Bơtho Khôi Juăt 32:15-18
“Lu sư achăng lê̆ Kră Yang ‘Bok Kei-Dei, Tơ’ngla mă pơjing lu sư, păng pơjăm lê̆ Tơmo Tih mă dŏng pơklaih.” (Bơtho Khôi Juăt 32:15b)
Nơ̆r jet tơchĕng pơwao:
– Kon pơlei Israel achăng lê̆ Kră Yang ‘Bok Kei-Dei kơplah layơ lăm tơdrong arih sư?
– Kră Yang ơh blĕk thoi yơ hăm kon pơlei Israel?
– Đơ̆ng lu kon pơlei Israel pơmat, đei tơ’blŏk ăn kơ lu bơ̆n tơdrong kiơ?
Đơ̆ng rŏng kơ roi tơdrong tih tin mă ‘Bok Kei-Dei tơgŭm kon pơlei Israel lăm ‘bai hơri sư, ‘bok Môis khan tơbăt adrol hăm kon pơlei Kră Yang gah tơdrong jô̆ yoch, pơih blŭng a lăm trong 15 noh bơih nơ̆r roi gah kon pơlei Isreael akâu sư bek lơluĭnh păng arih sa hiôk jơnap lăm Dêh char Kră Yang Pơkă. Lăng tơdrong arih tôm mah rơkah kơkai bơih, kon pơlei rai băt bơnê kơ Kră Yang păng ‘mêm kơ Kră Yang lơ hloh, lăng rŏ kơ mơdrŏng noh mă jing chông trong truh lăm măng mu lăm tơdrong roi hơ’mon kon pơlei Isơrael, yua kơ đơ̆ng phĭ mah kon pơlei jing pơyơ̆r tơmam soi ăn kơ lu yang kơnê̆, năm kơkuh kơ rup yang mă lu sư ưh tam lah băt, noh lu rup yang hiong răm mă ‘bok yă lu sư ưh kơ lai yơ hli yom (trong 17).
Ưh kơ đei bu mă kĕ hlôh đi tơdrong ‘Bok Kei-Dei hil mĭl thoi yơ kơplah ‘bôh kon pơlei pơm dôm tơdrong hiong răm thoi noh, truh tơ bok Môis kư̆m yua nơ̆r “ tơblĕk” , “ pơting” wă khan “ hil gar” wă roi gah tơdrong blĕk ‘Bok Kei-Dei, trŏ kơ pơma, tơdrong yoch kon pơlei Israel ưh kơ sĭ minh tơdrong ưh kơ băt bơnê kơ Kră Yang đĕch, mă tơdrong yoch hloh noh lu sư achăng ‘Bok Kei-Dei bơih mă Tơ’ngla pơjing lu sư păng dŏng pơklaih đơ̆ng dêh char pơm đĭch ră mă gơh jing minh adrĕch Kră Yang rơih iŏk, yua kơ hơngah đơ̆ng tơm, achăng lê̆ Tơ’ngla đei tơdrong mơsêh bơwei păng wei lăng lu sư, pơm ăn kơ adrĕch kon pơlei Israel đơ̆ng rŏng lĕch đak măt pă hrĕng tơchĕng hmach pă đĭ.
Kơplah tơ’bơ̆p hăm tơdrong anat lăm chăl arih, lu bơ̆n ngăl chĕp kơjăp lăm Kră Yang wă krao apinh, mă-lei kơplah tôm tơdrong tơproh ‘lơ̆ng, rai ‘bônh, lu bơ̆n ngăl ‘bônh kơ achăng Kră Yang. Kơplah tơdrong jang sa đei ‘bônh, lu bơ̆n ngăl ‘bônh hiơt kơ đĭ lu tơdrong ‘lơ̆ng mă Kră Yang ăn kơ lu bơ̆n. Kơplah noh, lu bơ̆n lăng kơdih ưh pă kăl kơ Kră Yang dơ̆ng bơih, đơ̆ng noh rai ataih đơ̆ng Kră Yang, păng hơtuch jing achăng tŭk Kră Yang lĕch đơ̆ng chăl arih lu bơ̆n, đêl mơn đơ̆ng tơdrong pơmat-tat kon pơlei Isơrael, đei tơ’blŏk kơ lu bơ̆n minh tơdrong, arih ưh kơ băt bơnê noh wă pơtơm lăm tơdrong pơ̆k huŏng, păng achăng Kră Yang noh tơdrong rai răm lăm chăl arih, kơplah arih hăm jơhngơ̆m băt bơnê kơ Kră Yang, hlôh băt kơnăl kơ ‘Bok Kei-Dei bơih Tơ’ngla pơjing lu bơ̆n, dŏng pơklaih lu bơ̆n, tôm tơdrong lu bơ̆n đei noh đơ̆ng Sư ăn ngăl, lu bơ̆n arih trŏ thoi tơdrong đơ̆ng Sư pơjing, păng tơdrong arih lu bơ̆n đei yua kơ Kră Yang rai lơ hloh.
Lu bơ̆n hăm ‘blŏk kơ Kră Yang hơnơ̆ng ưh păng gơnang kơ Sư kơplah tơdrong arih tơproh ‘lơ̆ng, đei ‘bônh?
Kơkuh kơ Ih ơ Kră Yang, Ih bơih Tơ’ngla pơjing lu nhôn, dŏng pơklaih lu nhôn, apĭnh tơgŭm lu nhôn arih hăm jơhngơ̆m băt bơnê kơ Ih, ling lang năm kiơ̆ trong Ih wă mă khan tơdrong arih pơmat dah đei‘bônh, yua anăn Kră Yang Yêsu Krist. Amen.
Đŏk Sơ̆p hla bơar ‘Bok Kei-Dei lăm pêng sơnăm: II Samuel 20.
Kênh Youtube BHKTHN:
