Yakơ 1:22-25
Trong tơm: “Păng bơ̆n ‘nĕ kơ mơ̆ng lăm đon đĕch, khan ‘Bok Kei-Dei kư̆m iŏk. Ưh ôh, bơ̆n mơ̆ng păng pơm kiơ̆ hloi dôm tơdrong đe bơtho, noh na ‘Bok Kei-Dei iŏk.” (Yakơ 1:22)
Nơ̆r jet tơchĕng pơwao:
– ‘Bok Yakơ pơma tơdrong kiơ gah lu bơngai mă lăp mơ̆ng Nơ̆r Kră Yang đĕch khan tôm mah bơih?
– Tơdrong phara thoi yơ kơ lu bơngai mơ̆ng đĕch păng lu bơngai mă mơ̆ng păng pơm kiơ̆ hloi?
– Năr ‘nâu lu bơ̆n gô pơm kiơ̆ Nơ̆r Kră Yang thoi yơ?
Lơ bơngai pơma pơpôi pơtôm tơdrong bơtho lăm kơthơ Yakơ hăm 4 tŏ chư: “Chu Nơ̆r Kră Yang” păng lơ bơngai hơgei hơlen Sơ̆p hla bơar ‘Bok Kei-Dei, kư̆m rơih iŏk lăm Yakơ 1:22 jơ̆ tơdrong kăl tơm lăm kơthơ âu. Lăm chăl Sơ̆p Hla bơar ‘Bok Kei-Dei năr âu, ‘bok Yakơ bơtho lu bơngai mă mơ̆ng sư. “Bơ̆n mơ̆ng păng pơm kiơ̆ hloi dôm tơdrong đe bơtho na ‘Bok Kei-Dei iŏk”. Hăm ‘bok Yakơ, minh ‘nu bơngai wei lăng tơm lăm Hnam akŭm blŭng a, minh ‘nu bơngai lăp mơ̆ng nơ̆r Kră Yang đĕch mă-lei ưh kơ pơm kiơ̆, khan huay bơih, ‘noh lu bơngai mă hơlĕnh kơdih. Đei bơngai pơma thoi âu: “Lŭch dêh tơpă kơplah bơ̆n hơlĕnh, mă-lei hơlĕnh bơ̆n kơdih ‘noh lŭch hloh, na lu bơngai mă hơlĕnh kơdih gah bơhngol ‘noh mă kơnê̆ dêh”. Lu bơngai thoi noh gô tơ’bơ̆p lăm tơdrong arih mă krưp dêh, yua kơ đơ̆ng Kră Yang Yêsu đei khan bơih. “Ưh kơ sĭ dôm lu bơngai mă krao inh Kră Yang gơh mơ̆t tơ dêh char ‘Bok Kei-Dei pơđĭ ôh, pôm lu bơngai bu kiơ̆ kơ ‘Bă Inh đĕch gơh mơ̆t tơ dêh char Sư noh”. (Mathiơ 7:21). Đon lui mă ưh kơ pơm kiơ̆ noh đon lui ưh kơ tơpă ôh, hơlĕnh đĕch.
Wă kơ tơ’bôh mă hơđăl gah tơdrong phara băl lăm bơngai mă mơ̆ng đĕch păng bơngai mơ̆ng păng pơm kiơ̆ hloi Nơ̆r Kră Yang, ‘bok Yakơ yua rup lăng muh măt lăm kơmĭl wă ‘bôh muh măt bơ̆n kơdih. Kơmĭl tơgŭm pơdah ‘bôh muh măt bơ̆n kơdih thoi yơ wă hơmet ming mă ‘lơ̆ng, trŏ. Nơ̆r Kră Yang kơmĭl hơdah ‘lơ̆ng wă pơdah tơ’bôh chăl arih rim ‘nu. Tơdah mơ̆ng đĕch mă ưh kơ pơm kiơ̆, thoi bơngai lăng muh măt lăm kơmĭl lăng đĕch mă weh tơnai ưh kơ wă lăng hơlen wă kơ ‘bôh muh măt hloi. Tơplơ̆ dơ̆ng, lu bơngai mơ̆ng Nơ̆r Kră Yang păng pơm kiơ̆ hloi noh lu bơngai lăng muh măt lăm kơmĭl ‘bôh sư kơdih na hơmet sư kơdih kiơ̆ thoi Nơ̆r Kră Yang bơtho tơ’bôh. Lu bơngai thoi noh, tơpă sư mơn kơdih đei tơdrong mơsêh pran kơtang tơplih lăm chăl arih sư kiơ̆ thoi Nơ̆r Kră Yang păng tơdrong lui wơ̆ pran rim năr wă kơ jing thoi Kră Yang hloh dơ̆ng.
Đei lơ bơngai mơ̆t tơ lăm Khul bơngai lui, lăp akŭm năr tơpơh đĕch mơ̆ng Nơ̆r Kră Yang wă chă hiôk hơđơ̆ng, đơ̆ng rŏng kơ ‘noh mưh gleh lap, lăp akŭm thoi noh huay bơih. Lu sư ‘maih mơ̆ng tơdrong hiôk lăp đon lăm Nơ̆r Kră Yang păng ưh kơ wă mơ̆ng lu Nơ̆r Kră Yang bơtho pơjĭ, bơtho tơ’bôh tơdrong yoch. Thoi noh, chăl arih lu bơngai ‘noh, ưh kơ phara kiơ thoi lu bơngai lui đunh bơih ră. Tơpă sư, lu sư oei lăm tơdrong hli krê gah bơhngol, yua kơ hơlĕnh kơdih gah bơhngol. Athei ‘blŏk, đei đon lui tơpă gô ‘bôh đei yua. Hơpơi rim ‘nu lu bơ̆n kơplah bơ̆n pơhrăm ‘bai ‘nâu. Ưh kơ dơ̆ng minh dơnơ̆ng ôh kơ tơdrong mơ̆ng Nơ̆r Kră Yang, mă-lei athei pơm kiơ̆ hloi dôm Nơ̆r Kră Yang. Wă kơ Nơ̆r Kră Yang tơplih lăm chăl arih bơ̆n lăm rim năr.
Lu bơ̆n apinh Kră Yang tơgŭm bơ̆n pơm kiơ̆ tơdrong đơ̆ng lăm ‘bai pơhrăm âu?
Ơ Kră Yang, bơnê kơ Ih đei ăn Nơ̆r Ih thoi tơmam sa gah bơhngol ăn kơ inh. Tơgŭm inh băt kơ Ih, wă kơ jing thoi Ih rai hloh. Apinh Ih tơgŭm inh ‘nĕ kơ mơ̆ng đĕch, mă-lei wă kơ oei kơjăp tơchĕng hlôh Nơ̆r Kră Yang păng gơnang kơ Ih wă kơ pơm kiơ̆ dôm Nơ̆r Ih đei bơtho tơ’bôh. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samel 18
Kênh Youtube BHKTHN:
