Bơtho Khôi Juăt 32:26-33
“Tơdah Kră Yang Tơmo Tih ưh kơ đei tĕch lu sư, kư̆m ưh kơ jao lu sư kơ lu bơngai ayăt, pơm liơ lăp minh ‘nu đĕch gơh druh puh lê̆ minh-rơbâu ‘Bar ‘nu gơh druh mơjĭt rơbâu ‘nu kơdâu?”
(Bơtho Khôi Juăt 32:30)
Nơ̆r jet tơchĕng pơwao:
– Tơdrong kơkuh kơ rup yang pơm kơ kon pơlei Kră Yang jing hiong tơdrong hlôh băt thoi yơ?
– Tơdrong tơblah kĕ jei dah thuơ lăm kon pơlei Israel hăm lu drĕch tơmoi nai noh kiơ?
– Dah tŭk lê̆ Kră Yang tơ ‘nguaih lăm tơdrong arih bơ̆n lei lu bơ̆n thoi yơ?
Kiơ̆ kơ tơdrong đơ̆ng đei, lơ bơngai ngăl đei tŭk tơdrong kiơ noh ưh kơ ‘lơ̆ng wă kơ đei tơdrong ‘lơ̆ng hloh. Mă-lei kon pơlei Israel jơ̆ minh adrĕch pha kơ noh, lu sư ưh kơ chu nơ̆r khan tơbăt đơ̆ng Kră Yang wă achăng lê̆ tơdrong ‘lơ̆ng hloh păng tơplih iŏk tơdrong kơnê̆ ‘mê̆ ‘mach hloh. Pơma mă rơđah noh kon pơlei Israel achăng Kră Yang ‘Bok Kei-Dei mă tu tơm dŏng pơklaih păng khêl bơwei lăm rim khei sơnăm, mă druh kiơ̆ lu rup yang hiong răm, jơ̆ rup yang ưh kơ hlôh, pă băt kơplah lu sư krao apinh.
Tơdrong kơkuh kơ lu rup yang adrĕch tơmoi ưh kơ sĭ pơrăm tơdrong hiôk hơđơ̆ng lăm teh đak, phĭ tơnŏ tôm mah rim năr, mă pơm kơ kon pơlei Israel jing kơ’bah kơ tơdrong gơh hơgei păng tơchĕng ưh kơ hơdah hơdong (trong 28). Tơdrong tơchĕng kơ’bah noh pơm ăn kơ ưh kơ ‘bôh, lu sư blah ưh kơ kĕ kơ adrĕch tơmoi ưh kơsĭ yua kơ lu sư ưh kơ kĕ pran gah linh dah gơh kĕ pran, mă-lei yua kơ ‘Bok Kei-Dei pơjao lu sư lăm tơpang ti lu bơngai ayăt, tơdrong âu wă pơma rơdah gah rơbâ̆u khul linh kon pơlei Israel kơdâŭ tơrơ đơ̆ng minh ‘nu linh adrĕch tơmoi, tơdrong mă trŏ kơ ‘maih hiĕk noh khul linh mơjĭt rơbâ̆u kơdâ̆u klĕnh kơ ‘bar ‘nu adrĕch tơmoi druh, tơdrong hiôk hơđơ̆ng phĭ mah gah mŭk tơmam pơm kơ kon pơlei Israel hiơt đĭ tơdrong pham lĕch ưh kơ đơ̆ng pran mă ‘bok yă lu sư đêl mơn ‘Bok Kei-Dei bơih Kră Yang blah dŏng.
Tơdrong jang lê̆ Kră Yang tơ cheng ‘nguaih kơ lăm chăl arih lăm tơdrong wă pơm mă tơdrong tih dah tơdrong iĕ lăm tơdrong arih noh pơm ăn jing đei tơdrong chhur nuih ơh sơ ’ngon. Ưh kơ đei bu nai mă tơpă noh trŏ kơ lu bơ̆n bơih jing pŭ iŏk tơdrong răm trăp dêh noh, đơ̆ng lu bơ̆n rơih iŏk trong ưh kơ đei Kră Yang năm hơdai, lu bơ̆n pŭ trăp kơdih păng tơ’bơ̆p lơ tơdrong gleh anat lăm chăl arih mă ưh kơ đei tơdrong dŏng tơgŭm đơ̆ng Kră Yang ‘Bok Kei-Dei. Đei lơ wơ̆t lăm trong yak kiơ̆ Kră Yang, lu bơ̆n tơchĕng khan bơ̆n gơh kĕ tôm tơdrong kiơ̆ thoi kơdih wă, lê̆ tơcheng tơdrong tơ’blŏk đơ̆ng sơ̆p hla boar nơ̆r ‘Bok Kei-Dei, păng pŭ iŏk đơ̆ng tơdrong jang ưh kơ hlôh ‘bôh pơmat-tat pă kĕ jing. Lu bơ̆n kăl kơ băt kơnăl, kĕ jei dah thuơ, keh jing dah ưh kơ kĕ jing, tôm tơdrong noh lăm tơpang ti mơsêh mơyang Kră Yang, pă đei bu nai, noh ‘Bok Kei-Dei bơih Kră Yang kơ tơdrong tơblah.
Kơkuh kơ Kră Yang, Ih bơih‘Bok Kei-Dei kơ tơdrong tơblah, apĭnh Ih bơtho inh wă kơ gơnang tơpang ti Ih, tơnăp yak kiơ̆ trong minh Ih đĕch, păng ling lang sơng iŏk Ih pơgơ̆r lăm chăl arih Inh mă lăm tơdrong tih dah tơdrong iĕ, yua Anăn Kră Yang Yêsu Krist. Amen!
Lu bơ̆n đêl mơn đei ơh sơ’ngon tơdrong kiơ kơplah tŭk lĕ Kră Yang đơ̆ng lăm chăl arih bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: Luka 22
Kênh Youtube BHKTHN:
