Tơdrong Pơđơ̆k 24:1-2
“’Nĕ ‘ngeng kơ lu bơngai pơm kơnê̆, Ih kư̆m ‘nĕ kơ wă ‘maih oei hơdai hăm sư. Yua kơ jơhngơ̆m lu sư chă wă pơrăm đe, Hơpiĕt lu sư pơma chă dơhla pơrŭng đe.” (Tơdrong pơđơ̆k 24:1-2)
Nơ̆r jet tơchĕng pơwao:
– Yua kơ kiơ Pơtao Sôlômôn bơtho kon hơ’lơ̆p ‘nĕ kơ klai hăm bơngai kơnê̆?
– Nơ̆r Kră Yang tơ’bôh tuch luch lu bơngai kơnê̆ thoi yơ?
– Lu bơ̆n athei arih thoi yơ wă kơ gơh đei tơdrong mơdrŏng ling lang đơ̆ng Kră Yang ăn?
Jơhngơ̆m kon bơngai ngăl ơh klai kơ bơngai kơnê̆, mălei Kră Yang bơtho lu kon pơlei Kră Yang ơh klai hil areh kơ lu sư. Nơ̆r ơh klai âu wă khan gar, pơting kơplah bơngai pơm ‘lơ̆ng ‘bôh bơngai kơnê̆, đei jên tơmam mơdrŏng, đei tơdrong jang hloh kơ bơ̆n. Lơ bơngai ơh sơ’ngon, ưh kơ lăp đon kơplah ‘bôh bơngai tơpăt, pơm ‘lơ̆ng arih pơmat dơnuh hin, đe lăng ưh kơ yua kiơ, mă lu bơngai arih pơm kơnê̆ rai mơdrŏng; lăm teh đak dang ei nhen thoi pơm tơplơ̆ hăm ‘lơ̆ng tơpăt!
Nơ̆r Sôlômôn minh ‘nu pơtao hơgei bơtho kon hơ’lơ̆p, ưh kơ sĭ kơ gar hăm lu bơngai kơnê̆ đĕch, mălei athei wer weh đơ̆ng bơngai kơnê̆. ‘Nĕ kơ pơm buăl hăm lu sư, ‘nĕ ăn tơdrong pơhlŭ mơ̆t tơ lăm tơpôl lu bơngai kơnê̆ wă chơ chă tơdrong mơdrŏng đơ̆ng tơdrong jang ưh kơ trŏ, tơdrong yoch. Tơdrong kăl kơ weh ataih đơ̆ng tơdrong kơnê̆ yua kơ jơhngơ̆m lu bơ̆n ưh kơ trŏ kơ wă tơchĕng tơdrong kơnê̆ krưp, wă pơrăm, păng ‘bơ̆r ngăl pơma lu nơ̆r plêl hơlĕnh. Pơm kơ lơ bơngai ưh kơ hiôk lăp đon. Kơplah tơmơ̆t pơm buăl hăm bơngai kơnê̆, mă khan đơ̆ng jơhngơ̆m ‘lơ̆ng ră khŏm khŏm gô jing kơnê̆; jơhngơ̆m ‘lơ̆ng rơgoh khŏm khŏm jing ‘mê̆ ‘mach, đơ̆ng noh ‘net ‘net gô jing minh khul pơm kơnê̆, pơm yoch. Jơhngơ̆m yoch glăi gô ba truh tơdrong bơ̆n pơm yoch glăi tơ’bôh gah ‘nguaih bơ̆n pơm, nơ̆r pơma kơnê̆, yoch glăi.
Tơdah bơ̆n oei hreh hơlen lăng chăl arih lăm tôm tơdrong, lu bơ̆n gô ‘bôh nheñ tơdrong mơdrŏng, ‘bôh đei lu bơngai kơnê̆, noh lăp hrei hrei đĕch nhen thoi pơkao ‘nhĕt pơge tơlang kơsơ̆ jô kro (Hơriso 37:1-2). Tơpă dang ei, đei lơ bơngai đei jên tơmam lơ dêh mălei akâu oei lăm hnam bơnă. Yua kơ thoi noh lu bơ̆n ‘nĕ kơ sơ’ngon, ‘nĕ kơ klai, ‘nĕ kơ hơpơi rŏ kơ thoi oei hơdai lu sư. Nơ̆r Kră Yang khan: “Pŭn dêh kơ bơngai bu, ưh kơ kiơ̆ trong lu bơngai kơnê̆, kư̆m ưh kơ oei lăm trong lu bơngai yoch, kư̆m ưh kơ ngôi hơdai hăm lu pơjăm đe;” (Hơriso 1:1). Apinh Kră Yang ăn kơ lu bơ̆n ‘nĕ yua kơ tơdrong hiôk ư-ang lăm teh đak na yak năm kiơ̆ trong hiong răm.
‘Bok Pôl pơlung pơtrŭt rim ‘nu kon pơlei Kră Yang athei adrin tơplih lăm chăl arih, kơplah bơ̆n lui sơng iŏk Kră Yang Krist bơih. Bơtho: “Bơ̆n ‘nĕ pă pơm yoch tôm tơdrong kơnê̆ thoi lu bơngai tơ teh âu juăt kơ pơm. Bơ̆n athei pơjao akâu bơ̆n kơ ‘Bok Kei-Dei tơplih jơhngơ̆m đon bơ̆n jing ‘nao wă kơ bơ̆n băt tôm tơdrong Sư, tơdrong trŏ tơdrong ‘lơ̆ng tơpăt ngăl.” (Rôm 12:2 BTTHĐ). Khul bơngai lui ưh kơ arih pơm kiơ̆ kơ lu bơngai ala teh, ưh kơ chơ chă mơdrŏng hrei hrei, mălei krao khan hăm đĭ jơhngơ̆m, krao khan apinh kiơ̆ thoi Kră Yang wă lăp đon lăm chăl arih bơ̆n, jing bơngai arih ‘lơ̆ng tôm tơdrong, chơt hiôk đei tôm tơmam mă arih ling lang lăm Kră Yang Yêsu Krist.
Ơ Kră Yang, inh bơnê kơ Ih đei bơtho inh đei lăng trŏ tơdrong kơnhăm lăm chăl arih inh, apinh Yang Bơhngol ‘Lơ̆ng tơ’blŏk kơ inh wer weh đơ̆ng tơdrong pơhlŭ pơlung đơ̆ng lu bơngai kơnê̆, păng đĭ jơhngơ̆m lui gơnang kơ Ih lăm tơdrong arih rim năr. Krao khan yua anăn Kră Yang Yêsu Krist, Amen.
Tơdrong kơnhăm lăm chăl arih lu bơ̆n ‘noh chă tơdrong chơt hiôk tơdrong arih lăp đon lăm Kră Yang dah ơh klai hăm bơngai kơnê̆?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 12-13
Kênh Youtube BHKTHN:
