Klei Aê Diê Blŭ: II Klei Yăl Dliê 30:13-14
Êlan kliăng: “Mă hĕ kpei hđăp, čiăng kơ diih dưi jing kpŭng mrâo, kyuadah sĭt nik diih amâo mâo kpei ôh. Kyuadah Krist, êđai biăp Knăm Klei Găn drei, arăng myơr ngă yang leh” (I Kôrantô 5:7).
Klei êmuh ksiêm mĭn: Mâo lu mnuih bi kƀĭn ti ƀuôn Yêrusalem čiăng hdơr mpŭ kơ ya knăm? Jih jang phung anei sa ai dơ̆ng ngă ya mta bruă? Ya drei srăng ngă čiăng đru jih jang mnuih hlăm anôk drei dôk thâo kơ klei doh jăk guh kơang Aê Diê?
Tơdah Mtao Hêsêkia iêô jak phung ƀuôn sang lŏ wĭt kơ Aê Diê, mâo lu mnuih hriê kơ ƀuôn Yêrusalem čiăng “hdơr mpŭ kơ knăm Klei Ƀơ̆ng Kpŭng Amâo Mâo Kpei” čiăng lač diñu ăt hlŏng hdơr mpŭ kơ Knăm Klei Găn mơh. Êlâo tinăn, phung khua ngă yang leh anăn phung Lêwi gưt kơ Mtao Hêsêkia mtă bi doh hĕ sang Aê Diê (II Klei Yăl Dliê 29:4-5). Digơ̆ mă mđuĕ hĕ jih jang mnơ̆ng čhŏ mrŏ mơ̆ng sang Aê Diê ba hwiê hlăm tlung Sêdrôn, ƀiădah klei bi doh knŏng mjưh mă tăp anăn. Mphŭn dô, Mtao Ahas jing ama Mtao Hêsêkia mdơ̆ng leh “kơ ñu pô knưl hlăm grăp kiêng hlăm ƀuôn Yêrusalem” (II Klei Yăl Dliê 28:24). Kyua klei hur har čiăng lŏ wĭt kơ Aê Diê, jih jang phung hriê bi kƀĭn amâo dưi tŭ ôh tơdah ƀuh mâo lu lĭn knưl ngă yang kơ yang mkăn hlăm ƀuôn Yêrusalem. Kyuanăn, êlâo kơ digơ̆ hdơr mpŭ kơ Knăm Klei Găn, digơ̆ dơ̆ng mă bruă, mă mđuĕ hĕ “knưl arăng mdơ̆ng kơ yang mkăn hlăm ƀuôn Yêrusalem leh anăn jih jang knưl čuh mnơ̆ng ƀâo mngưi” kơ rup yang ba hwiê hlăm tlung Sêdrôn. Hŏng klei ngă anăn arăng ngă leh klei bi doh tar ƀar ƀuôn Yêrusalem amâo djŏ knŏng hjăn hlăm Sang Aê Diê ôh.
Knăm Ƀơ̆ng Kpŭng Amâo Mâo Kpei tinei arăng mkra êdei ti Knăm Klei Găn sa hruê leh anăn ƀơ̆ng hlăm kjuh hruê. Hlăm kjuh hruê anăn, phung ƀuôn sang amâo dưi ƀơ̆ng kpŭng mâo kpei ôh, leh anăn hlăm sang digơ̆ kăn dưi mâo kpei rei (Klei Kbiă 12:18-19). Klei ngă anei čiăng lŏ bi hdơr kơ klei kbiă đuĕ mơ̆ng čar Êjip hŏng klei ruăt kyuanăn amâo mâo djăp mmông dôk guôn kpei bi buk kpŭng ôh. Lu ênuk găn gao, êlâo kơ ƀơ̆ng Knăm Klei Găn, phung Yuđa khăng mă hwiê hĕ jih jang kpei mâo hlăm sang, digơ̆ suai djăp kiêng hlăm sang čiăng duah ya mnơ̆ng mâo kpei ăt dôk leh anăn mă hwiê hĕ. Khua ƀĭng kna Y‑Pôl lač kpei čiăng lač kơ klei soh, klei mplư leh anăn klei ƀai, leh anăn brei drei mă hĕ kpei hđăp, čiăng kơ drei dưi jing kpŭng mrâo amâo mâo kpei ôh kyuadah Krist, êđai biăp Knăm Klei Găn drei, arăng myơr ngă yang leh čiăng bi doh klei soh drei (I Kôrantô 5:7-8).
Hruê anei, brei drei mă mđuĕ hĕ mơ̆ng klei hdĭp drei jih jang rup yang, jih jang mnơ̆ng čhŏ mrŏ amâo bi mơak kơ Khua Yang ôh, jih jang kpei hđăp klei soh ăt dôk hlăm klei hdĭp drei. Tơdah ngă msĕ snăn kơh drei dưi đru anôk drei dôk hdĭp, anôk drei mă bruă thâo kơ klei doh jăk guh kơang Khua Yang. Mơ̆ng klei hdĭp drei leh anăn klei drei hưn srăng mâo lu mnuih lui rup yang lŏ wĭt kơ Aê Diê.
Si ngă drei duah bi nik leh anăn mă hwiê leh mơ̆ jih jang rup yang, klei mưng jhat leh anăn kpei hđăp ăt dôk hlăm klei hdĭp drei?
Wah lač: Ơ Khua Yang, brei kâo mâo klei hur har mă hwiê hĕ jih jang kpei hđăp klei soh mơ̆ng klei hdĭp kâo, leh anăn kăp đru jih jang phung riêng gah kâo lui hĕ jih jang rup yang leh anăn lŏ wĭt kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
