Klei Aê Diê Blŭ: Rôm 3:9-20
Êlan kliăng: “Kyuadah ti anăp Aê Diê amâo mâo sa čô mnuih ôh srăng mâo klei yap kpă hŏng bruă klei bhiăn, kyua hŏng klei bhiăn arăng thâo klei ñu jing soh leh.” (Rôm 3:20)
Klei êmuh ksiêm mĭn: Ya klei msĕ leh anăn mdê hlăm knuih hdĭp phung Yuđa leh anăn phung ƀuôn sang mkăn? Si bruă klam klei bhiăn hŏng phung ƀuôn sang Aê Diê ruah? Si ngă drei dưi tlaih mơ̆ng klei dưi klei soh kiă kriê?
Phung Yuđa dưi pia jing phung dôk ti gŭ klei bhiăn Aê Diê, hlăk êjai phung mkăn amâo dôk ti gŭ klei bhiăn anăn ôh. Klei pap yuôm bhăn năng mpŭ hĭn kơ phung Yuđa jing klei Aê Diê brei klei bhiăn jing hnơ̆ng čuăn kơ sa knuih hdĭp bi mơak kơ Aê Diê leh anăn ba klei jăk mơak kơ diñu pô. Khădah snăn, Khua ƀĭng Y-Pôl bi mklă amâo mâo ôh klei mdê hlăm knuih hdĭp plah wah phung ƀuôn sang Aê Diê ruah hŏng phung mkăn. Grăp čô dôk ti gŭ klei dưi mơ̆ng klei soh kiă kriê (êlan 9).
Leh anăn, Khua ƀĭng kna Y-Pôl hrêč mă lu trăn Klei Aê Diê Blŭ hlăm Klei Bi Mguôp Hđăp mjing tur knơ̆ng kơ klei ñu bi mklă: Amâo mâo sa čô thâo săng ôh , amâo mâo sa čô duah Aê Diê ôh. Grăp čô soh leh sơăi, jing leh hơăi mang; amâo mâo sa čô ngă klei jăk ôh (êlan 10-12; Klei Mmuñ Hđăp 14:1-3; 53:1-3). Kŏng đŏk diñu msĕ si msat pŏk ƀăng, yua klei blŭ pioh mplư, blŭ jhat, tăm pah leh anăn ai tiê phĭ (êlan 13-14; Klei Mmuñ Hđăp 5:9; 10:7; 140:3). Diñu mâo jơ̆ng pral ngă tuh êrah. Ti anôk nao ăt rah klei bi rai leh anăn klei dleh dlan. Kyua anăn, diñu amâo thâo ôh êlan klei jăk mơak, êđăp ênang (êlan 15-17; Y-Êsai 59:7-8). Ti anăp diñu amâo mâo ôh klei huĭ mpŭ kơ Aê Diê (êlan 18; Klei Mmuñ Hđăp 36:1).
Wăt tơdah klei bhiăn Aê Diê jing kluôm ênŭm, ƀiădah phung ƀuôn sang Ñu amâo mâo ôh knuih hdĭp jăk hĭn kơ phung ƀuôn sang mkăn. Klei bhiăn mâo bruă klam jing klei bi hmô čiăng kơ phung ƀuôn sang dlăng diñu pô hlăm anăn leh anăn diñu thâo diñu amâo dưi ngă ôh hlăm klei hlue ngă klei bhiăn čiăng mâo Aê Diê yap jing kpă ênô (êlan 20). Wăt phung Yuđa hŏng phung ƀuôn sang mkăn jing phung soh leh msĕ sơăi leh anăn brei tŭ klei Aê Diê bi kmhal.
Klah čŭn, lu blư̆ drei dlăng hlăm đa đa mnuih, ƀun msĕ si kpă ênô, hdĭp jăk, amâodah drei bi mĭn drei pô jăk hĭn kơ pô mkăn…, ƀiădah klă sĭt anak mnuih leh lĕ buh hlăm klei dưi mơ̆ng klei soh, mâo klei mĭn hngah kơ Aê Diê, mâo ai tiê knŏng bi mĭn kơ pô, mĭn kơ klei jhat, khăng ngă soh hlăm klei blŭ, bruă ngă leh anăn wăt hlăm ai tiê klei mĭn. Klei bhiăn amâo ngă kơ knuih hdĭp anak mnuih jăk hĭn ôh ƀiădah klei bhiăn đru drei thâo săng drei pô amâo kluôm ênŭm, soh jhat. Anăn jing klei mphŭn dơ̆ng đru drei duah êlan knŏng hjăn sa, bi mtlaih drei mơ̆ng klei soh kă kơ̆ng hŏng klei khăp, klei pap Khua Yang Yêsu Pô Bi Mtlaih. Kyua klei myang mơ̆ng Yang Mngăt Jăk bi mlih ai tiê mnuih, mtrŭt drei tui duah Aê Diê, đru drei mâo klei čiăng leh anăn ngă hlue si klei čiăng jăk Aê Diê, čiăng kơ mơ̆ng anăn drei thâo kral sa klei hdĭp êđăp ênang hlăm Khua Yang khăp hơiêng.
Ya klei adôk mâo hlăm knuih hdĭp hđăp adôk ngă gun kpăk kơ drei? Si hdră drei dưi lui jih klei anăn?
Wah lač: Ơ Khua Yang, kâo bi mni kơ Ih yap kâo jing pô kpă ênô hŏng bruă ngă kpă ênô Khua Yang Yêsu! Akâo kơ Ih đru kâo duah Aê Diê grăp hruê leh anăn jih ai tiê hlue ngă klei Ih mtô, čiăng thâo kral sa klei hdĭp êđăp ênang hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
