II Timautes 1:3-5
Nqe cim:
“Txhua zaus uas kuv thov Vajtswv pab koj, tsis hais nruab hnub lossis hmo ntuj, kuv yeej nco ntsoov ua Vajtswv tsaug” (II Timautes 1:3b)
Lus nug xav:
– Hauv cov lus ua Vajtswv tsaug txog Timautes, Timthawj Paulus hais tias nws nco ntsoov Timautes thaum twg thiab nco yam dabtsi?
– Vajtswv Txojlus qhia rau peb li cas txog tes haujlwm hmov tshua, tsob hwb lwm tus?
Tej zaum vim kub siab heev rau tej teeb meem qhia yuam kev tuaj rau hauv Pawg Ntseeg ua rau muaj kev kub ntxhov rau Vajtswv cov menyuam, yog li hauv tsab ntawv I Timautes, tom qab uas hais lus nug xov moo tas ces Timthawj Paulus samhwm ncaj qha rau Timtautes kom nyob twjywm hauv lub nroog Efexus. Tiamsis hauv tsab ntawv tim ob, Paulus siv sijhawm los ua Vajtswv tsaug txog nws tus tub uas nws hlub, dua li ntawd peb kawm tau txojkev sib raug zoo ntawm kev tsob hwb, txhim tsa cheemtsum muaj cov yamntxwv twg.
Thaum hais qee lo lus tas, Timthawj Paulus hais peb zaug tias “nco ntsoov” txog nws tus tub Timautes. Thawj qhov, Paulus nco Timtautes nruab hnub lossis hmo ntuj thaum thov Vajtswv. Qhov zoo uas leej txiv sab ntsujplig ua rau nws tus tub yog muab fij rau Leej Txiv nyob saum ntuj. Qhov uas “nruab hnub lossis hmo ntuj” nco ntsoov qhia paub tias Timthawj Paulus txhawj txog Timautes zoo ib yam li nws tus menyuam yug kiag, vim cov ua niam ua txiv yeej niaj hnub xav txog cov menyuam. Qhov no kuj qhia paub, Timthawj Paulus muab Timautes hu “tus tub uas kuv hlub”, “kuv tus tub sab ntsujplig” yeej yog, tsis yog lam hais lossis txhawb zog xwb.
Tib ob, Timthawj Paulus nco ntsoov txog Timautes “tej kuamuag” (nqe 4 MWW2022). Vim li cas xibhwb Timautes quaj mas peb tsis paub, tiamsis yam uas peb paub yog txawm tias lub vimchiv twg los Timthawj Paulus yeej paub txog nws tus tub sab ntsujplig txojkev nyuaj siab. Hmov tshua, txhim kho lwm tus yog ua tib zoo mloog, paub thiab nco ntsoov txog tej uas tus neeg ntawd raug, tiv. Muaj qee zaus peb mloog lwm tus qhia lawv tej kev teebmeem, peb hais tias kuv mus kuv mam thov Vajtswv pab rau koj, tiamsis peb nyuam qhuav thov Vajtswv tas ces peb cia li hnov qab lawv lawm, thiab tom qab ntawd peb tsis nco txog tus ntawd, tsis rov nug xov saib nws zoo li cas lawm.
Tim peb, Timthawj Paulus “nco ntsoov” txog Timautes txojkev ntseeg (nqe 5). Paulus tsis yog nco thaum quaj, nyuaj siab, tiamsis tseem lees, txhawb zog thiab hais txog tus tub lub npe. Tus neeg tsob hwb, txhim kho sab ntsujplig cheemtsum hmov tshua kom paub tus phoojywg, tus neeg yus tsob hwb ntawd lub neej sab kev ntseeg zoo li cas, thiaj paub txhawb zog, coj nws ua qhov zoo. Yog tsis hlub tiag, tsis nrog ua ke tiag ces yuav tsis yoojyim tsob hwb tau kom tawg paj txi txiv li.
Thov Vajtswv,
Vajtswv, ua tsaug qhov Koj qhia nyuam yaus paub Koj thiab loj hlob los ntawm cov neeg ua ntej thov Vajtswv pab, txhawj txog nyuam yaus tej kev nyuaj thiab txhawb zog. Thov Koj cia nyuam yaus kawm tau thiab ua tej ntawd kom nyuam yaus loj hlob, muaj zog ua Koj tej haujlwm hauv koj tsevneeg. Nyuam yaus tuav Tswv Yexus Khetos lub npe thov, Amees.
Lub athiv no, leejtwg yog tus uas peb hmov tshua? Peb pom tau tias yus cheemtsum kawm yam dabtsi kom tsob hwb, txhawb zog zoo dua?
Nyeem Vajluskub hauv peb lub xyoo: Exethaws 2
Kênh Youtube BHKTHN:
