Klei Aê Diê Blŭ: Y-Êsêkiêl 36:22-28
Êlan kliăng: “Kâo srăng dưm Mngăt Myang Kâo hlăm diih, leh anăn mtrŭt diih êbat tui hlue klei bhiăn Kâo leh anăn răng ngă tui klei Kâo mtă.” (Y-Êsêkiêl 36:27)
Klei êmuh ksiêm mĭn: Ya klei Aê Diê hưn hŏng khua pô hưn êlâo Y-Êsêkiêl kơ bruă Ñu srăng ngă kơ phung ƀuôn sang Israel? Ya mta klei dưi bi mlih diñu? Hŏng si klei Mngăt Myang Aê Diê srăng đru diñu? Ya klei bi êdah hlăm klei hdĭp bi knăl drei mâo Mngăt Myang dôk hlăm drei?
Kdrêč 36 hdruôm hră Y-Êsêkiêl dưi yap jing klei khua pô hưn êlâo mtô pioh kơ phung ƀuôn sang Israel, hŏng klei čang hmăng dưi lŏ bi mrâo, leh ruê̆ jih ênuk mă jing mnă leh anăn bi kdơ̆ng hŏng Aê Diê. Trăn tal êlâo hlăm kdrêč (êlan 1-15), khua pô hưn êlâo brei thâo Aê Diê srăng lŏ bi mrâo čar diñu. Trăn tal dua (êlan 16-38), kñăm kơ bruă Khua Yang lŏ bi mrâo klei hdĭp phung ƀuôn sang Ñu. Wăt tơdah diñu amâo dôk sĭt suôr, Khua Yang ăt bi êdah klei khăp klei pap Ñu, amâo djŏ kyua diñu năng ôh, ƀiădah čiăng kơ Anăn Aê Diê mâo klei mpŭ mni (êlan 22). Klei ƀuăn yuôm bhăn hĭn pioh kơ diñu, amâo knŏng brei diñu dưi lŏ wĭt kơ lăn čar diñu pô, ƀiădah wăt bi mlih klei hdĭp diñu mơ̆ng hlăm lam, sa mta bruă ngă kbiă hriê mơ̆ng Mngăt Yang Aê Diê pô.
Boh blŭ “ai tiê mrâo” leh anăn “ai tiê êdu êun” (êlan 26) hưn mdah knuih êdu êun, thâo mđing wĭt lač kơ asăp Khua Yang, bi mklăk hŏng “ai tiê khăng” bi knăl kơ klei khăng kŏ, tlar, khăng ai tiê ti anăp klei Khua Yang iêô mthưr. Klei bi mlih anei amâo djŏ hŏng klei gĭr ktưn čiăng dưi jing kpă ênuah mơ̆ng ai ktang mnuih ôh, ƀiădah jing klei bi mlih dơ̆ng mơ̆ng phŭn agha mơ̆ng Mngăt Myang Aê Diê ngă bruă. Boh nik nak hlăm êlan 27 kñăm snei: “Kâo srăng dưm Mngăt Myang Kâo hlăm diih, leh anăn mtrŭt diih êbat tui hlue klei bhiăn Kâo leh anăn răng ngă tui klei Kâo mtă.”. Klei anei brei ƀuh bruă Yang Mngăt Jăk ngă, amâo djŏ knŏng bi êdu êun ai tiê, ƀiădah wăt brei klei ktang čiăng kơ drei dưi dôk hdĭp gưt asăp leh anăn dôk hdĭp hlăm klei kpă ênô Aê Diê.
Trăn anei kñăm kơ dua bruă ngă mơ̆ng Yang Mngăt Jăk: Tal sa, bi mlih ai tiê, leh anăn tal dua, atăt gai mŭt hlăm knhuah hdĭp thâo khăp leh anăn gưt asăp. Yang Mngăt Jăk yơh jing Pô mâo klei dưi ngă bruă hlăm ai tiê leh anăn bi mlih mngăt ai tiê anak mnuih. Knŏng tơdah Ñu brei “ai tiê êdu êun” snăn kơh anak mnuih mâo klei thâo săng klei khăp Khua Yang, thâo kmhal kơ klei soh, thâo tui duah klei doh jăk. Klei kpă ênô ti anăp Khua Yang kčưm dơ̆ng mơ̆ng sa ai tiê mâo Ñu bi mlih leh. Yang Mngăt Jăk mtrŭt drei răng leh anăn “ngă tui” klei Khua Yang čiăng (êlan 27). Mblang jing, Ñu bi mjing klei gưt asăp dơ̆ng mơ̆ng ngă hŏng klei mgô̆ tơl jing knhuah hdĭp mơak mơai, đru drei thâo khăp kơ mnuih, thâo pap brei, mă bruă leh anăn bi ktlă knuih Aê Diê.
Klei hdĭp phung anak ƀuôn sang Aê Diê mâo Mngăt Myang Ñu dôk mbĭt srăng mâo boh mơ̆ng Yang Mngăt Jăk (Galati 5:22-23). Leh anăn klei anăn yơh jing klei hưn bi sĭt kơ sa klei hdĭp bŏ hŏng Yang Mngăt Jăk. Sa ai tiê êdu êun ti anăp Khua Yang atăt nanao truh kơ klei thâo khăp kơ mnuih mkăn. Klei khăp jing klei bi knăl kơ sa ai tiê êdu êun mâo Yang Mngăt Jăk kiă kriê
Si ngă drei mă tŭ leh mơ̆ “ai tiê êdu êun” amâodah ăt adôk djă pioh “ai tiê khăng”?
Wah lač: Ơ Yang Mngăt Jăk, bi mni lač jăk kơ Ih kyua Ih bi mlih mrâo leh anăn bi mlih ai tiê kâo. Akâo Khua Yang dôk mbĭt hŏng kâo nanao leh anăn đru kâo dôk hdĭp hlăm klei kpă ênô Ih brei, čiăng kơ kâo bi êdah klei khăp Yang Krist hŏng bruă ngă leh anăn klei blŭ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 102-103
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
