Mathiơ 19:10-12
“Rim ‘nu kơ bơ̆n athei pơm kiơ̆ gô mơ̆ng kơ ‘Bok Kei-Dei asong. Sơ̆ ‘Bok Kei-Dei krao bơ̆n lui kơ Sư kơplah bơ̆n oei pơm đĭch đe dah bơngai rơngei dah bơngai thoi yơ, bơ̆n athei kiơ̆ tơdrong ‘noh đĕch. Inh bơtho tơ rim hnam akŭm thoi noh ngăl.” (I Kôrintô 7:17)
Nơ̆r jet tơchĕng pơwao:
– Đơ̆ng rŏng kơ mơ̆ng kơtơ̆ng nơ̆r Kră Yang Yêsu bơtho gah ŭnh-om lu bơngai pơhrăm păng Sư apinh Kră Yang tơdrong kiơ? Yua kơ liơ?
– Kră Yang Sư tơl thoi yơ?
– Lu bơ̆n pơhrăm iŏk tơdrong kiơ gah tơdrong ngôi Hơdrô̆ ưh kơ iŏk ŭnh-om?
Đang kơ mơ̆ng kơtơ̆ng nơ̆r Kră Yang Yêsu bơtho gah tơdrong ŭnh-om, lu bơngai pơhrăm kiơ̆ Sư
khan kơ Sư thoi âu: “Bơ̆n băt kơ achăng akăn ưh kơ gơh, dah lê̆ kơ iŏk akăn đĕch ‘lơ̆ng hloh”. (tr.10)
Lu bơngai pơhrăm kiơ̆ Sư âu tŏk-bŏk oei arih lăm pơlei pơla anih mă đei lơ klo-kăn achăng dih băl mă-lei ưh kơ đei bu jô̆ tơdrong noh yoch. Lu sư ‘bôh anat dêh tơdah pôm tơdrong yoch kơđang kơ̆l ako đĕch gơh achăng băl, na mưh yoch nai đĕch ưh kơ gơh achăng,kơlih kơ thoi noh na lu sư pơma mưh khan ăp mă yoch kơđang kơ̆l ako ‘mơ̆i na gơh achăng băl, lei jah lê̆ kơ iŏk ŭnh-om, ngôi hơdrô̆ đĕch ‘lơ̆ng hloh. Bơ̆n hlôh tơdrong ‘nâu hei thoi âu, lu bơngai pơhrăm kiơ̆ Kră Yang ei hli kơ lu sư ưh kơ kĕ wei nơ̆r pơkă lăm tơdrong iŏk ŭnh-om noh, wă khan lu sư hli kơdih lu sư pơm yoch kơđang kơ̆l ako. Nơ̆r Kră Yang tơl tơwih kơ lu sư tơ’bôh tơdrong ngôi hơdrô̆ ưh kơ iŏk ŭnh-om ‘nei ưh kơ đơ̆ng lu sư wă dah gơh pơm ôh, Kră Yang khan thoi âu: “Đĭ-đăng bơngai ngôi hơdrô̆ kư̆m ưh kơ trŏ ôh. Tơdrong noh gô mơ̆ng kơ ‘Bok Ke i-Dei đĕch”. (tr.11) Kră Yang Yêsu dan pêng tơdrong ‘bơm kơ pêng khul bơngai.Mă mĭnh,đei lu mơ’nah, yua kơ tơdrong kiơ ei pơm kơ sư kơđo đơ̆ng nge na ưh kơ băt gah tơdrong drŏ-nglo drŏ-kăn kăl kơ tơngôi thoi yơ. Đei lu mơ’nah, drơ̆ng ăn đe pơtôch lê̆ tơdrong sư gơh pơjing hơ’lơ̆p noh yua kơ sư kơnhăm wă pơm kiơ ei, na sư dan tơdrong ‘nei kăl hloh kơ tơdrong ‘maih wă đei hnam dơnŏ. Mă pêng, đei lu bơngai mơ’nah dơ̆ng, yua kơ tơdrong Dêh char’Bok Kei-Dei pơgơ̆r, Kră Yang Yêsu tŏk-bŏk pơma ‘bơm kơ tơdrong ‘Bok Kei-Dei mơnat, ăn kơ sư kĕ ngôi hơdrô̆ ưh kơ iŏk ŭnh-om, sư lăp đon arih thoi noh wă awih awăn bơ̆ jang kơ ‘Bok Kei-Dei. Kră Yang Yêsu wă kơ lu bơngai pơhrăm kiơ̆ Sư ei hlôh trŏ gah tơdrong ngôi hơdrô̆ ưh kơ iŏk ŭnh-om noh wă kơ lu sư ling-lang kơ tơchĕng hơlen ‘mơ̆i ưh kơ hăt hot ôh mă wă pơma kiơ dah pơm kiơ wă huay kơ glăi.
Bơ̆n lăng kon pơlei pơla tơring tơrang dang ei, tơdrong ŭnh-om kăl kơ pơm kiơ̆ thoi nơ̆r Kră Yang bơtho, hơgăt dan na gơh hiôk ‘lơ̆ng, mălei kon pơlei pơla tơring tơrang bơ̆n dang ei, dôm nơ̆r Kră Yang bơtho gah tơdrong ŭnh-om wă kơ ‘lơ̆ng noh kon pơlei pơla bơ̆n lăng hơi, lăng ưh kơ gĭt, kư̆m lơ lu bơngai lui đei tơdrong tơchĕng hơi gah tơdrong iŏk ŭnh-om. Hlabơar Blŭng a 2:18, Kră Yang bơtho thoi âu: “Kon bơngai oei mĭnh ‘nu mĭnh drô̆ ưh kơ ‘lơ̆ng ôh…”, păng ‘bok Pôl kư̆m bơtho khan kơ lu bơngai lui: “Mă-lei hli kơ iĕm ưh kơ kĕ gơ̆t kơ tơdrong pơm yoch na iĕm athei oei băl klo-kăn đĕch ‘lơ̆ng hloh kơ iĕm oei hơdrô̆.” (I Kôrintô 7:9). Bơ̆n athei kơnăl tơpă kơ bơ̆n kơdih ‘Bok Kei-Dei mơnat, ăn kơ bơ̆n gơh oei hơdrô̆ dah ưh kơ gơh oei hơdrô̆. Tơdah yua kơ arih lăm pơlei pơla anat anot thoi yơ, dah mă kơdih bơ̆n hiong tơdrong hơmĕng kiơ, dah yua kơ đơ̆ng bơngai bu ‘nei pơm kơ bơ̆n kơdih tơchĕng khan bơ̆n ưh kơ kĕ kơ đei tơdrong ‘mêm tơpă, ưh kơ kĕ đei hnam dơnŏ hiôk rơnŭk,… mưh yua kơ thoi ‘nei đĕch lei krê hơmơt dêh tơdrong bơ̆n oei pơm noh bơ̆n lăng tơdrong ‘mêm, tơdrong ŭnh-om đơ̆ng Kră Yang ăn noh hơi-hŏ đĕch.Tơdah Kră Yang wă kơ bơ̆n arih hơdrô̆ kơplah dang ei’nâu, wă đei tơdrong ‘mêm tôm mah tơ anăp ning-mônh lei athei chu pơm kiơ̆ thoi Kră Yang wă.
Bơ̆n hăm băt kơnăl ưh tơdrong Kră Yang wă lăm tơdrong ‘mêm, tơdrong ŭnh-om bơ̆n?
Kơkuh kơ Ih Kră Yang,apĭnh Ih tơgŭm ĭnh băt kơnăl kơ tơdrong Ih wă lăm tôm tơdrong, tơproh hiôk dah anat anot đơ̆ng Ih ăn truh noh. Apĭnh Ih tơgŭm inh chu kiơ̆ kơ Ih wă lăm tơdrong oei hơdrô̆ dah kăl kơ iŏk ŭnh-om. Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 15.
Kênh Youtube BHKTHN:
