Klei Aê Diê Blŭ: Hêbrơ 13:15-16
Êlan kliăng: “Snăn hlăm Ñu brei drei myơr nanao mnơ̆ng ngă yang bi mni kơ Aê Diê, boh mơ̆ng kƀông hưn anăn Ñu jing Khua Yang” (Hêbrơ 13:15).
Klei êmuh ksiêm mĭn: Ya ngă hruê anei drei amâo lŏ myơr mnơ̆ng ngă yang hŏng hlô mnơ̆ng ôh? Hŏng ya mta klei pô čih hră Hêbrơ mtô mtă brei myơr? Hruê anei, ya mta mnơ̆ng myơr kkuh mpŭ jing djŏ leh anăn bi mơak kơ Aê Diê?
Khua pô hưn êlâo Y‑Ôsê hiu hưn klei Yêhôwa lač snei: “Wah lač bĕ ti anăp Yêhôwa, leh anăn lŏ wĭt kơ ñu bĕ. Lač kơ ñu: “Mă hĕ jih klei wê, mă tŭ hmei hŏng klei ih pap, čiăng kơ hmei dưi myơr boh mơ̆ng ƀăng kƀông hmei.” (Y‑Ôsê 14:2). Păn kơ klei khua pô hưn êlâo Y‑Ôsê blŭ, leh lač kơ êrah Khua Yang Yêsu bi doh jăk phung ƀuôn sang Ñu (êlan 12), pô čih hră Hêbrơ brei thâo, “Snăn hlăm Ñu brei drei myơr nanao mnơ̆ng ngă yang bi mni kơ Aê Diê, boh mơ̆ng kƀông hưn anăn Ñu jing Khua Yang. Đăm wơr bĭt ôh ngă klei jăk leh anăn bi mbha mnơ̆ng diih mâo kơ phung mkăn, kyuadah klei ngă yang msĕ snăn bi mơak kơ Aê Diê” (êlan 15-16). Snăn, hŏng ênoh Khua Yang Yêsu bi tui leh, snăn hruê anei amâo lŏ myơr mnơ̆ng ngă yang hŏng hlô mnơ̆ng ôh, ƀiădah myơr mnơ̆ng ngă yang kkuh mpŭ hŏng kƀông mmuñ bi mni kơ Aê Diê, leh anăn hŏng bruă ngă jăk kah mbha mnơ̆ng đru phung mkăn. klei ngă yang msĕ snăn bi mơak kơ Aê Diê.
Phung anak Aê Diê hruê anei dôk hdĭp hlăm klei pap, mblang jing amâo guôn lŏ djă pioh klei bhiăn msĕ si hlăk ênuk klei bhiăn ôh. Khua Yang Yêsu pô yơh tŭ leh klei djiê jing msĕ si mnơ̆ng myơr ngă yang čiăng bi tui klei soh jih jang mnuih (Rôm 6:10). Kyua Ñu yơh hruê anei drei knŏng myơr mnơ̆ng ngă yang kkuh mpŭ kơ Aê Diê grăp hruê hŏng klei blŭ mmuñ bi mni leh anăn bruă ngă hdơr knga kơ Khua Yang kơ klei Ñu săn asei mlei. Mđrăm mbĭt hŏng klei yua êlah kƀông pioh hưn Anăn Khua Yang leh anăn hưn bi sĭt kơ jih bruă jăk Ñu ngă leh kơ drei, mbĭt hŏng bruă klei khăp, kah mbha mnơ̆ng đru phung mkăn. Y‑Yakơ ăt hưn mthâo: “Snei klei đăo doh leh anăn amâo čhŏ ôh ti anăp Aê Diê Ama: đru phung anak êrĭt leh anăn phung mniê djiê ung hlăm klei knap mñai digơ̆, leh anăn răng kriê amâo bi čhŏ ñu pô hŏng klei mưng lăn ala.” (Y‑Yakơ 1:27). Klei anăn yơh jing mnơ̆ng myơr kkuh mpŭ djŏ leh anăn bi mơak kơ Aê Diê.
Mnơ̆ng myơr kkuh mpŭ bi mơak kơ Aê Diê amâo djŏ ôh knŏng bi êdah ti êngao, hlue ngă hdră bhiăn ƀiădah klei yuôm hĭn jing bruă ngă kbiă mơ̆ng ai tiê khăp kơ Khua Yang, thâo hdơr knga kơ Ñu, myơr klei blŭ mmuñ bi mni kơ Khua Yang leh anăn bi êdah bruă ngă jăk kơ phung mkăn. Klei kkuh mpŭ kơ Aê Diê amâo djŏ ôh knŏng bi êdah hlăm Sang Yang grăp Hruê Kjuh ƀiădah brei bi êdah hlăm djăp mmông leh anăn djăp anôk. Ai tiê kkuh mpŭ kơ Aê Diê brei mâo nanao hlăm klei hdĭp grăp čô phung đăo hŏng êlah kƀông leh anăn knhuah dôk hdĭp grăp hruê. Anăn yơh jing ai tiê kpĭ mjuăt pô kơ phung ƀuôn sang Aê Diê hlăm klei kkuh mpŭ.
Si ngă drei yua mơ̆ êlah kƀông mmuñ bi mni kơ Aê Diê leh anăn bi êdah Ñu Pô hŏng bruă ngă jăk grăp hruê mơ̆? Ya mnơ̆ng myơr kkuh mpŭ diih myơr kơ Khua Yang?
Wah lač: Ơ Khua Yang, akâo kơ Ih mñă brei kâo myơr kơ Ih mnơ̆ng myơr mơ̆ng êlah kƀông leh anăn bruă ngă mpŭ mni kơ Anăn Khua Yang hlăm knhuah hdĭp kâo grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 7:30 – 8:40
Kênh Youtube BHKTHN:
