I Pêtrôs 5:5-7
“Bơ̆n athei pơjao kơ Sư dôm tơdrong bơ̆n sơ’ngon jơ̆l hăt phăt-ol, yua kơ Sư wei-lăng bơ̆n.”
(I Pêtrôs 5:7)
Nơ̆r jet tơchĕng pơwao:
– Tơdrong kiơ pơm kơ lu bơngai lui mơ’nah kơdŭn lăm trong yak kiơ̆ Kră Yang?
– Kră Yang gô hiơ̆k wei lăng kon pơlei Sư thoi yơ?
– ‘Bai pơhrăm ‘nâu bơtho pơtrŭt kơ bơ̆n tơdrong kiơ lăm trong yak kiơ̆ Kră Yang?
Bơngai lui arih lăm teh đak ưh kơ weh wer ôh đơ̆ng dôm tơdrong hiơ̆k bơngơ̆t tơtăm, tơdrong gleh pơmat, tơdrong pơlong, păng tơchĕng oei lăm sơlŭng jrŭ ưh pă hơmĕng. Dôm tơdrong noh bơih pơgăn pơm kơ bơngai lui mơ’nah apinh jet kơdih “Kră Yang hăm ‘bôh tơdrong inh ưh?” đei tơdrong jing chhur nuih, păng kơdŭn lăm trong yak kiơ̆ Kră Yang.
Mălei rim bơngai lui kăl kơ ‘blŏk Kră Yang gô wei lăng tôm tơdrong bơ̆n, mă khan dôm tơdrong bơ̆n tơ hôih ưh kơ gơh pơma. Mă khan lei ră, wă kơ Kră Yang wei lăng, bơ̆n kăl kơ “iŏk jơhngơ̆m đon dim,… athei chu ala kơ ‘Bok Kei-Dei ngăl yua kơ Sư Yang” (trong 5-6). Kơplah bơ̆n iŏk đon ala păng lui gơnang kơ Kră Yang pơgơ̆r, chu Kră Yang bơtho tơ’bôh lei na gơh pơma thoi ‘bok Jôsep pơma hăm lu ‘nhŏng sư khan: “Đĭ lu ‘nhŏng wă pơrăm inh ră, mă-lei Kră Yang ‘Bok Kei-Dei pơm kơ inh đei yua, wă kơ dŏng pơklaih lơ bơngai, thoi noh dôm tơdrong mă đei truh dang ei păng oei wă wei rong tơdrong arih lơlang-lơlap kon pơlei.” (Blŭng a 50:20). Tơ’ngla ‘Bok Kei-Dei ưh kơ sĭ bơngai bu ôh, “… na trŏ năr Yêsu Krist jur ning mônh Sư gô pôk pơ ư iĕm.” (trong 6).
Bơ̆n lui ngeh tơpă Kră Yang gô hiơ̆k wei lăng kiơ̆ thoi nơ̆r Pêtrôs bơtho “Sư ‘mêm kơ bơ̆n tơpă na Sư mah ăn Kon pôm Sư lôch tang kon bơngai. Thoi noh bơ̆n băt Sư wă tơgŭm bơ̆n tôm tơdrong nai hai mơ̆n.” (Rôm 8:32). Mă khan thoi ei, tơdrong mă pơm kơ bơ̆n tam mă iŏk tơdrong Kră Yang hiơ̆k wei lăng yua kơ bơ̆n tam mă đei đon lui tơpă wă pơjao tơdrong trăp bơ̆n kơ Kră Yang. Thoi noh wă kơ Kră Yang wei lăng bơ̆n, tơdrong bơ̆n kăl kơ pơm noh “Bơ̆n athei pơjao kơ Sư dôm tơdrong bơ̆n sơ’ngon jơ̆l hăt phăt-ol, yua kơ Sư wei-lăng bơ̆n.” (trong 7). “Dôm tơdrong bơ̆n sơ’ngon jơ̆l hăt phăt ol” ưh kơ sĭ lăp roi kơ Kră Yang dôm tơdrong bơ̆n sơ’ngon đĕch ôh, mălei bơwei dôm tơdrong bơ̆n tơchĕng khan bơ̆n kĕ pơm. Rim ‘nu bơngai lui kăl kơ ‘blŏk păng khan thoi âu: “Ơ Kră Yang Ih gô pơjing tơdrong hiôk-hian ăn kơ lu nhôn. Dôm tơdrong lu nhôn pơm noh jơ̆ Ih pơm ăn kơ nhôn bơih!” (Êsai 26:12).
‘Bai pơhrăm ‘nâu pơtrŭt bơ̆n kơplah tơ’bơ̆p hăm tơdrong gleh pơmat, tơdrong pơlong, tơplih kơ bơ̆l hăl, chrih hil, đon lui kơdŭn, lei na athei adrin kơjăp, lui gơnang kơ Kră Yang tôm tơdrong. Yua kơ Kră Yang bơih Tơ’ngla ‘mêm mơnat kơ bơ̆n gô ăn tơdrong ‘lơ̆ng hloh kơ bơ̆n kiơ̆ kơ jơ Sư ăn. ‘Nĕ kơ hăt chă tơdrong tơgŭm đơ̆ng kon bơngai, mălei athei năm tơ Kră Yang, tăm kŭl tăng, roi dôm tơdrong rơdu kơ’bah bơ̆n kơ Kră Yang păng “Bơ̆n athei pơjao kơ Sư dôm tơdrong bơ̆n sơ’ngon jơ̆l hăt phăt ol, yua kơ Sư wei lăng bơ̆n” (trong 7).
Ơ Kră Yang, inh bơnê kơ Ih yua kơ tơdrong ‘mêm păng tơdrong Ih hiơ̆k wei lăng tih dêh mă Ih ‘măn kơ inh. Apinh Ih tơgŭm inh thim jơhngơ̆m lui pran kơjăp, iŏk đon ala păng iơ̆m dim wă kơ inh tơnăp năm kiơ̆ trong brŏk tơ pơlei ‘lơ̆ng, mă khan tơdrong arih thoi yơ hĭ, krao khan yua anăn Kră Yang Yêsu Krist, Amen.
Bơ̆n gô tơ’bưh hăm tơdrong gleh pơmat, pơlong lăng thoi yơ kơplah băt Kră Yang gô ling lang wei lăng?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Tơ’bôh 3
Kênh Youtube BHKTHN:
