Klei Aê Diê Blŭ: I Kôrantô 1:1-3
Êlan kliăng: “Čih mơĭt kơ Phung Sang Aê Diê ti ƀuôn Kôrantô, kơ phung doh jăk leh hlăm Krist Yêsu, phung Aê Diê iêu leh brei jing phung doh jăk mbĭt hŏng jih jang phung dôk tar ƀar anôk iêu wah lač kơ anăn Khua Yang drei Yêsu Krist, Khua Yang diñu leh anăn Khua Yang drei. (I Kôrantô 1:2)
Klei êmuh ksiêm mĭn: Si Khua ƀĭng kna Y-Pôl hưn mthâo kơ pô čih hră? Ñu lač kơ anăn pô mkăn hlăm si ai tiê leh anăn si knuih? Ya klei tŭ dưn bruă dlăng kơ ênoh yuôm pô mkăn?
Hŏng klei kkuh čhưn mưng hlăm sa hră mơĭt, Khua ƀĭng kna Y-Pôl kčưm dơ̆ng čih I Kôrantô hŏng klei hưn mthâo pô čih hră leh anăn pô mă hră. Tlâo êlan Klei Aê Diê Blŭ mphŭn pŏk brei drei ƀuh klei Khua ƀĭng kna Y-Pôl ƀuh kơ ênoh yuôm pô mkăn.
Tal êlâo, hlăm hră hưn mthâo pô čih hră, êngao kơ anăn pô, Khua ƀĭng kna Y-Pôl lŏ lač kơ Y-Sôsthen, “ayŏng adei drei”, hlăm bruă klam jing pô čih hră mbĭt (êlan 1). Bruă lač kơ Y-Sôsthen brei ƀuh Khua ƀĭng kna Y-Pôl amâo mâo ai tiê kâo jing phŭn bi pô mkăn knŏng jing đru đuč, amâo năng lač anăn ôh. Ƀiădah, ñu mpŭ nanao kơ pô mă bruă mbĭt hŏng pô, dlăng digơ̆ jing “ayŏng adei” mtăp mđơr leh anăn bi đru.
Tal dua, kơ pô mă hră, ñu čih mơĭt “ kơ Phung Sang Aê Diê”, “kơ phung doh jăk leh hlăm Krist Yêsu”, “phung doh jăk” (êlan 2). Mta phŭn ñu čih hră anei amâo djŏ kyua Phung Sang Aê Diê Kôrantô dôk jăk siam, năng ktưn hưn ôh, ƀiădah kyua diñu dôk tuôm hŏng lu klei hlăm knuih hdĭp leh anăn klei kkuh mpŭ. Wăt hlăk êjai digơ̆ jing snăn, ñu ăt bi mĭn leh anăn čih hră kơ digơ̆ hŏng klei blŭ mpŭ hĭn. Ñu thâo săng klă snăk digơ̆ ăt jing “phung doh jăk”, amâo djŏ knang hlăm digơ̆ pô ôh, ƀiădah knang kơ êrah Khua Yang Yêsu.
Phung êdei anăn mâo Khua ƀĭng kna Y-Pôl čih hră jing “jih jang phung dôk tar ƀar anôk iêu wah lač kơ anăn Khua Yang drei Yêsu Krist, Khua Yang diñu leh anăn Khua Yang drei” (êlan 2). Lŏ lač jing, hră anei ñu amâo djŏ knŏng brei hjăn kơ Phung Sang Aê Diê Kôrantô kyua ñu mkŏ mjing ôh. Ñu čih hră čiăng mtô, ƀuah mkra leh anăn mñă kơ jih jang phung akâo wah lač kơ Anăn Khua Yang Yêsu Krist, jing phung đăo kơ Aê Diê hlăm Klei Aê Diê Blŭ, Pô brei leh Khua Yang Yêsu trŭn ti lăn ala tŭ klei djiê čiăng bi mtlaih anak mnuih. Hlăm klei Khua ƀĭng kna Y-Pôl dlăng, Phung Sang Aê Diê amâo djŏ knŏng jing phung tui hlue klei ñu mtô kơ klei kkuh mpŭ ôh ƀiădah jing sa êpul êya prŏng hŏng sa klei đăo hlăm Khua Yang Yêsu wăt tơdah srăng mdê kơ klei mkŏ mjing leh anăn hdră kkuh mpŭ.
Hlăm klei mă bruă kơ Aê Diê, drei amâo dưi ôh mă bruă hjăn păn ƀiădah mă mbĭt hŏng pô mkăn. Wăt tơdah bruă knuă grăp čô mnuih mdê mdê ƀiădah jih jang drei jing mnuih mă bruă kơ Aê Diê. Čiăng kơ klei mă bruă kơ Aê Diê mâo klei tŭ dưn, grăp čô brei dlăng kơ ênoh yuôm hdơ̆ng pô, pŏk mlar hnơ̆ng trah dlăng kơ Phung Sang Aê Diê lar hlăm djăp anôk čiăng sa ai tiê, bi đru hiu hưn Anăn Khua Yang hlăm djăp anôk.
Si drei dlăng kơ ênoh yuôm phung ayŏng amai adei pô leh anăn kơ Phung Sang Aê Diê?
Wah lač: Ơ Khua Yang, kâo bi mni kơ Ih kyua Ih bi mklă kâo mơ̆ng kyâo bi kal Khua Yang Yêsu Krist. Akâo kơ Ih đru kâo bi mĭn leh anăn lač kơ klei ayŏng amai adei mkăn hlăm klei đăo hlue si Klei Aê Diê Blŭ lač kơ digơ̆ čiăng hmei srăng lui ya klei mdê, bi djă kngan mbĭt mă bruă kơ Khua Yang. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
