Tơdrong jang 4:23-31
“’Bok Kei-Dei ăn kơ bơ̆n Yang Bơhngol ‘Lơ̆ng Sư. Na Yang Bơhngol ‘Lơ̆ng ưh kơ wă ăn kơ bơ̆n jơhngơ̆m lêl ôh, Sư ăn kơ bơ̆n jơhngơ̆m nuih kơtang. Sư ăn kơ bơ̆n gơh ‘mêm kơ ‘Bok Kei-Dei păng bôl buăl bơ̆n mơ̆n păng ăn kơ bơ̆n jơhngơ̆m chơ̆n tơpă.” (II Timôthê 1:7)
Nơ̆r jet tơchĕng pơwao:
– Kơplah bre ‘bok Pêtrôs păng Yôhan lĕch đơ̆ng hnam phak, Khul Bơngai Lui đei pơm kiơ?
– Đei tơdrong kiơ truh kơplah Khul Bơngai Lui pôm jơhngơ̆m đon krao khan?
– Tơdrong roi hơ’mon âu pơtrŭt jơhngơ̆m lu bơ̆n adrin pơm kiơ ăn kơ Khul Bơngai Lui lăm tơdrong chă bơtho Tơdrong ‘Nao ‘Lơ̆ng?
Lu bơngai pơhrăm păng Kră Yang blŭng a chu iŏk tơdrong pơm kơnê̆ krưp dêh yua kơ tơdrong lui păng tơdrong chă bơtho Tơdrong ‘Nao ‘Lơ̆ng. Lăm Sơ̆p hla bơar âu, ‘Bok Pêtrôs păng ‘bok Yôhan đei rôp tah tơhnam phak. Bre sư đei jet tơdrong ‘bơ̆t anăp lu ‘bok pơgơ̆r teh đak gah tơdrong đei pơklaih bơngai hơwen hơwo ‘bơ̆t ‘Măng Tơm ‘Lơ̆ng Rŏ. Lu sư mơn đêl hlôi đơ̆ng tơdrong đe hil pơm kơnê̆ yua kơ bơtho Tơdrong ‘Nao ‘Lơ̆ng Kră Yang Yêsu (Tơdrong jang 4:1-12). Đơ̆ng rŏng kơ noh kơplah tơlĕch đơ̆ng hnam phak ăn rơngei, bre sư đei năm tơ’bơ̆p lu bơngai pơhrăm nai wă kơ roi dôm tơdrong đei truh. Đơ̆ng rŏng kơ noh, lu sư pôm jơhngơ̆m đon pơtơm krao khan. Đei lơ tơdrong lăm nơ̆r lu sư đei krao khan adrol kơ noh. Lăm trong 29, lu sư krao khan “Ơ ‘Bok Kei-Dei, lu sư oei hil kơ nhôn khă nhôn bơtho Tơdrong Yêsu; na dang ei nhôn apinh Ih tơgŭm lu nhôn đĭch đam Ih, wă kơ nhôn nuih chă bơtho nơ̆r Ih kơ kon bơngai.” Pơma pha ‘biơ̆, lu sư krao apinh Kră Yang ăn kơ lu sư jơhngơ̆m nuih kơtang ưh kơ wă ngăn hreh kơplah đe hil areh, ưh kơ wă lêl hli tơrơ kơplah đe pơm kơnê̆ mălei rai pran hloh năm chă bơtho Tơdrong ‘Nao ‘Lơ̆ng.
Nơ̆r krao khan đơ̆ng lu bơngai pơhrăm păng Kră Yang pơm kơ lu sư nuih ưh kơ hli tơdrong đe pơm kơnê̆ păng tơdrong pơlong mă lu sư đei tơ’bơ̆p kơplah chă bơth Tơdrong ‘Nao ‘Lơ̆ng Kră Yang Yêsu. Mă khan thoi ei ră, rai tơ’bơ̆p tơdrong gleh glăn anat anot rai pran kơtang lăm tơdrong krao khan kư̆m thoi gơnang kơ Kră Yang Yêsu hloh dơ̆ng wă kơ đei jơhngơ̆m pran păng nuih kơtang oei chă bơtho Tơdrong ‘Nao ‘Lơ̆ng. Lu sư krao khan apinh Kră Yang ăn kơ lu sư pơ̆n nuih wă bơtho Nơ̆r Sư, păng pơm tơdrong mơsêh mơyang păng tơdrong hlĭch chrơp yua Anăn “Đĭch đam ‘Lơ̆ng Rơgoh Sư jơ̆ Kră Yang Yêsu” (trong 30). Tơdrong âu wă tơ’bôh jơhngơ̆m wă pơkeh nơ̆r Kră Yang tơtă kơ lu sư hăm jơhngơ̆m đon lui ngeh kơplah đei tơdrong gleh truh.
Trong 31 đei chih roi lĕch yua đơ̆ng nơ̆r lu sư krao khan “Lăp lu sư khan đang bơih, hnam sư mă akŭm ei adrŏ kyĭng kyăng. Đĭ đăng lu sư ‘bĕnh kơ Yang Bơhngol ‘Lơ̆ng na jing nuih tơpă bơtho nơ̆r ‘Bok Kei-Dei .” Mơn đei mơsêh mơyang âu tơgŭm lu sư bơtho nơ̆r Kră Yang rai pran kơtang hloh dơ̆ng. Tơdrong “Adrŏ kyĭng kyơ̆ng” ‘bơ̆t anih ‘nâu wă pơsĭt tơdrong mơsêh mơyang đei Kră Yang wei lăng păng oei hơdai. Tơdrong wă tơ’bôh Kră Yang mơ̆ng nơ̆r lu sư krao khan na ăn nuih pran đơ̆ng lu nơ̆r tơtă năm chă bơtho Tơdrong ‘Nao ‘Lơ̆ng.
‘Nâu jơ̆ Sơ̆p hla bơar ‘Bok Kei-Dei mă pran dêh păng ‘bĕnh hăm tơdrong hưch hanh mă kăl dêh lĕch đơ̆ng tơdrong krao khan, đon lui păng gơnang kơ Yang Bơhngol ‘Lơ̆ng kơplah tơ’bơ̆p tơdrong đe pơm kơnê̆. Tơdrong âu pơdrŭt păng bơtho tơ’bôh kơ Khul Bơngai Lui dang ei athei đĭ jơhngơ̆m krao khan kơ Khul Bơngai Lui lăm tơdrong chă bơtho Tơdrong ‘Nao ‘Lơ̆ng Kră Yang Yêsu Krist kơplah lăm teh đak hil areh pơm kơnê̆ kơ tơdrong lui lu bơ̆n.
Ơ Kră Yang, apinh Ih ăn kơ inh đei jơhngơ̆m nuih kơtang păng đei jơhngơ̆m pran wă kơ inh huay kơ hli kơplah bơtho Tơdrong ‘Nao ‘Lơ̆ng mă khan đei tơdrong đe pơm kơnê̆. Apinh Ih tơgŭm Khul Bơngai Lui kơ Ih wă mơn đei tơdrong mơsêh mơyang đơ̆ng Yang Bơhngol ‘Lơ̆ng kơplah pôm jơhngơ̆m đon krao khan. Yua anăn Kră Yang Yêsu Krist, Amen.
Lu bơ̆n hăm đĭ jơhngơ̆m krao khan kơ Khul Bơngai Lui wă kơ nuih kơtang lăm tơdrong chă bơtho Tơdrong ‘Nao ‘Lơ̆ng ưh?
Đŏk Sơ̆p hla bơar ‘Bok Kei-Dei lăm pêng sơnăm: II Hơ’mon 8
Kênh Youtube BHKTHN:
