Klei Aê Diê Blŭ: Klei Mphŭn Dơ̆ng 45:1-15
Êlan kliăng: “Đăm bi wĭt klei jhat kơ klei jhat arăng ôh, ƀiădah mĭn bĕ klei jăk ti anăp jih jang mnuih. Tơdah dưi, gĭr bĕ, dôk êđăp ênang hŏng jih jang mnuih.” (Rôm 12:17-18)
Klei êmuh ksiêm mĭn: Ya ngă Y-Yôsep pap brei kơ phung ayŏng adei ñu? Si ñu bi êdah klei pap brei? Si drei dưi hdĭp êđăp ênang hŏng mnuih bi êka ai tiê drei?
Leh găn jih klei jhat truh, klei knap mñai leh anăn uăt ruăt, Aê Diê ba Y-Yôsep truh kơ anôk bruă jing khua prŏng čar Êjip. Ñu lŏ bi tuôm hŏng phung ayŏng ñu, jing phung čhĭ leh ñu jing hlŭn, hlăk phung ayŏng ñu nao akâo blei mnơ̆ng ƀơ̆ng huă. Găn dŭm hruê mmông ksiêm duah čiăng thâo, lông dlăng ai tiê phung ayŏng, truh mmông ñu amâo lŏ mdăp klei ñu jing ôh. Ñu ur hia hưn ñu pô hŏng phung ayŏng leh anăn êmuh kơ ama mduôn, êjai anăn phung ayŏng ñu huĭ snăk sơưn (êlan 1-3). Sĭt nik Y-Yôsep thâo săng kơ klei diñu huĭ mbĭt hŏng hêñ kyua klei soh phung ayŏng ngă tơdah lŏ bi tuôm hŏng ñu. Kyuanăn, ñu bi juh diñu, “amâo djŏ diih ôh mơĭt hriê kâo tinei, ƀiădah Aê Diê yơh” (êlan 8).
Y-Yôsep bi êdah ai tiê ñu pap brei kluôm dhuôm kơ phung ayŏng leh, hŏng klei ñu thâo săng hdră Khua Yang kñăm čiăng kơ klei hdĭp ñu. Hŏng anôk bruă ñu dôk djă, ñu dưi rŭ ênua ênưih pưih yơh. Ƀiădah hŏng klei đăo knang leh anăn thâo kral klei Khua Yang čiăng, ñu pap brei kơ phung ayŏng leh anăn lŏ ngă klei jăk kơ jih jang mnuih hlăm sang. Ñu mtă kơ phung ayŏng brei ruăt wĭt drông ama ba hriê kơ čar Êjip mtam. Ñu srăng akâo kơ Pharaôn brei sa anôk dôk ƀơ̆ng huă leh anăn ñu pô yơh srăng čiêm rông găp djuê hlăm yan ư̆ êpa. Ñu mñă nanao ñu pap brei leh, leh anăn gĭr bi grăng dôk êđăp ênang hŏng phung ayŏng adei ñu (êlan 9-13).
Anei jing rup phung hlăm gŏ sang lŏ bi tuôm bi kdjăt ai êdimi ti krah ayŏng adei Y-Yôsep. Găn gao lu thŭn dôk kbưi, hŏng lu mta klei truh prŏng leh anăn klei knap mñai, diñu lŏ dưi bi tuôm hlăm klei hơ̆k mơak mbĭt hŏng êa ală. Klei bi mguôp hlăm gŏ sang dưi lŏ bi mrâo kyua hŏng ai tiê kăp pap brei leh anăn bi grăng mơ̆ng Y-Yôsep. Ênông ktrŏ klei soh hlăm ai tiê phung ayŏng dưi mă mđuĕ leh. Mmông anei, diñu bi kmiêk čŭm hdơ̆ng diñu, lŏ bi jum hlăm êa ală klei hơ̆k mơak (êlan 14). Mơ̆ng klei huĭ krưp tơl amâo truh blŭ (êlan 3), mmông anei phung ayŏng dưi blŭ hrăm hŏng adei diñu Y-Yôsep (êlan 15).
Khua ƀĭng kna Y-Pôl mtô: “Đăm bi wĭt klei jhat kơ klei jhat arăng ôh, ƀiădah mĭn bĕ klei jăk ti anăp jih jang mnuih. Tơdah dưi, gĭr bĕ, dôk êđăp ênang hŏng jih jang mnuih.” (Rôm 12:17-18). Hlăm klei hdĭp, drei amâo tlaih ôh tuôm hŏng lu mta klei arăng ngă jhat ƀai kơ drei. Lu mnuih đih mlam dôk bi mĭn kơ klei lŏ rŭ ênua. Ƀiădah Khua Yang amâo čiăng kơ drei mâo ai mĭn bi wĭt klei jhat kơ klei jhat arăng ôh, ƀiădah brei drei dôk hdĭp hŏng ai mĭn yuôm ti dlông, uêñ mĭn ngă klei jăk ti anăp jih jang mnuih. Čuăn ruah hdĭp pap brei srăng mă tŭ boh mnga klei êđăp ênang hdơ̆ng găp. Klei anei amâo ênưih ngă ôh, kyuanăn yơh Klei Aê Diê Blŭ mtô drei brei gĭr hŏng jih ai tiê. Khua Yang srăng brei klei pap kơ drei msĕ si Ñu brei leh klei pap kơ Y-Yôsep.
Si ngă drei kăp pap brei kơ mnuih ngă bi êka ai tiê drei leh anăn dôk hdĭp êđăp ênang hŏng diñu mơ̆?
Wah lač: Ơ Khua Yang, akâo Ih brei kơ kâo ai tiê jăk, bŏ hŏng klei thâo khăp leh anăn kăp bi pap brei hdơ̆ng hmei, čiăng kơ kâo dôk hdĭp êđăp ênang nanao hŏng jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 50-51
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
