Markôs 10:32-34
“Sư khan: Iĕm mơ̆ng bĕ. Bơ̆n năm tơ Pơlei Jêrusalem. Tơ ei kơnh đe wă rôp Inh Kon Bơngai, jao kơ lu ‘bok soi tih păng lu thây bơtho tơdrong juăt đe Juđê. Lu sư gô sek tơlang tơdrong Inh, jao Inh kơ lu bơngai dêh đe pơlôch. Lu dêh đe ei gô hiĕk achơ̆ kơ Inh, kơsoh pơ’brơh kơ Inh đak hai păng teh tach pơjĭ Inh, klaih kơ noh pơlôch hloi. Mă-lei kơtĕch pêng năr đơ̆ng rŏng Inh gô iung arih dơ̆ng.”
(Markôs 10:33-34)
Nơ̆r jet tơchĕng pơwao:
– Lăm trong năm tơ Jêrusalem, Kră Yang Yêsu đei khan lê̆ adrol kơ lu bơngai pơhrăm păng Sư tơdrong kiơ gô truh hăm Sư?
– Iŏk đơ̆ng noh, lu bơ̆n pơhrăm iŏk tơdrong hơyơ ăn kơ chăl arih bơ̆n kiơ̆ Kră Yang?
Kră Yang Yêsu păng lu bơngai pơhrăm păng Sư rok trong năm tơ Jêrusalem. Kơplah ‘bôh Kră Yang pran dêh yak adrol, “lu bơngai pơhrăm păng Sư mah prưn kơ jơhngơ̆m” ( trong 32). Lu sư băt anih âu oei răp gô Kră Yang lơ tơdrong ưh kơ ‘lơ̆ng na lu sư tơtăm, ưh kơ hơđơ̆ng. Kră Yang băt lăm jơhngơ̆m lu bơngai pơhrăm păng Sư na Sư roi lê̆ adrol hơđăl nhen păng tôm tơdrong gah dôm tơdrong kiơ gô truh hăm Sư: Tơ ei kơnh đe wă rôp Inh Kon Bơngai, jao kơ lu ‘bok soi tih păng thây bơtho tơdrong juăt đe Juđê, lu dêh đe ei gô hiĕk achơ̆ kơ Inh, kơsoh pơ’brơh kơ Inh đak hai păng teh tach pơjĭ Inh, klaih kơ noh pơlôch hloi. Mă-lei kơtĕch pêng năr đơ̆ng rŏng Inh gô iung arih dơ̆ng. ‘Nâu wơ̆t mă pêng Tơdrong ‘Nao ‘Lơ̆ng Markôs đei chih nơ̆r Kră Yang khan lê̆ adrol gah tơdrong jĭ pơmat păng iung arih (Markôs 8: 31; 9:31; păng 10:33-34). Đơ̆ng noh, lu bơ̆n pơhrăm iŏk dôm ‘bai pơhrăm ‘bĕnh hăm tơdrong pơtrŭt lăm bơyan ‘blŏk hơdơ̆r kơ Kră Yang chu iŏk jĭ jăn pơmat tat păng iung arih sơnăm ‘nâu:
Mă mônh, rok trong pơmat tat Kră Yang năm truh ưh kơ sĭ khan ưh kơ pơrơ̆ng, ‘bơ̆t dei dei dah pơgŏ pơđep. Kră Yang yak năm trong ‘noh ‘bôh rơđah hơđăl, hăm jơhngơ̆m chu yom tôm tơdrong kiơ̆ thoi Yang ‘Bă đei proh hơmet lê̆ bơih wă pơklaih kon bơngai. Yua thoi noh, mă khan băt lê̆ tơdrong gô truh mă trăp anat dêh mă-lei Kră Yang ưh kơ kơdâu ôn mă lei năm tơ anăp “‘nĕ kơ pơm kiơ̆ Inh wă mă-lei pơm kiơ̆ thoi Ih wă” (Markôs 14:36). Chăl arih kiơ̆ Kră Yang lu bơ̆n ưh kơsĭ khan hiôk hian, đei lơi yua ôh, apinh Kră Yang ăn kơ lu bơ̆n ling-lang krăng kơchăng chu yom Kră Yang, oei kơjăp yak năm kiơ̆ Sư, yua kơ băt kơKră Yang lu bơ̆n yak năm trong ‘noh hơdrol kơ lu bơ̆n.
Mă ‘bar, Kră Yang Yêsu khan lê̆ hơdrol đe gô pơlôch Inh kơtĕch pêng năr đơ̆ng rŏng gô iung arih dơ̆ng. Pơtrơp đơ̆ng rŏng kơ jĭ jăn pơmat tat gô iung arih ‘lơ̆ng rŏ. Lăm tơdrong arih hăm Kră Yang, lu bơ̆n kư̆m ưh kơ weh wer kơ tơdrong tơ’bơ̆p hăm tơdrong truh, mă loi dơ̆ng gô truh kơ tơdrong lôch. Tơm sư tơdrong Kră Yang iung arih đơ̆ng lôch ba ăn kơ lu bơ̆n đei jơhngơ̆m pran wă kơkĕ hlôi, yua kơ bơ̆n lui ngeh kơ đơ̆ng arih pơmat tat hrei hrei ‘noh jơ̆ arih ‘lơ̆ng rŏ ling-lang. Apinh Kră Yang ăn kơ lu bơ̆n ling-lang oei kơjăp yak năm lăm trong gleh pơmat, ưh kơ gleh lap bơ̆l hăl, ưh kơ kơdŭn tơrŏng, yua kơ bơ̆n băt wă năm truh tơ tơdrong ‘lơ̆ng rŏ lăm tơdrong iung arih dơ̆ng ‘noh athei năm hlôi đơ̆ng tơdrong gleh glăn pơmat tat.
Lăm bơyan ‘blŏk kơ Kră Yang jĭ jăn pơmat tat sơnăm âu, rim ‘nu Bơngai Lui athei đĭ jơhngơ̆m pơkă hăm Kră Yang, inh gô đĭ jơhngơ̆m hŏk pơhrăm nơ̆r Ih wă kơ băt tơdrong Ih tơdă hơmet kiơ̆ thoi Ih lăp đon lăm chăl arih inh, ‘bôh nhen Kră Yang Yêsu wă kơ rok kiơ̆, gơnang kơ Kră Yang wă kơ kĕ jei đơ̆ng gleh pơmat, oei kơjăp yak năm kiơ̆ Kră Yang dĭng truh năr tơ’bơ̆p Sư lăm dêh char ‘lơ̆ng rŏ ling-lang.
Ơ Kră Yang Yêsu ‘mêm kơeng, bơnê kơ Ih yua kơ Ih lăp đon kơ inh yaknăm rok trong pơmat tat yua kơ tơdrong yoch inh. Apinh Ih ăn kơ inh oei kơjăp yak năm kiơ̆ Ih, mă anat anot thoi yơ mă-lei khŏm chu yom kiơ̆ thoi Ih wă. Yua anăn Kră Yang Yêsu Krist, Amen.
Lu bơ̆n hăm ling-lang chu yom Kră Yang păng oei kơjăp lăm jơhngơ̆m na yak rok trong gleh pơmat ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 33
Kênh Youtube BHKTHN:
