Yakơ 5:16-18
“Bơngai mă lui kơjăp ưh kơ đei tơdrong yoch sư krao khan adrin tơpă na ‘Bok kei-Dei gô tơl tơwih dôm tơdrong sư krao khan noh” (Yakơ 5:16b)
Nơ̆r jet tơchĕng pơwao:
– Athei thoi yơ ‘mơ̆i na nơ̆r bơ̆n krao khan, Kră Yang tơl tơwih?
– Bơ̆n đei tơdrong pơlung pơtrŭt thoi yơ đơ̆ng ‘bok Êli pơm kơmĭl ăn bơ̆n gah tơdrong krao khan?
Bơ̆n bơngai lui, bơ̆n athei lui băt kơ đei tơdrong mơsêh pran lăm nơ̆r bơ̆n krao khan noh tih tơpă mơ̆n, mălei ưh kơ trŏ kơ dôm tơdrong kiơ kiơ đơ̆ng ‘bơ̆r bơ̆n tơlĕch khan đei mơsêh pran ngăl ôh. Kră Yang đĕch Tơ’ngla mơsêh, Sư ‘Bok Kei-Dei gơh pơm tôm tơdrong mơsêh hlĭch, na Sư rơih pơm tơdrong mơsêh noh đơ̆ng nơ̆r krao khan, yua kơ Sư mơnat kơ lu kon pơlei Sư na gơh đei thoi noh, lu bơngai ưh kơ lui, ưh kơ đei ôh thoi noh. Minh ‘Bok Kei-Dei đĕch Tơ’ngla mơsêh mơyang,păng dôm tơdrong ư-ang lăm Sư ngăl.
Wă pơlung pơtrŭt lu kră wei lăng, pơtrŭt lu kon pơlei ‘Bok Kei-Dei wă kơ lu sư krao khan tơgŭm lu bơngai jĭ-jăn akâu akar dah jĭ-jăn gah bơhngol, ‘bok Yakơ đei bơtho thoi âu: “Bơngai mă lui kơjăp ưh kơ đei tơdrong yoch sư krao khan adrin tơpă na ‘Bok Kei-Dei gô tơl tơwih dôm tơdrong sư krao khan noh.” (tr.16). Nơ̆r ‘nâu hei bơ̆n hlôh rơđah hloh dơ̆ng,thoi âu: “Nơ̆r bơngai lui ‘lơ̆ng tơpăt krao khan đei mơsêh pran na Kră Yang tơl tơwih.(tr.16.BTTHĐ). Nơ̆r bơtho ‘nâu tơ’bôh kơ bơ̆n tơdrong Kră Yang tơl nơ̆r krao khan noh tơ’bưh tơklep hăm tơdrong ‘lơ̆ng tơpăt bơngai mă krao khan ei. Tơdrong ‘lơ̆ng tơpăt bơ̆n ‘noh bơ̆n đei yua kơ đơ̆ng bơ̆n lui kơ Kră Yang Yêsu (II Kôrintô 5:21), mă-lei tơdrong kăl sư noh bơ̆n arih hăm tơ’bôh tơdrong ‘lơ̆ng tơpăt bơ̆n ‘nei dah ưh? Pơtao Đawit hlôi klah asong bơ̆n đêl sư mơn đei lăm chăl arih sư, thoi âu: “Tơdah jơhngơ̆m inh mong răk tơdrong kơnê̆; Lei Kră Yang kuă kơ mơ̆ng nơ̆r inh” (Hơriso 66:18). Yua kơ thoi noh na wă kơ nơ̆r bơ̆n krao khan, Kră Yang tơl tơwih,bơ̆n kăl kơ lăng hơlen jơhngơ̆m bơ̆n păng tơbral tơdrong yoch glăi bơ̆n wă kơ Kră Yang mơnat huay kơ jô̆ yo.’Bok Kei-Dei jô̆ bơ̆n ‘lơ̆ng tơpăt noh yua kơ đơ̆ng bơ̆n lui kơ Kră Yang Yêsu, na tơdrong arih ‘lơ̆ng tơpăt bơ̆n noh đei đơ̆ng tơdrong bơ̆n tơ’bưh ‘lơ̆ng hăm Sư.
‘Bok Yakơ hơ’mon tơdrong‘bok Êli bơngai pơtruh nơ̆r ‘Bok Kei-Dei sơ̆, sư wă tơ’bôh pơsĭt kơ tơdrong mơsêh pran đei lăm nơ̆r krao khan (I Pơtao 17). ‘Bok Êli krao khan apinh Kră Yang ‘nĕ kơ ăn đak ‘mi,Kră Yang ưh kơ ăn đak ‘mi hloi.Na đơ̆ng rŏng kơ pêng sơnăm minh puăt, sư krao khan apinh Kră Yang ăn đak ‘mi, Kră Yang ăn hloi đak ‘mi. Roi hơ’mon tơdrong ‘bok Êli bơngai pơtruh nơ̆r ‘Bok Kei-Dei noh tơ’blŏk ăn kơ bơ̆n tơdrong krao khan bơ̆n athei hưch hanh, adrin huay kơ bơ̆l hăl, krao khan tơpă đĭ jơhngơ̆m,păng lui gơnang kơ mơsêh pran Kră Yang, kiơ̆ thoi Sư wă ‘lơ̆ng noh. Bơ̆n ngăl tơchĕng khan ‘bok Êli sơ̆ sư bơngai pơtruh nơ̆r ‘Bok Kei-Dei tơm ‘mơ̆i na Kră Yang tơl tơwih nơ̆r sư krao khan.Mălei ‘bok Yakơ roi ăn kơ bơ̆n băt, “Êli sơ̆ sư kư̆m kon bơngai lei-lăi thoi bơ̆n”. Thoi noh na tơdrong mơsêh hlĭch Kră Yang pơm noh ưh kơ trŏ yua kơ bơngai mă krao khan ei sư pha ra kơ buăl ‘mơ̆i ôh,mălei noh Kră Yang wă tơ’bôh tơdrong tơdă Sư hơmet pha ra kơ hmă noh.
Tơdrong krao khan ‘nâu đơ̆ng Kră Yang mơnat, Sư ăn kơ lu kon pơlei Sư, noh trong wă kơ bơ̆n năm jê̆ Sư, păng mơn đei mơsêh pran đơ̆ng Sư. Apinh Yang Bơhngol’Lơ̆ng chông anhăk bơtho tơ’bôh wă kơ dôm lu tơdrong kiơ mă bơ̆n krao khan noh trŏ lăp hăm tơdrong Sư wă. Kơplah noh, tơdrong bơ̆n krao khan noh gô ba ăn kơ bơ̆n pŭn hiôk, tơplih tơdrong arih bơ̆n jing ‘nao,păng ba ăn lu bơngai jih ‘ma kư̆m pŭn hiôk, arih tơplih ‘nao mơ̆n.
Kơkuh kơ Ih ơ Kră Yang,apinh Ih pă jô̆ yo dôm yoch glăi inh, bơwei jơhngơ̆m inh ling-lang rơgoh ‘lơ̆ng. Apinh Yang Bơhngol ‘Lơ̆ng tơgŭm inh băt kơnăl kơ tơdrong Ih wă, wă kơ inh krao khan kiơ̆ thoi Ih wă, krao khan hăm jơhngơ̆m hưch hanh wă kơ tơdrong mơsêh pran đơ̆ng Ih tơ’bôh đơ̆ng nơ̆r inh krao khan pơyơ̆r kơ Ih.Inh krao khan yua anăn Kră Yang Yêsu Krist, Amen!
Hăm đei tơdrong kiơ kăl kơ tơplih lăm tơdrong arih, lăm tơdrong bơ̆n krao khan?
Bơ̆n hơtai oei yak năm hăm Kră Yang thoi yơ?
Đŏk nơ̆r ‘Bok Kei-Dei lăm pêng sơnăm: II Hơ’mon 22
Kênh Youtube BHKTHN:
