Klei Aê Diê Blŭ: Y-Yôsuê 5:2-8
Êlan kliăng: “Brei diih thâo kơ Yêhôwa jing Aê Diê. Ñu yơh mjing drei leh, drei jing dŏ Ñu; drei jing phung ƀuôn sang Ñu, phung biăp hlăm kdrăn rơ̆k Ñu.” (Klei Mmuñ Hđăp 100:3)
Klei êmuh ksiêm mĭn: Ya klei Aê Diê mtă kơ Y-Yôsuê brei ngă? Ya ngă? Si mblang jing phung ƀuôn sang Aê Diê? Ya klei anei đru drei êjai hdĭp klei hdĭp đăo ti krah lăn ala?
Aê Diê mtă kơ Y-Yôsuê brei ngă klei khăt klĭt kơ phung ƀuôn sang, kyuadah ktuê jih 40 thŭn hlăm kdrăn tač, gưl ênuk phung hđeh mrâo anei amâo djă pioh klei khăt klĭt ôh (êlan 3-7). Klei bhiăn khăt klĭt Aê Diê mkŏ mjing jing klei bi knăl kơ klei Aê Diê bi mguôp ngă leh hŏng Y-Abraham leh anăn djuê ana ñu (Klei Mphŭn Dơ̆ng 17:9-14), mbĭt hŏng anăn hưn klă Israel jing phung ƀuôn sang Ñu.
Phung ƀuôn sang Aê Diê jing dŏ Aê Diê. Bruă ngă klăt klĭt čiăng lač kơ klei soh čuê ba dơ̆ng mơ̆ng Y-Ađam truh kơ djuê ana anak mnuih brei khăt lui hĕ. Israel jing phung ƀuôn sang klei bi mguôp, amâo lŏ bi gun hŏng djuê ana “hđăp” mơ̆ng Y-Ađam ôh, ƀiădah jing djuê ana klei bhiăn Aê Diê, amâo knŏng bi mlih kdrăp ti êngao ƀiădah wăt hlăm knhuah hdĭp lui klei soh (Klei Mtô Mñă Klei Bhiăn 10:16; Y-Yêrêmi 4:4). Hdơr bĕ, drei jing dŏ Aê Diê, anei jing sa klei pap Aê Diê brei knŏng hŏng klei pap Ñu. Drei amâo srăng hdĭp, kkuh mpŭ, mă bruă kơ Khua Yang djŏ ôh tơl kơ drei thâo săng êlam klei sĭt nik anei (I Y-Pêtrôs 2:9-10).
Phung ƀuôn sang Aê Diê brei gưt asăp kơ Aê Diê. Bruă ngă khăt klĭt kơ phung ƀuôn sang Israel hlăm ênuk Klei Bi Mguôp Hđăp jing yuôm snăk kyuadah amâo djŏ knŏng pioh bi knăl pô anăn jing dŏ Aê Diê, ƀiădah wăt bi knăl klei sa čô mnuih ƀuăn rơ̆ng kơ klei bi mguôp hŏng Aê Diê čiăng hdĭp tui si klei bhiăn Ñu. Anei jing klei bhiăn khăt klĭt “tal dua kơ phung ƀuôn sang Israel” (êlan 2). Gưl tal sa jing ênuk phung kbiă mơ̆ng čar Êjip ƀiădah djiê leh hlăm kdrăn tač kyua “ diñu amâo gưt asăp Yêhôwa ôh” (êlan 6). Tinei, tơdah ngă klei khăt klĭt, Aê Diê čiăng mñă kơ diñu snei phung ƀuôn sang Aê Diê brei gưt asăp kơ Aê Diê. Klei khăt klĭt knŏng mâo ênoh yuôm, tơdah bruă ngă ti êngao anăn pioh bi êdah ai tiê đup gưt leh anăn hdĭp tui si klei bi mguôp ngă leh hŏng Aê Diê.
Phung ƀuôn sang Aê Diê brei đăo knang kơ Aê Diê. Êlâo kơ ksŭng nao bi blah ƀuôn prŏng Yêrikô, Aê Diê mtă brei ngă klei khăt klĭt, tui si klei mĭn mnuih jing sa bruă ngă huĭ hyưt êdimi, kyuadah phung ƀuôn sang Aê Diê ăt čiăng mâo hruê mmông tơl dưi hlao (êlan 8). Ƀiădah lĕ, klei Aê Diê čiăng mtô phung ƀuôn sang Ñu jing, brei đăo knang kơ Ñu. Akŏ phŭn klei ktang drei jing Aê Diê yơh, klei đăo jing mnơ̆ng yua pioh atăt ba (Hêbrơ 11:6), leh anăn ai tiê đăo knang kơ Aê Diê bi êdah hŏng klei gưt ngă klei Aê Diê čiăng kluôm ênŭm.
Ktuê knhuang êlan wĭt kơ Čar Aê Diê Ƀuăn klei hdĭp mngăt, drei srăng tuôm hŏng lu klei lông dlăng mơ̆ng ƀuôn sang. Tơdah hdơr drei jing phung ƀuôn sang Aê Diê leh anăn čuăn hdĭp djŏ hŏng anôk bruă Aê Diê brei, drei srăng mâo klei ktang dưi găn gao klei lông dlăng čiăng dưi hdĭp klei hdĭp đăo ti krah lăn ala.
Si drei khăng mgaih mkra tơdah tuôm hŏng klei lông dlăng mơ̆ng ƀuôn sang? Êlan hdră drei mgaih mkra klei dleh dlan hlăm klei hdĭp djŏ tui si Klei Aê Diê Blŭ mơ̆?
Wah lač: Ơ Khua Yang, bi mni kơ Khua Yang bi mtlaih leh kâo leh anăn brei kâo jing ƀuôn sang Ih. Brei kâo hdĭp djŏ hŏng anôk bruă jing phung ƀuôn sang Aê Diê, wăt tơdah tlă anăp hŏng ya mta klei lông dlăng dưn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
