng mă jih. Rup anei lač kơ klei Pô Bi Tui bi kmhal kơ jih jang mnuih mrâo lač kyua klei soh jhat diñu ngă. Leh gưl bi kmhal, Ƀaƀilôn srăng jing ênguôl, mơ̆ng ênuk anei truh kơ ênuk mkăn amâo mâo ôh pô srăng dôk tinei, amâo mdê ôh hŏng ƀuôn Sôdôm leh anăn ƀuôn Gômôrơ (êlan 39-40). Ai tiê Yêhôwa dôk guôn prŏng snăk, ƀiădah truh mmông Ñu, phung ƀai ăt kăn kmhal snăn Aê Diê srăng sah đao gưm ñu; Ñu ƀêč hna ñu leh anăn kliêng (Klei Mmuñ Hđăp 7:12).
Drei jing phung ƀuôn sang Aê Diê ăt jing Pô Bi Tui, Ñu ƀuh grăp čô drei hlăm djăp boh klei leh anăn đao gưm Aê Diê ăt mprăp kơ hlei pô ngă jhat kơ drei. Hĭn mơh, klei pap Aê Diê bi êdah nanao hŏng grăp čô drei wăt tơdah drei amâo năng ôh. Pô Bi Tui kơ phung ƀuôn sang Aê Diê hlăk đưm ăt jing Pô Bi Tui kơ drei hruê anei, Ñu amâo bi mlih ôh, klei pap Ñu ăt adôk lă lar. Anei jing klei čang hmăng đru drei djă pioh nanao klei đăo hlăm Khua Yang, amâo êdu ai ôh hlăm klei truh, ƀiădah mơak nanao đăo knang leh anăn dôk guôn klei bi mtlaih mơ̆ng Pô Bi Tui jing Yêhôwa kơ phung kahan hlăm mmông Ñu.
Hlăm djăp boh klei, drei srăng jih ai tiê đăo knang hlăm Pô Bi Tui srăng bi mtlaih drei mơ̆?
Wah lač: Ơ Aê Diê jing Pô Bi Tui kâo, jing Yêhôwa kơ phung kahan! Akâo kơ Ih đru kâo đăo kơ klei dưi leh anăn klei bi mtlaih jăk siam Ih brei kơ kâo čiăng kâo hdĭp hlăm klei mơak, klei čang hmăng hlăm boh klei Ih mdưm. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
