Yakơ 4:11-12
“Ơ ‘nhŏng oh, iĕm ‘nĕ kơ pơma bâu roi bôl buăl. Bơngai bu bâu roi ‘nhŏng oh sư păng jô̆ kơ ‘nhŏng oh sư pơm yoch, bơngai noh dang sek tơlang tơdrong juăt ‘Bok Kei-Dei pơkă, khan tơdrong ‘Bok Kei-Dei pơkă ưh kơ ‘lơ̆ng.” (Yakơ 4:11a)
Nơ̆r jet tơchĕng pơwao:
– Bâu roi bôl buăl wă khan kiơ?
– Yua kơ kiơ kon Kră Yang ưh kơ gơh ‘bâu roi bôl buăl?
– Bơ̆n tơl tơwih kơ nơ̆r bơtho ‘nâu thoi yơ?
‘Bok Yakơ bơtho khul bơngai lui “iĕm ‘nĕ kơ pơma bâu roi bôl buăl” lăm nơ̆r Grĕk pơma gah dôm tơdrong kơnê̆, thoi kơ pơma pơjăm, pơma tơhil, hiap pơtê̆, pơma wă kơ mơlâu, pơma khan yoch, pơm kơ đe mơlâu dah bâu roi kơnê̆ kơ đe. Thoi noh, “bâu roi” lăm âu wă khan pơma roi sa păng pơm tơ’bôh hloi nơ̆r pơma tơ jur lê̆ đe nai. Kon Kră Yang ‘nĕ pă pơm dôm tơdrong kơnê̆ ‘nâu, ‘nĕ pă pơm dơ̆ng!
‘Bok Yakơ tơlĕch ‘bar tơdrong kon pơlei ưh kơ gơh pơm bâu roi sa dih băl. Mă mônh, pơm thoi âu pơm glăi hăm khôi juăt Kră Yang yua kơ pơma bâu roi dih băl noh bơ̆n “Dang sek tơlang tơdrong juăt ‘Bok Kei-Dei păng khan tơdrong juăt ‘Bok Kei-Dei pơkă ưh kơ ‘lơ̆ng” ưh kơ sĭ “kiơ̆ tơdrong Sư pơkă bơih” (trong 11). Kră Yang Yêsu đei pơma kơđeh tôm tơdrong juăt lăm ‘bar tơdrong, “’mêm kơ ‘Bok Kei-Dei – ‘mêm kơ bôl buăl” (Mathiơ 22:37-40). ‘Bok Pôl bơtho thoi âu tơ’bôh tơdrong ‘mêm hăm lu bơngai jum dăr ‘noh pơm kiơ̆ khôi juăt (Rôm 13:6-10). Lăm tơdrong tơ’bưh tơduă kon bơngai dih băl. Yakơ đei tơ’blŏk Khôi juăt đei chih lăm Lêwi 19:18, “athei ‘mêm kơ lu sư thoi ih ‘mêm kơ akâu ih kơdih”. Ưh kơ đei layơ biơh khan ‘mêm kơ minh ‘nu bơngai bu na khan nŏng kơ roi sa bơngai noh.
Tơdrong mă ‘bar kon pơlei Kră Yang ưh kơ gơh bâu roi yua kơ pơm thoi âu pơm glăi hăm ‘Bok Kei-Dei. ‘Bok Yakơ khan dah jô̆ kơ đe pơm yoch, bơ̆n tơ’bôh tơdrong ưh kơ chu yom ‘Bok Kei-Dei. ‘Bok mă ăn Khôi juăt păng sek tơlang (trong 12). Kơplah jô̆ kơ đe pơm yoch. Ưh kơ sĭ khan bơ̆n gơh lăp gơh pơm kơ tơdrong arih lu sư đĕch, na kư̆m pơm hloh kơ tơdrong ‘Bok Kei-Dei pơgơ̆r.
Sơ’ngon dêh dah dang ei tơdrong pơtrŭt pơma kơnê̆ bâu roi dih băl, mă kăl loi bâu roi bơngai nai noh oei đei tơ lăm khul bơngai lui păng oei đei lơ bơngai lăp đon. Noh bơih tơm tơdrong jing đei tơdrong tơklah băl, klah asong khul, pơm kơ khul bơngai lui ưh kơ đei jơhngơ̆m pran, ưh kơ tơ’bôh tơdrong ư-ang kơ ‘Bok Kei-Dei, ưh kơ đei pơm kơ lu bơngai tam mă lui gơh kơtơ̆ng Tơdrong ‘Nao ‘Lơ̆ng, tơdrong dŏng pơklaih. Jing kon Kră Yang bơih, rim ‘nu kơ bơ̆n athei wang tơiung tơdrong ‘mêm mơnat, pôm jơhngơ̆m đon kiơ̆ nơ̆r Kră Yang bơtho. Tơplih tơdrong pơrăm, athei tơiung bĕ. Tơplih kơ tơdrong bâu roi bôl buăl athei pôm đon klah asong tơdrong mơnat păng tơdrong ‘mêm kơ lơ bơngai. Apinh Kră Yang tơgŭm kơ bơ̆n băt tơ jur akâu kơdih, băt tơdrong kơdih wă kơ ling lang mơ̆ng kơ Kră Yang, gơnang kơ Yang Bơhngol ‘Lơ̆ng tơplih bơ̆n đơ̆ng lăm jơhngơ̆m truh tơ gah ‘nguaih, wă kơ nơ̆r pơma bơ̆n jing trong ba tơdrong mơnat đơ̆ng Kră Yang kơ lơ bơngai.
Kơkuh kơ Ih Kră Yang, apinh Ih tuh ‘bĕnh lăm tơdrong tơchĕng păng jơhngơ̆m inh hăm tơdrong mơnat păng tơdrong ‘mêm Ih. Apinh Ih ăn kơ đơ̆ng ‘bơ̆r hơpiĕt inh pơma nơ̆r ‘lơ̆ng, ba ăn tơdrong tơiung păng pơlung ăn kơ bơngai mơ̆ng, krao khan yua anăn Kră Yang Yêsu Krist, Amen.
Bơ̆n kăl kơ pơm kiơ wă tơgŭm pơgăn lê̆ tơdrong bâu roi dih băl lăm khul bơngai lui?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 48
Kênh Youtube BHKTHN:
