II Xwmtxheej Vajntxwv 30:13-14
Nqe cim:
“Nej yuav tsum muab tej keeb qub uas yog txojkev txhaum tso povtseg, nej thiaj yuav ua tau neeg dawbhuv. Yog nej ua li ntawd, nej thiaj yuav zoo li lub ncuav tshiab uas tsis xyaw keeb; kuv paub hais tias tsis muaj keeb nyob hauv nej lawm. Rau qhov Yexus Khetos uas yog tus menyuam yaj uas luag muab tua ua kevcai Hla Dhau, nws twb tuag theej peb lub txhoj lawm.” (I Kauleethaus 5:7)
Lus nug rau sawvdaws xav:
– Muaj ntau pab neeg tuaj txoos ua ke hauv lub nroog Yeluxalees thaum lub ob hlis ua yam kevcai twg?
– Cov neeg no koom ib lub siab ua yam dabtsi?
– Peb cheemtsum ua dabtsi kom ua rau qhov chaw yus nyob paub txog Vajtswv txojkev dawbhuv, tshwjchim?
Thaum Vajntxwv Hexekiyas nqua hu cov pejxeem kom tig rov los cuag tus Tswv, muaj ntau leej tuaj hauv nroog Yeluxalees ua “kevcai noj ncuav tsis xyaw keeb” txhais tau tias lawv kuj koom lub Kevcai Hla Dhau thiab. Ua ntej ntawd, cov povthawj thiab cov neeg Levis ua raws li Vajntxwv Hexekiyas tej lus samhwm, lawv mus tu lub Tuamtsev kom dawbhuv (II Xwmtxheej Vajntxwv 29:4-5). Lawv nqa tagnrho tej uas tsis dawbhuv hauv lub Tuamtsev mus pov rau hauv lub Hav Kidoos, tiamsis kev tu Tuamtsev tsuas yog li xwb. Hnub thaud, Vajntxwv Ahas uas yog Vajntxwv Hexekiyas txiv twb “muab tus Tswv lub Tuamtsev tej qhovrooj kaw thiab teeb tej thaj txi dab rau txhua qhov hauv lub nroog Yeluxalees.” (II Xwmtxheej Vajntxwv 28:24). Vim qhov uas kub siab lug tig rov los cuag Vajtswv, cov neeg tuaj ua kevcai tu siab thaum pom tej thaj teev dav puv nkaus nyob hauv lub nroog Yeluxalees. Yog li ntawd, ua ntej thaum mus ua Kevcai Hla Dhau, lawv kub siab lug thiab rhuav “tej thaj uas hlawv khoom fij thiab tej thaj uas hlawv hmoov tshuaj tsw qab hauv lub nroog Yeluxalees coj mus povtseg rau hauv lub Hav Kidoos.” Vim qhov no muaj kev ntxuav kom huv thoob plaws lub nroog Yeluxalees, nws tsis yog hauv Tuamtsev xwb.
Ua kevcai noj ncuav tsis xyaw keeb yog ua tom qab uas ua Kevcai Hla Dhau ib hnub thiab lub sijhawm yog xya hnub. Hauv xya hnub ntawd, cov pejxeem tsis tau cai noj tej ncuav muaj keeb thiab hauv lawv lub tsev los yuav tsum tsis muaj keeb thiab (Khiav dim 12:18-19). Lub homphiaj yog ua kom lawv nco ntsoov qhov uas lawv maj nroos khiav tawm tebchaws Iziv tsis muaj sijhawm tos cov ncuav nce keeb. Ib tiam dhau rau ib tiam, ua ntej ua Kevcai Hla Dhau, cov neeg Yudais pheej muab tagnrho tej keeb hauv tsev tshem tawm huvsi, thiab lawv yuav tsum nrhiav txhua lub kaum tsev nrhiav tej uas yuav nce tau keeb thiab muab pov tseg. Timthawj Paulus hais tias keeb yog hais txog kev txhaum, kev phem kev qias, ua nruj ua tsiv, thiab peb yuav tsum tso tej keeb qub ntawd tseg, ua cov hmoov ncuav tsis xyaw keeb, rau qhov Yexus Khetos yog tus tsiaj tua ua Kevcai Hla Dhau rau peb twb raug tua tuag ntxuav peb tej kev txhaum (I Kauleethaus 5:7-8).
Nimno, peb kuj yuav tsum ua neej muaj lub siab tso tseg txhua yam mlom, phem qias tsis haum Vajtswv siab, txhua yam keeb qub ntawm txojkev txhaum hauv lub neej mus. Thaum ua tau lub neej zoo li no, peb thiaj yuav ua tau qhov chaw peb nyob, chaw ua haujlwm paub txog Vajtswv txojkev dawbhuv. Los ntawm peb kev ua neej thiab ua timkhawv thiaj yuav muaj ntau leej tso kev pemlom tseg tig los cuag Vajtswv.
Thov Vajtswv,
Tus Tswv, thov Koj ua kom nyuam yaus muaj lub siab kub lug tshem tawm tej txhua yam keeb kev txhaum mus, thiab zoo siab hlo pab qhia cov neeg nyob ibncig kom lawv tso kev pemlom tig los cuag Vajtswv. Tuav Tswv Yexus lub npe thov, Amees.
Peb puas ua tib zoo nrhiav thiab muab tej mlom, tus cwjpwm phem, keeb qub tso tawm hauv peb lub neej mus lawm tau?
Nyeem Vajluskub hauv peb lub xyoo: I Vajntxwv 11
Kênh Youtube BHKTHN:
