Mathais 12:31-32
Nqe cim:
“Yog li ntawd, kuv thiaj hais rau nej hais tias, txhua yam kev txhaum uas neeg ua lossis txhua lo lus phem uas neeg hais, Vajtswv zam txim tau, tiamsis yog leejtwg thuam Vaj Ntsujplig tus Dawbhuv, Vajtswv yuav zam txim tsis tau rau tus ntawd.” (Mathais 12:31).
Lus nug rau sawvdaws xav:
- Tswv Yexus hais txog tej kev txhaum twg?
- Tus Tswv hais tias tej kev txhaum twg zamtxim tau thiab tej kev txhaum twg zamtxim tsis tau?
- Lub ntsiab ntawm kev txhaum thuam Vaj Ntsujplig yog dabtsi?
- Peb tau qhuab ntuas licas thaum kawm ntu Vajluskub no?
Tswv Yexus qhia hais tias cov neeg Falixais tej lus thuam hais tias Nws siv Npexanpus lub hwjchim los ntiab dab yog ib txojkev txhaum uas loj heev. Tus Tswv hais tias “txhua yam kev txhaum uas neeg ua lossis txhua lo lus phem uas neeg hais” yuav tau zamxim (nqe 31a). “Txhua yam kev txhaum” ntawm no yog hais txog tej kev xav thiab tes haujlwm phem, tsis zoo. “Txhua lo lus phem” yog tej lus phem txhob txwm hais txob thuam Vajtswv, ntawd yog tej lus cem phem ua saib tsis taus Vajtswv tus uas dawbhuv, lossis yog tej lus tsawmfoom saib tsis taus Nws. Nyob tiam Vajluskub Qub, tus uas tsawm foom Vajtswv yuav raug muab pob zeb ntaus tuag (Levis Kevcai 24:16). Nyob rau lub sijhawm kawg, tej lus hais txob thuam yuav yog yam tshwjxeeb ntawm cov neeg ntxeev siab tawmtsam Vajtswv (Tshwmsim 13:5-6). Tiamsis, Tswv Yexus qhia hais tias, txawm yog kev txhaum loj npaum ntawd los thaum tus ntawd lees kev txhaum ces nws yuav tau zam txim.
Nyob hauv nqe 32, Tswv Yexus hais meej ntxiv hais tias, yog leejtwg tsis tau paub txog Tswv Yexus thiab hais tej lus thuam Nws, tiamsis thaum tus ntawd zeem paub tus kheej tej kev txhaum thiab lees txim lawm, ces nws yuav tau zam txim los ntawm Vajtswv txoj koobhmoov. Tsuas muaj ib yam kev txhaum uas zam txim tsis tau tsis hais tiam no lossis lwm tiam, ntawd yog kev txhaum “thuam Vaj Ntsujplig tus Dawbhuv”. Nyob hauv peb lub xyoo ua haujlwm, Tswv Yexus tau vamkhom Vajtswv Tus Ntsujplig ua tej haujlwm tseemceeb. Cov neeg Falixais paub tseeb hais tias, tsuas yog Vajtswv xwb thiaj muaj hwjchim loj dua dab tiamsis lawv tseem txhob txwm hais tej lus thuam Tswv Yexus. Vaj Ntsujplig tes haujlwm yog qhia tibneeg paub txog kev txhaum, lees txim kom tau cawmdim. Tus uas thuam Vaj Ntsujplig yog tus muaj lub siab tawv tsis zeem paub kev txhaum, thiaj tsis los lees txim, ntawd yog vimchij uas lawv tsis tau zam txim.
Thaum ub, tibneeg tsis tau paub tseeb txog Tswv Yexus, tej kev txhaum lawv ua thiaj tau zam. Nimno, peb twb paub meej hais tias Tswv Yexus yog Vajtswv, Nws tuag txhiv peb tej kev txhaum saum tus ntoo khaublig, yog tseem tawv nyom tsis lees kev txhaum, ces peb yuav raug teem txim mus ibtxhis, “…tus uas tsis mloog Leej Tub tej lus yuav tsis tau txojsia; Vajtswv yuav rau txim rau tus ntawd” (Yauhas 3:36b). Thaum ntseeg Tswv Yexus, peb tau Vaj Ntsujplig los nyob hauv nruab siab, yog li ntawd, yuav tsum cia Vaj Ntsujplig kav, Nws yuav coj peb mus rau txojkev tseeb, ua neej haum tus Tswv siab thiab ua rau tus Tswv tau koobmeej.
Thov Vajtswv,
Tus Tswv, thov siv Koj Txojlus los qhuab ntuas kom nyuam yaus tsis ua txhaum rau Vaj Ntsujplig. Thov pab nyuam yaus ua tau lubneej hwm Koj thiab ua rau Koj tau koobmeej. Amees.
Peb puas cia Vaj Ntsujplig kav tagnrho peb lubneej lawm tau?
Nyeem Vajluskub hauv peb lub xyoo: Exekees 38
Kênh Youtube BHKTHN:
