Klei Aê Diê Blŭ: Y-Mathiơ 12:31-32.
Êlan kliăng: “Kyuanăn Kâo hưn kơ diih, jih jang klei soh leh anăn jih jang klei blŭ mgao dưi mâo klei pap brei kơ mnuih, ƀiădah klei blŭ mgao hŏng Yang Mngăt Jăk amâo dưi mâo klei pap brei ôh.” (Y-Mathiơ 12:31).
Klei êmuh ksiêm mĭn: Ya klei soh Khua Yang bi êdah? Ya klei soh Khua Yang lač dưi mâo klei pap brei leh anăn ya klei soh amâo dưi mâo klei pap brei ôh? Ngă soh hŏng Yang Mngăt Jăk si mblang? Ya klei hriăm drei mâo tơdah hriăm klei hriăm anei?
Khua Yang Yêsu brei thâo klei phung Pharisi kčŭt kơ Ñu yua klei myang Ƀêlsêƀul suôt yang jhat jing sa klei soh kjham snăk. Khua Yang lač “jih jang klei soh leh anăn jih jang klei blŭ mgao” kơ mnuih srăng dưi mâo klei pap brei (êlan 31a). “Klei soh” tinei bi ala kơ jih jang klei mĭn leh anăn bruă ngă hŏng klei luar, amâo mâo klei bhiăn. “Klei blŭ mgao” jing jih jang klei blŭ dlao wač hngah kơ Aê Diê hŏng klei thâo săng, anei jing klei blŭ mdŭng mdơ̆ng hŏng klei čŏng thơ̆ng leh anăn bi êdah klă klei blŭ ƀai bi kdơ̆ng hŏng Aê Diê Doh Jăk, amâodah mưč, djă djik djak kơ Ñu. Klei bi kmhal kơ klei blŭ mgao hlăm ênuk Klei Bi Mguôp Hđăp jing bi mdjiê bhĭr hŏng boh tâo (Bruă Lêwi 24:16). Hlăm hruê knhal tuč, klei blŭ mgao srăng jing gru knal klă kơ phung bi kdơ̆ng leh anăn blŭ mgao bi kdơ̆ng hŏng Aê Diê (Klei Bi Êdah 13:5-6). Ƀiădah lĕ, Khua Yang Yêsu brei drei thâo wăt klei soh ktrŏ msĕ snăn dưn ăt srăng mâo klei pap brei mơh tơdah mnuih anăn kmhal.
Hlăm êlan 32, Khua Yang Yêsu lŏ mñă sa blư̆ dơ̆ng tơdah sa čô kyua ka thâo săng klă ôh kơ Ñu kyuanăn mâo klei blŭ mgao ƀiădah tơdah pô anăn thâo kral klei soh ñu leh anăn kmhal hĕ snăn ăt srăng mâo klei pap brei mơh kyua klei pap Aê Diê. Knŏng sa mta klei soh amâo srăng mâo klei pap brei ôh hlăm ênuk anei wăt kơ ênuk êdei msĕ mơh, anăn jing klei “blŭ bi kdơ̆ng hŏngYang Mngăt Jăk.” Hlăm tlâo thŭn mă bruă, hŏng klei myang Yang Mngăt Jăk Aê Diê Khua Yang Yêsu ngă lu klei yuôm bhăn. Phung Pharisi thâo klă knŏng hjăn Aê Diê yơh mâo klei myang dưi hŏng yang jhat ƀiădah diñu ăt čŏng thơ̆ng blŭ klei mgao. Bruă Yang Mngăt Jăk jing kčŭt kơ klei soh, đru anak mnuih thâo kral klei soh, kmhal čiăng mâo klei bi mtlaih. Mnuih blŭ bi kdơ̆ng hŏng Yang Mngăt Jăk jing mnuih mâo ai tiê khăng amâo thâo kral klei soh ôh snăn ñu amâo mâo kmhal. Kyuanăn yơh klei soh diñu amâo srăng mâo klei pap brei ôh..
Mphŭn dô, arăng ka tuôm thâo kral Khua Yang Yêsu ôh snăn jih jang klei soh ngă hŏng Ñu dưi mâo klei pap brei. Hruê anei, drei thâo leh kơ Khua Yang Yêsu jing Aê Diê, djiê hrô brei klei soh drei ti dlông kyâo bi kal, tơdah ăt bi khăng ai tiê amâo čiăng kmhal ôh snăn drei srăng tŭ klei bi kmhal hlŏng lar, “hlei pô amâo gưt kơ Anak amâo srăng ƀuh ôh klei hdĭp, ƀiădah klei Aê Diê ngêñ dôk leh ti ñu” (Y-Yôhan 3:36b).
Tơdah đăo kơ Khua Yang, drei mâo Yang Mngăt Jăk dôk hlăm ai tiê, kyuanăn, gưt bĕ kơ Yang Mngăt Jăk čiăng kơ Ñu atăt ba drei mŭt hlăm jih jang klei sĭt nik, hdĭp bi mơak leh anăn bi guh kơang kơ anăn Ñu nanao.
Si ngă drei brei Yang Mngăt Jăk mă yua kluôm ênŭm klei hdĭp drei leh mơ̆?
Ơ Khua Yang, akâo kơ Ih pap kăp mñă nanao kơ kâo hŏng klei Ih Blŭ čiăng kơ kâo amâo ngă soh hŏng Yang Mngăt Jăk ôh. Đru kâo hdĭp thâo gưt kơ Ih leh anăn bi guh koang kơ anăn Ih.
Dlăng Klei Aê Diê Blŭ hlăm tlâo thŭn: Y-Êskiêl 38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
