II Xwmtxheej Vajntxwv 29:12-19
Nqe cim:
“Cov Levis no hu lawv cov kwvtij tuaj ua ke ua kevcai ntxuav kom lawv huv. Ces vajntxwv kom lawv ua kevcai ntxuav lub Tuamtsev kom huv raws tus Tswv hais.” (II Xwmtxheej Vajntxwv 29:15)
Lus nug rau sawvdaws xav:
– Tomqab uas hnov Vajntxwv Hexekiyas nqua hu, ces cov neeg Levis ua dabtsi?
– Vim li cas lawv ua raws li vajntxwv samhwm?
– Peb cheemtsum tso tawm tej yam dabtsi hauv yus lub neej mus?
Tomqab uas hnov Vajntxwv Hexekiyas nqua hu kom tu lawv tus kheej dawbhuv thiab ua kevcai ntxuav tus Tswv lub Tuamtsev, ces cov neeg Levis zoo siab hlo ua raws li, lawv xaiv kaum plaub tus los nres ua cov haujlwm ntawd. Cov thawjcoj no ua li vajntxwv hais, thiab ua raws li tus Tswv tej lus tau hais los lawm, lawv koom siab ua ke, tu lawv tus kheej kom dawbhuv los ntawm rooj kevcai ntxuav. Tomqab ntawd lawv pib mus ua kevcai ntxuav lub Tuamtsev. Cov povthawj mus rau hauv lub Tuamtsev ua kevcai ntxuav, rau qhov tsuas yog lawv thiaj tau cai mus rau hauv xwb. Cov neeg Levis muab tej mlom coj mus pov rau hauv lub Hav Kiloos, qhov chaw uas lawv hlawv tej mlom (II Xwmtxheej Vajntxwv 15:16).
Lub sijhawm yim hnub ua ntej, lawv pib tu sab nraud mus zus rau sab hauv, yim hnub yim mus ze qhov chaw dawbhuv. Lawv tu sab nraum tej tshav puam, tomqab ntawd mus zus rau ntawm tej qab khav thiab sab hauv lub Tuamtsev. Rooj kevcai ntxuav lub Tuamtsev no ua tau kaum rau hnub, qhov no qhia paub hais tias, tiam uas Vajntxwv Ahas kav nws ua rau lub Tuamtsev qias heev. Thaum ua tes haujlwm no tas, lawv mus qhia rau vajntxwv paub. Thib ib, lawv qhia hais lawv twb ua kevcai ntxuav tej cuabyeej siv hauv lub Tuamtsev tiav lawm. Thib ob, lawv twb teeb kho tej cuabyeej siv hauv lub Tuamtsev uas thaum Vajntxwv Ahas muab povtseg lawm rov qab rau tas lawm (II Xwmtxheej Vajntxwv 28:24).
Vajntxwv Hexekiyas tes haujlwm ua kevcai ntxuav lub Tuamtsev ua rau peb xav txog cov ntseeg Yexus kuj yog tus Tswv cov povthawj (Tshwmsim 5:9-10), peb kuj yuav tsum tso yus tej kev txhaum thiab tu yus lub neej kom dawbhuv tsis ua kev phem kev qias, pemlom zoo li ntiajteb ua. Thaum txais yuav Tswv Yexus, peb twb tau tus Tswv cov ntshav ntxuav dawbhuv, tiamsis hauv kev ua neej tseem pheej ua txhaum, yog li ntawd Timthawj Paulus nqua hu peb hais tias, “peb yuav tsum tso plhuav tej kev txhaum uas peb ua thiab peb xav huv tibsi tseg.” (II Kauleethaus 7:1). Paulus kuj nqua hu peb muab tej mlom, tej kev chim siab, npautaws thiab txhua yam phem hauv yus lub neej tso tseg (Efexus 4:31). Muaj tej yam kev phem qias nyob ntev hauv lub siab thiab kev ua neej peb yuav tsum tau thov Vajtswv pab daws. Tsis txhob xav hais tias kev npautaws, chim siab twjywm hauv lub siab tsis ua cas, tsis tas tso tseg, cia li txiav txim siab tso plhuav tawm hauv lub neej mus, rau qhov tus Tswv Txojlus xav kom peb ua li ntawd. Thiab qhov tseemceeb ntxiv yog tej kev phem kev qias ua hiam peb txojkev sib raug zoo nrog Tswv Yexus, tus uas tuag txhiv peb.
Thov Vajtswv,
Tus Tswv, thov Koj qhia kom nyuam yaus zeem paub tej yam kev qias nyob hauv nyuam yaus lub siab thiab kev ua neej. Thov Koj zam txim rau nyuam yaus thiab ntxuav kom nyuam yaus muaj lub neej dawbhuv muaj nqis pub rau Koj. Nyuam yaus tuav Tswv Yexus lub npe thov, Amees.
Peb tseem tshuav tej kev phem qias, tej mlom twg nyob hauv lub neej tsis tau muab tso tseg, tsis tau muab hlawv povtseg?
Nyeem Vajluskub hauv peb lub xyoo: I Xamuyees 14
Kênh Youtube BHKTHN:
