I Pêtrôs 2:11-12
“Bơ̆n athei oei sa pơm mă ‘lơ̆ng ‘bơ̆t anăp lu bơngai ưh kơ lui, na lu bơngai mă jô̆ kơ bơ̆n khan bơngai kơnê̆ sư kơnăl kơ bơ̆n bơngai ‘lơ̆ng, noh na sư gô ư-ang kơ ‘Bok Kei-Dei kơplah năr ‘Bok Kei-Dei tơbăt kơ đon sư.” (I Pêtrôs 2:12)
Nơ̆r jet tơchĕng pơwao:
– Yua kơ kiơ bơngai lui athei pơgơ̆t dôm tơdrong sĕch akar ‘maih wă?
– Đơ̆ng tơdrong kiơ lu bơngai pơjăm bơ̆n bơngai lui mă lu sư jing ưang kơ Kră Yang?
– Tơdrong hơpơi lu bơ̆n kơplah arih tơ ala teh âu ‘noh kiơ?
‘Bok Pôl tơ’blŏk kơ kon pơlei Kră Yang gah tơdrong arih pơm ‘lơ̆ng đơ̆ng noh đe ‘bôh bơ̆n pơm ‘lơ̆ng na đei lơ bơngai năm tơ Kră Yang. Hơdrol hloh, sư tơ’blŏk “bơ̆n bơngai lui oei tơ ala teh âu dang ei, lu bơ̆n thoi bơngai tơmoi đĕch, teh đak âu teh đak đe, ưh kơ trŏ kơ teh đak bơ̆n ôh” (trong 11). Bơngai lui arih tơ ala teh âu jơ̆ kon pơle oei lăm minh pôm teh đak, mălei bơ̆n jơ̆ kon pơlei wă oei tơ plĕnh ti. Dang ei mă oei arih sa tơyơ, bơ̆n kư̆m thoi bơngai tơmoi đĕch, ưh kơ trŏ bơ̆n oei lăm teh đak âu khŏm khŏm ôh. Bơ̆n athei pơm keh tơdrong jang bơ̆n kon pơlei, arih jang sa mă lei ưh kơ pơtăm pơdơ̆ng tơdrong arih bơ̆n tơ teh đak âu hloi ôh. Dang ei bơ̆n oei tơ ala teh âu mălei bơ̆n ưh kơ gah khul bơngai ala teh. Athei pơgơ̆t wă khan sơngah weh ataih đơ̆ng dôm tơdrong sĕch akar ‘maih wă, ‘noh jơ̆ dôm tơdrong ‘maih wă pơm yoch, ‘maih pơtuah akâu kơdih kuă ăn kiơ̆ tơdrong ‘Bok Kei-Dei. Dôm tơdrong pơm kiơ̆ kơ sĕch akar athei weh ‘noh jơ̆ “Ngôi pơyô kư̆kă, ưh kơ gơh wei jơ̆ng ti kơdih, oei kơkuh kơ yang so, pơm pơjâu chă sol đe; kơnam băl tơdrong tôn teh băl, tơgar băl, hil kơ đe, kret, kuă kơ jang hơdai đe, wă tơklah kiơ̆ tơdrong kơdih, ‘nhĕng kơ đe, suai sik pơm kư̆kă, pơm lơ tơdrong kơnê̆, lơ tơdrong noh nai dơ̆ng” (Galati 5:19-21).
Sơ̆ kư̆m thoi dang ei, bơngai ưh kơ lui jô̆ kơ bơ̆n khan bơngai kơnê̆. “Bơnga ưh kơ lui” wă khan lu bơngai ưh kơ đei tơ’bưh hăm Kră Yang ‘Bok Kei-Dei. Tơdrong mă ‘lơ̆ng hloh ‘noh jơ̆ kon pơlei Kră Yang athei tơ’bôh kơ bơngai ưh kơ lui tơdrong arih bơ̆n tơplih ‘nao na Sư kơnăl kơ bơ̆n bơngai ‘lơ̆ng. Jơhngơ̆m kon bơngai bơ̆n mưh đe pơjăm bơ̆n, jơhngơ̆m bơ̆n ưh kơ hiôk, mălei Kră Yang Yêsu bơtho bơ̆n athei lăng tơdrong noh jơ̆ tơdrong hmă đĕch: “Dah bơngai ala teh âu hil areh kơ iĕm, iĕm kư̆m băt mơ̆n lu sư hil noh, lu sư hil areh kơ Inh mă adrol. Dah iĕm khul bơngai ala teh âu, lei tơduă iĕm ala teh âu ‘mêm mơnat dih băl. Mălei Inh rơih iŏk iĕm đơ̆ng khul ala teh âu, na lu sư lăng iĕm ưh kơdih bôl, kơlih kơ thoi noh na lu sư hil areh kơ iĕm” (Yôhan 15:18-19). Mưh bơ̆n pơm ‘lơ̆ng ‘bơ̆t anăp lu bơngai pơjăm bơ̆n, lăm jơ năr lu sư gô ‘bôh tơdrong bơ̆n pơm ‘lơ̆ng, păng kơplah năr ‘Bok Kei-Dei tơbăt kơ đon sư, lu sư gô tơchĕng ming păng ưang kơ ‘Bok Kei-Dei jơ̆ Tơ’ngla mă bơ̆n kơkuh.
Đei bơngai khan tơdrong arih bơngai lui jơ̆ kơtul kơplah “sŏng sa tơ ala teh, pơma dơnuh tơdrong kơpal plĕnh” Mălei bơ̆n jơ̆ kon pơlei ‘lơ̆ng rơgoh, kon pơlei gah ‘Bok Kei-Dei, bơ̆n arih lăm teh đak âu kơđeh đĕch, tơdrong mă kăl noh athei arih mă ‘lơ̆ng wă kơ lơ bơngai ‘bôh păng băt kơ Kră Yang. Hơpơi năr tôch kơnh gô đei lơ bơngai hơdai hăm bơ̆n pơgơ̆p băl tơ dêh char Kră Yang ling lang. ‘Noh bơih pơlei bơ̆n tơpă.
Ơ Kră Yang ‘mêm mơnat, bơnê kơ Kră Yang dŏng pơklaih inh, ăn kơ inh jing kon pơlei pơla Ih. Apinh Ih tơgŭm inh ling lang arih pơm kơ Ih lăp đon, oei sa mă ‘lơ̆ng ‘bơ̆t anăp bơngai ưh kơ lui wă kơ lơ bơngai ‘bôh păng lu sư gô ưang kơ Kră Yang. Yua anăn Kră Yang Yêsu Krist, Amen.
Bơ̆n tơ’bôh tơdrong arih pơm ‘lơ̆ng ‘bơ̆t anăp lu bơngai ưh kơ lui thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 34
Kênh Youtube BHKTHN:
