I Kauleethaus 1:1-3
Nqe cim:
“Xa tuaj rau cov ntseeg Vajtswv uas nyob hauv lub nroog Kauleethaus, txhua tus uas Vajtswv hu los ua Vajtswv haivneeg thiab tej neeg uas nyob txhua qhov chaw uas pehawm peb tus Tswv Yexus Khetos uas yog lawv thiab peb tus Tswv, kom tau nrog Yexus Khetos kom ib txojsia. (I Kauleethaus 1:2)
Lus nug rau sawvdaws xav:
– Timthawj Paulus qhia li cas txog tus uas sau tsab ntawv no?
– Nws hais txog lwm tus lub npe nrog nplooj siab thiab tus cwjpwm zoo li cas?
– Kev lees paub txog lwm tus txiajntsig tseemceeb licas?
Siv tej lus hais noj qab nyob zoo ntawm ib tsab ntawv uas sawvdaws swm, Timthawj Paulus pib tsab ntawv I Kauleethaus los ntawm kev piav qhia txog tus uas sau tsab ntawv thiab tus uas txais tsab ntawv. Peb nqe Vajluskub thawj qhia peb paub txog qhov uas Timthawj Paulus saib taus txiajntsig ntawm lwm tus.
Qhov xubthawj, nyob hauv kab lus qhia txog tus uas sau tsab ntawv, tsis yog tsuas hais txog Timthawj Paulus lub npe xwb, tiamsis tseem hais txog Xauthenes uas yog “peb tus kwvtij” nrog sau tsab ntawv no (nqe 1). Qhov uas nws hais txog Xauthenes qhia tau hais tias Timthawj Paulus tsis muaj tus cwjpwm hais tias nws yog tus tseemceeb, lwm tus tsuas yog tus txhab ntxiv tsis tsimnyog hais npe. Tiamsis, nws yeej ib txwm saib taus cov uas ua haujlwm nrog nws, suav lawv ua “kwvtij”, sib luag zos thiab sib pab.
Qhov ob, hais txog cov uas txais tsab ntawv, nws sau “xa tuaj rau cov ntseeg Vajtswv uas nyob hauv lub nroog Kauleethaus” thiab “txhua tus uas Vajtswv hu los ua Vajtswv haivneeg” (nqe 2). Qhov laj thawj uas nws sau tsab ntawv no tsis yog vim Pawg Ntseeg Kauleethaus zoo lawm, tsimnyog khav theeb lawm, tiamsis yog vim lawv tabtom ntsib ntau yam teebmeem hauv kev coj ua lub neej thiab kev pehawm. Txawm yog lawv nyob rau hauv txojkev zoo li ntawd, los nws tseem xav txog thiab sau rau lawv tej lo lus uas saib taus tshajplaws. Nws paub meej tias lawv yeej tseem yog “Vajtswv haivneeg”, tsis yog vim lawv tus kheej, tiamsis yog vim Tswv Yexus cov ntshav.
Cov neeg txuas ntxiv uas Timthawj Paulus sau tsab ntawv xa mus rau yog “tej neeg uas nyob txhua qhov chaw uas pehawm peb tus Tswv Yexus Khetos uas yog lawv thiab peb tus Tswv” (nqe 2). Hais raws lwm seem, tsab ntawv no tsis yog sau rau Pawg Ntseeg Kauleethaus uas nws tsim tsa nkaus xwb. Nws sau tsab ntawv no los qhia, cem thiab qhuab ntuas txhua tus uas tuav peb tus Tswv Yexus Khetos lub npe, yog cov ntseeg Vajtswv uas Vajluskub qhia txog, yog tus uas txib Yexus Khetos los rau hauv ntiajteb tuag theej tibneeg tej kev txhaum. Nyob hauv Timthawj Paulus txojkev pom, Vajtswv Pawg Ntseeg tsis yog tsuas hais txog cov uas ua raws nws tej lus qhia txog kev pehawm xwb, tiamsis tseem yog ib pab pawg loj uas muaj tib txojkev ntseeg Tswv Yexus, txawm muaj kev txawv txav txog kev tswjfwm thiab kev pehawm.
Nyob hauv kev ua Vajtswv haujlwm, peb tsis yog ib leeg ua xwb, tiamsis peb koom ua ke nrog lwm tus. Txawm peb txhua tus muaj tes haujlwm sib txawv losxij, tiamsis peb txhua tus yeej yog cov ua Vajtswv haujlwm. Yuav kom Vajtswv tes haujlwm tawg paj txi txiv, peb txhua tus yuav tsum lees paub lwm tus txiajntsig, qhib peb lub siab pom txog Vajtswv Pawg Ntseeg loj thoob ntiajteb, thiaj li koom ua ke, sib pab tshajtawm tus Tswv lub npe mus thoob plaws txhua qhov chaw.
Thov Vajtswv,
Tus Tswv, ua tsaug rau qhov uas Koj lees yuav nyuam yaus dhau ntawm Tswv Yexus tus ntoo khaublig. Thov pab kom nyuam yaus xyaum xav thiab hais txog cov kwvtij hauv txojkev ntseeg raws li Vajtswv Txojlus hais txog lawv, kom peb thiaj li tso tseg tej kev txawv txav thiab tuav tes sib koom ua ke ua Vajtswv haujlwm. Nyuam yaus tuav Yexus Khetos lub npe thov, Amees.
Peb lees paub licas txog peb tej kwvtij li txiajntsig thiab txog Vajtswv Pawg Ntseeg?
Nyeem Vajluskub hauv peb lub xyoos: Yelemis 18
Kênh Youtube BHKTHN:
