Wah Lač Brei Kơ Pô Roh – 12/2/2022

1109

 

Klei Aê Diê Blŭ: Y‑Luk 6:27-28

Êlan kliăng: “Ƀiădah Kâo lač kơ diih phung dôk hmư̆, khăp bĕ kơ phung roh diih, ngă jăk bĕ kơ phung bi êmut kơ diih. Hơêč hmưi klei jăk jĭn bĕ kơ phung tăm pah kơ diih; wah lač brei bĕ kơ phung ngă jhat kơ diih.” (Y‑Luk 6:27-28).

Klei êmuh ksiêm mĭn: Ya klei Khua Yang Yêsu mtô kơ phung tui hlue Ñu brei lŏ wĭt ngă hŏng phung bi êmut kơ diñu? Si khuah hdĭp drei hŏng phung bi kdơ̆ng hŏng drei? Ya mta klei čiăng kơ diih bi mlih?

Sa čô nai mtô klei bhiăn čiăng hưn ktưn kơ ñu jing mnuih kpă ênô, snăn ñu êmuh Khua Yang Yêsu: “Hlei jing pô riêng gah kâo?” (Y‑Luk 10:29). Hŏng phung Israel ênuk anăn, “pô riêng gah” mblang jing msĕ si “phung Israel”, tơdah phung tue snăn amâo djŏ jing pô riêng gah ôh. Hŏng lu phung đăo hruê anei, “pô riêng gah” čiăng lač jing “phung Việt Nam”, amâodah “phung đăo”, ƀiădah Khua Yang brei thâo klei anăn amâo djŏ hŏng klei mĭn leh anăn knhuah hdĭp sa čô tui hlue Khua Yang ôh. Sa čô tui hlue Khua Yang Yêsu mâo klei mtô brei “Khăp bĕ kơ phung roh diih, ngă jăk bĕ kơ phung bi êmut kơ diih. Hơêč hmưi klei jăk jĭn bĕ kơ phung tăm pah kơ diih; wah lač brei bĕ kơ phung ngă jhat kơ diih”.

Klei Khua Yang mtă kơ drei brei thâo săng sa mta klei bhiăn ƀuh, klei anăn jing tơdah drei jing phung anak Aê Diê sĭt snăn mâo nanao yơh phung roh, mâo yơh phung tăm pah leh anăn mưč mač kơ drei. Jing phung đăo, drei đăm ôh tŭ klei knap leh anăn klei bi kdơ̆ng kyua klei dôk hdĭp soh wê leh anăn kyua klei drei ngă soh, ƀiădah brei drei tŭ klei knap kyua Krist (I Y‑Pêtrôs 4: 15-16). Lăn ala leh anăn phung jing dŏ ñu srăng bi êmut kơ drei, êlâo hĭn kyuadah drei amâo jing dŏ lăn ala ôh ƀiădah jing phung anak Aê Diê (Y‑Yôhan 15:19). Tal dua, kyua knhuah drei dôk hdĭp huĭ mpŭ kơ Khua Yang srăng jing msĕ si êruê knur kơ diñu leh anăn atăt diñu truh kơ klei bi êmut kơ drei (II Y‑Timôthê 3:12)

Wăt tơdah snăn dưn, mdê hŏng klei mĭn phung lăn ala bi wĭt klei jhat kơ klei jhat, Khua Yang Yêsu mtô drei brei “Khăp bĕ kơ phung roh diih”. Khăp kơ phung roh drei amâo djŏ ôh ư ai mbĭt hŏng diñu, lui hĕ amâo tĭng yap ôh klei ngă soh jhat, amâodah khăp čiăng kơ diñu, ƀiădah khăp kơ phung roh mblang jing hlăm klei dôk dơ̆ng ƀơ̆ng huă hŏng diñu brei msĕ si klei Aê Diê ngă leh hŏng drei. Ñu gĭr hŏng drei, pap brei klei soh, ngă ya klei jing jăk hĭn kơ drei, čiăng kơ drei mâo myun thâo kral klei soh drei leh anăn dôk hdĭp jăk klă hĭn, msĕ snăn mơh brei drei ngă hŏng “phung roh” drei. “Hơêč hmưi klei jăk jĭn bĕ kơ phung tăm pah kơ diih” čiăng lač hmăng hmưi klei jăk hĭn Aê Diê kơ diñu, leh anăn “wah lač brei bĕ kơ phung ngă jhat kơ diih” čiăng lač akâo kơ Khua Yang bi êdah klei pap brei kơ diñu.

Si ngă čiăng dưi wah lač brei kơ phung roh drei, phung bi kdơ̆ng hŏng drei amâo mâo boh klei ôh, phung bi êka ai tiê drei? Drei amâo srăng dưi ngă klei anei ôh tơdah wơr bĭt hĕ drei pô ăt jing mnuih soh mơh, drei mâo klei bi mtlaih kyua Aê Diê pap brei. Drei amâo srăng dưi ngă klei anei ôh tơdah ngă tui si ai tiê čiăng ƀiădah amâo hdĭp hŏng klei đăo ôh leh anăn gĭr ngă ya klei ƀuăn rơ̆ng leh hŏng Khua Yang.

Si ngă drei khăp mơ̆ kơ phung roh drei leh anăn wah lač mơ̆ kơ mnuih tăm pah kơ drei?

Wah lač: Ơ Khua Yang, bi mni lač jăk kơ Ih khăp leh kơ kâo hŏng klei Ih gĭr leh anăn klei pap prŏng yuôm bhăn Ih pioh kơ kâo. Brei kơ kâo klei khăp čiăng kơ kâo dưi khăp leh anăn wah lač brei kơ phung bi êmut kơ kâo kyua Anăn Ih.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: II Klei Yăl Dliê 20:31 – 21:20

Kênh Youtube BHKTHN:

https://www.youtube.com/c/bhkthn

Bài trướcThov Vajtswv Pab Yeebncuab – 12/2/2022
Bài tiếp theoCầu Nguyện Cho Kẻ Thù – 12/2/2022