Klei Aê Diê Blŭ: Y-Mathiơ 5:3
Êlan kliăng: “Jăk mơak yơh phung ƀun ƀin hlăm mngăt ai tiê, kyuadah ƀuôn ala mtao adiê pioh kơ diñu.” (Y‑Mathiơ 5:3).
Klei êmuh ksiêm mĭn: Si phung ƀun ƀin hlăm mngăt ai tiê jing? Ya ngă phung ƀun ƀin hlăm mngăt ai tiê mâo klei jăk mơak? Ya klei jăk mơak mă tŭ? Si drei ngă čiăng mâo klei ƀun ƀin hlăm mngăt ai tiê?
Y-Mathiơ 5:3 jing klei jăk mơak tal êlâo hlăm sapăn mta klei jăk mơak kčưm pŏk Klei Khua Yang Yêsu Mtô Ti Dlông Čư̆. Anei amâo djŏ klei čoh čuăn kơ mnuih čiăng mâo klei hdĭp hlŏng lar ôh, ƀiădah jing rup bi êdah knhuah hdĭp phung đăo leh anăn bi klă hĭn hŏng đa mta klei. Klei Mtô Ti Dlông Čư̆ brei thâo tơdah sa čô mnuih mă tŭ leh klei bi mtlaih mơ̆ng Aê Diê snăn hŏng klei Yang Mngăt Jăk mă bruă, pô anăn srăng hơô dŭm knuih hưn mdah tinei.
“Jăk mơak” jing sa klei pap Aê Diê yơh brei kơ mnuih. Ai ktang, klei dưi hlăm mngăt phung anak ƀuôn sang Aê Diê mâo, jing mơ̆ng Khua Yang brei (Klei Mmuñ Hđăp 68:35; 72:18; I Y‑Timôthê 1:11). Kyuanăn hlăm Khua Yang, anak mnuih dưi dưn klei pap Khua Yang, dưi jing mnuih mâo kdrêč hlăm knuih adiê dlông. Amâo dưi mâo klei jăk mơak ôh tơdah amâo mâo klei bi mguôp hjăn pô hŏng Aê Diê (II Y‑Pêtrôs 1:4).
Klei jăk mơak tal êlâo hĭn pioh kơ “phung ƀun ƀin hlăm mngăt ai tiê” . Phung dleh dlan ƀun ƀin amâo dưi dlăng ba diñu pô ôh leh anăn khăng bi gun hŏng mnuih mkăn. Kyuanăn phung ƀun ƀin hlăm mngăt ai tiê jing phung thâo kral kơ mngăt ai tiê diñu amâo mâo klei dưi, jing hơăi mang. Blŭ mdê, “phung ƀun ƀin hlăm mngăt ai tiê” jing phung kluôm dhuôm amâo mâo klei mgao, ktưn hưn, thâo kral klei diñu jing mnuih hơăi mang ti anăp Aê Diê, amâo mâo sa mta klei jăk dưi kbiă hriê mơ̆ng hjăn pô čiăng dưi bi mơak kơ Aê diê.
“Phung ƀun ƀin hlăm mngăt ai tiê” mngăt ai tiê diñu mâo klei jăk mơak kyua tơdah amâo thâo kral kơ diñu pô jing kƀah, diñu amâo srăng dưi bi bŏ ôh, kyuanăn, klei jăk mơak anei srăng pŏk ƀăng bhă kơ klei jăk mơak adôk. Klei yuôm kơ Aê Diê mđing uêñ tinei jing “mngăt ai tiê” – anăn jing mta klei sa čô mnuih dlăng wĭt kơ ñu pô, thâo kral drei pô; jing boh klei sa čô mnuih amâo tlă anăp hŏng pô mkăn ôh ƀiădah tlă anăp hŏng Aê Diê leh anăn hŏng hjăn pô yơh.
Si ngă čiăng mâo klei “ƀun ƀin hlăm mngăt ai tiê” ? Êlâo hĭn, anei jing bruă Yang Mngăt Jăk, kyua tơdah amâo mâo hŏng Ñu, amâo mâo sa čô mnuih soh dưi thâo kral klei ƀun ƀin hlăm mngăt ai tiê ôh. Tal dua, tơdah đăo leh kơ Khua Yang, brei drei dlăng kơ Khua Yang čiăng dưi ƀuh klei pap Ñu pioh brei kơ drei, tơdah amâo snăn drei rai luč kluôm dhuôm leh. Sa čô mnuih mgao, amâo mâo klei êpa mhao hlăm mngăt ai tiê, knŏng kyuadah pô anăn bi mkă ñu hŏng pô mkăn, amâodah guôm hĕ ală, kđăl hĕ knga ñu pô čiăng đăm ƀuh ôh Khua Yang leh anăn bruă Ñu ngă. Čiăng thâo kral Khua Yang leh anăn kơ drei pô lu hĭn, brei drei sĭt suôr dlăng Klei Aê Diê Blŭ, dlăng kơ mta klei Khua Yang dôk čang guôn mơ̆ng drei, djă pioh mmông kriêp hjăn bi mguôp hŏng Khua Yang grăp hruê, čiăng ƀuh kơ drei pô jing ƀun ƀin hlăm mngăt ai tiê leh anăn dưi dưn Ƀuôn Ala Mtao Hlăm Adiê.
Si ngă drei thâo kral mơ̆ kơ drei pô jing ƀun ƀin hlăm mngăt ai tiê?
Wah lač: Bi mni kơ Khua Yang bi mtlaih kâo êjai kâo dôk jing sa čô mnuih soh bi kdơ̆ng hŏng Khua Yang. Akâo Khua Yang brei mngăt ai tiê kâo êpa mhao nanao leh anăn tui duah Khua Yang grăp hruê čiăng dưi mâo Khua Yang bi trei bi bŏ kâo.
Dlăng Klei Aê Diê Blŭ hlăm tlâo thŭn: Klei Mmuñ Siam Hĭn 2:8 – 3:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
