Tơdrong Pơđơ̆k 26:6-10
“Bu gơnang kơ bơngai kơwao năm roi tơbăt kơ đe. Thoi koh lê̆ jơ̆ng chơ̆ng lê̆ blu sư kơdih păng huch iŏk tơdrong răm.” (Tơdrong Pơđơ̆k 26:6)
Nơ̆r jet tơchĕng pơwao:
– Thoi yơ wă khan bơngai kơwao?
– Nơ̆r ‘Bok Kei-Dei chăl kơđeh ‘nâu bơtho dôm tơdrong kiơ ưh kơ gơh kơ pơm hăm bơngai kơwao?
– Lu bơ̆n yua iŏk nơ̆r Kră Yang ‘nâu lăm tơdrong jang Kră Yang thoi yơ?
Lu nơ̆r Tơdrong pơđơ̆k ‘nâu khan tơbăt ưh kơ gơh lui gơnang păng pơjao ăn tơdrong jang kơ bơngai kơwao. “Bơngai kơtul kơwao” lăm âu ưh kơ trŏ pơma kơ bơngai hŏk ưh kơ lơ, kơhlôh kơwao mălei pơma kơ bơngai ưh kơ hli yom kơ Kră Yang, lăng tơdrong gơh hơgei păng nơ̆r bơtho (Tơdrong Pơđơ̆k 1:7; Hơriso 14:1). Phŏ sư hŏk đei ‘băng lăm tih kơjung mălei ưh kơ đei tơdrong hơgei đơ̆ng Kră Yang wă hơmet tơdrong jang. Kră Yang krao lu bơ̆n athei kơchăng lăm tơdrong rơih bơngai jang. Mă minh, ưh kơ gơh pơjao tơdrong jang ăn kơ bơngai kơwao. Nơ̆r bơngai chih: “Bu gơnang kơ bơngai kơwao năm roi tơbăt kơ đe. Thoi koh lê̆ jơ̆ng chơ̆ng lê̆ blu sư kơdih păng huch iŏk tơdrong răm.” (trong 6). Tơdah pơjao tơdrong jang kơ bơngai kơwao ưh kơ đei phara kiơ kơ bơ̆n pơrăm bơ̆n kơdih. Lui gơnang kơ bơngai kơhlôh kơwao gơih ăn tơdrong gĭt kăl, tơdrong gĭt kăl ‘nâu ưh kơ đei ba trŏ thoi tơdrong bơ̆n kơnhăm, jing tơdrong jang tơdă hơmet ‘noh ưh kơ jing, gô pơm ăn kơ tơpôl dah mă bơngai ayăt sư gô che bơle yua kơ tơlĕch nơ̆r pơma ưh kơ trŏ. Pơm thoi noh jing pơm pơrăm kơdih bơ̆n. Yua kơ thoi noh, kon pơlei Kră Yang kăl kơ rơih iŏk bơngai tơnăp păng hơgei wă bơ̆jang dôm tơdrong Kră Yang pơjao. ‘Nĕ pơjao tơdrong jang ăn kơ bơngai ưh tam mă wơ̆ ‘lŏ gah bơhngol dah mă bơngai ưh kơ chu pŭ iŏk.
Mă ‘bar, athei băt thoi kơnăl thoi âu bơngai kơwao pơm glăi kơ nơ̆r bơngai hơgei. “Nơ̆r pơđơ̆k lăm ‘bơ̆r lu bơngai kơtul kơwao. Kŭm thoi jơ̆ng bơngai jo ưh kơ gơh yak.” (trong 7); dah “Nơ̆r pơđơ̆k lăm ‘bơ̆r lu bơngai kơtul kơwao. Thoi jơla trŏ ti bơngai suai sik.” (trong 9). Jơ̆ng jo, djưl khư̆i, hơmren wă khan jơ̆ng ưh pă gan yua bơ̆jang bơih; dah minh pôm jơla lăm tơpang ti bơngai suai kơ sik đom mălei sư ưh kơ mơn kơ jĭ yua kơ sư ưh kơ băt wă jeh iŏk jơla. Kư̆m thoi noh mơ̆n, nơ̆r pơđơ̆k lăm ‘bơ̆r bơngai hơgei đei yua ba ăn tơdrong dŏng pơklaih, mălei lăm ‘bơ̆r bơngai kơtul kơwao, pơm pơrăm păng ưh kơ đei yua. Bơngai kơtul kơwao phŏ sư pơma gơh, pơma hơgei mălei akâu sư kơdih ưh kơ pơm kiơ̆ thoi nơ̆r bơtho noh. Sư bơtho hơgei thoi tơdrong pơđơ̆k mălei arih glăi ưh kơ kiơ̆ tơdrong tơpăt pơm pơrŭng lăm tơdrong tơpôl. Kon pơlei Kră Yang kăl pơ’lơ̆ng lăm tơdrong rơih chă bơngai bơtho klah asong Nơ̆r Kră Yang. Lu bơngai arih lăm tơdrong hli yom kơ Kră Yang đĕch na bơtho trŏ thoi Kră Yang wă.
Mă pêng, pơyom dah yua bơngai kơtul kơwao jing pơrăm “Pơyom kơ bơngai kơhlôh kơwao. Thoi tah tơmo lăm hră tơ’bla… Bơngai bu mưng bơngai kơtul kơwao păng bơngai tơmoi rok trong. Thoi minh ‘nu bơngai prah hră ‘bơm lơ bơngai rơka.” (trong 8, 10). Ưang dah pơjao tơdrong jang ăn kơ bơngai kơtul kơwao ‘noh dan sư ‘bơ̆t anih krê hơmơt, ‘bơm tơdrong jang kơnê̆ kơ tơpôl. ‘Nĕ kơ rơih bơngai yua kơ lăng sư adrin dêh, mălei athei rơih bơngai tơdrong arih sư hli yom kơ Kră Yang.
Ơ Kră Yang, apinh Ih ăn kơ inh gơh hơgei tơpă, băt kơnăl lăm tơdrong tơ’bưh dih băl wă weh wer đơ̆ng tơdrong kơtul kơwao. Apinh Kră Yang hơmet tơdrong arih inh wă kơ inh jing bơngai trŏ kơ Ih lui gơnang, arih lăm tơdrong tơpăt păng gơh hơgei lăm Ih, krao khan yua anăn Kră Yang Yêsu Krist, Amen.
Tơdrong bơ̆n arih hăm pơm kơ bơngai nai lui gơnang na pơjao ăn tơdrong jang Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: : I Kôrintô 11
Kênh Youtube BHKTHN:
