Galati 4:21-31
“Na gah bơ̆n dang ei, bơ̆n ưh kơ sĭ thoi kon mă akăn đĭch sư noh ôh, bơ̆n thoi kon mă akăn rơngei sư noh.” (Galati 4:31)
Nơ̆r jet tơchĕng pơwao:
– ‘Bok Pôl yua rup kon đơ̆ng bơngai drŏ-kăn đĭch tơpŭ păng kon đơ̆ng bơngai drŏ-kăn rơngei tơpŭ wă tơ’bôh pơdah ăn tơdrong kiơ?
– Yua kơ kiơ lu bơngai lui tơ Galati ưh kơ đơ̆ng adrin kơdih wă kơ Kră Yang ăn jing kon na pơsư̆ ăn mŭk tơmam gĭt găl tơ plĕnh?
– Bơ̆n kăl kơ bơ̆ jang tơdrong Kră Yang hăm jơhngơ̆m thoi yơ?
Bơngai Juđê,lu sư tơchĕng, lu sư lăng kăl dêh gah ‘bă dah ‘bok lu sư sơ̆ bu ‘nei, lăng kăl hloh kơ gah mĕ. Lăm kơthơ Galati, lơ wơ̆t ‘bok Pôl kư̆m khan kơ lu bơngai mă iŏk đŏk kơthơ sư noh thoi âu: “…dôm lu bơngai mă lui gơnang kơ ‘Bok Kei-Dei, lu sư noh dang lĕ kon sâu Abraham tơpă.” (Galati 3:7; lăng thim lăm Galati 3:29). Mă khan lei ră, ‘nâu tŏk-bŏk sư oei jet Lu bơngai lui tơ Galati lu mơ’nah ‘maih wă kơ đei Kră Yang Yêsu, lu mơ’nah ‘maih wơ̆t hơlơ̆k gơnang kơ tơdrong juăt Môis wă kơ ‘Bok Kei-Dei jô̆ ‘lơ̆ng tơpăt tơpă,sư khan: Mĕ lu iĕm bu?
Wă pơdah pơsĭt hăm lu bơngai lui ‘nâu hei, ‘bok Pôl iŏk rup‘bar ‘nu kon đơ̆ng ‘bar ‘nu akăn ‘bok Abraham sơ̆,’bok mă đei đon lui: Kon bơngai drŏ-kăn rơngei păng kon bơngai drŏ-kăn đĭch (Blŭng a chăl 16). Kon yă Hagar bơngai đĭch,yă Hagar “tơpŭ kon sư noh kiơ̆ kơ sĕch akar ‘maih wă” (tr.23,29), wă khan đơ̆ng tơdrong adrin kon bơngai wă kơ đei bơngai pơtrơp adrĕch păng sư “tơpŭ kơ kon sư noh wă pơm đĭch” (tr.24). Tơplơ̆ kơ ‘noh,kon mă “đơ̆ng bơngai drŏ-kăn rơngei tơpŭ noh, tơpŭ kiơ̆ kơ nơ̆r Kră Yang pơkă”, wă khan kon noh Kră Yang pơkă wă ăn kơ‘bok Abraham wă jing bơngai iŏk yua mŭk drăm đơ̆ng ‘bă. (tr.23), păng “đei tơpŭ kiơ̆ kơ Yang Bơhngol’Lơ̆ng” (tr.30). Lĕch sư, kon mă đơ̆ng bơngai drŏ-kăn đĭch tơpŭ kiơ̆ kơ tơdrong adrin kiơ̆ kơ sĕch akar ‘maih wă noh ‘bok Abraham puh tơjăk lê̆ tơ nai, ưh kơ gơh iŏk mŭk tơmam kiơ đơ̆ng ‘bok Abraham.
‘Bok Pôl ưh kơ lê̆ lu bơngai lui tơ Galati oei hơwơ̆l hơwang dơ̆ng ôh, sư pơma pơsĭt rơđah hơđăl tơdrong arih lu sư thoi âu: “Nge Isăk sơ̆ mĕ sư Sara tơpŭ kiơ̆ thoi ‘Bok Kei-Dei mơnat khan wă gô ăn kơ Abraham kon.Thoi noh na bơ̆n dang ei kư̆m le-lăi mơ̆n, bơ̆n jing kon ‘Bok Kei-Dei yua kơ Sư mơnat wă gô ăn kơ bơ̆n jing kon Sư.” (tr.28), “ Na gah bơ̆n dang ei, bơ̆n ưh kơ sĭ thoi kon mă akăn đĭch sư noh ôh, bơ̆n thoi kon mă akăn rơngei sư noh” (tr.31). Lu bơngai Galati kư̆m thoi ‘bok Isăk mơ̆n,lu sư gơh iŏk mŭk tơmam gah bơhngol mă đơ̆ng Kră Yang pơkă pơsư̆ ăn lu sư, wă khan tơdrong dŏng pơklaih thoi mŭk tơmam gah bơhngol đei bơih kơ lu sư. Lu sư ưh kơ kăl kơ adrin hăm tơdrong kĕ pran sĕch akar lu sư kơdih wă kơ trŏ lăp kơ Kră Yang iŏk jô̆ jing bơngai gơh iŏk mŭk drăm noh bơih.
Lăm teh đak âu, “mă tơmam kiơ kiơ, kư̆m gơh tơplih dih băl,tĕch tơrăt dih băl‘long sư kăp dôm âu dôm noh”,mă-lei tơdrong dŏng pơklaih ưh kơ gơh ôh tơplih hăm tơdrong pơm ‘lơ̆ng kơdih pơm kơ lơ bơngai mơn ưh hiôk lăp đon. Bơ̆n lơ ‘măng kư̆m lei-lăi thoi lu bơngai lui tơ Galati mơ̆n,’maih wă kơ đei Kră Yang Yêsu, kư̆m ‘maih wă pơm thim kiơ ei dơ̆ng ‘mơ̆i wă kơ mơn hiôk hơđơ̆ng lăm jơhngơ̆m khan tơdrong dŏng pơklaih mă đei kơ bơ̆n noh trŏ kơ đei bơih. Lơ bơngai adrin pơm ‘lơ̆ng kiơ̆ kơdih thoi kơ: pơyơ̆r jên tơmam, hưch hanh jang tơdrong jang Hnam Akŭm..v.v…, na ngeh ngăi đơ̆ngtơdrong bơ̆n jang, bơ̆n pơm noh trŏ lăp kơ gơh klaih! Kră Yang Yêsu jang keh tôm tơdrong kơpal‘long pơglang bơih, dôm tơdrong bơ̆n adrin pơm ‘lơ̆ng kơdih ưh kơ gơh ba ăn kơ bơ̆n tơdrong dŏng pơklaih ôh; mă-lei bơ̆n athei lui gơnang kơ Kră Yang Yêsu, Sư pơklaih bơ̆n đơ̆ng dôm tơdrong yoch,na bơ̆n pôm tơ’bôh jơhngơ̆m bơ̆n ‘mêm kơ Sư đĕch yua kơ Sư dŏng pơklaih bơ̆n bơih.
Kơkuh kơ Ih Kră Yang, apinh Ih tơgŭm inh kơkuh, awih awăn, pơyơ̆r kơ Ih jên tơmam, pơm ‘lơ̆ng hăm jơhngơ̆m hiôk kơ inh bơngai rơngei bơih yua kơ inh băt kơ inh đei iŏk bơih tơdrong Ih mơnat pơklaih. Inh krao khan yua anăn Kră Yang Yêsu Krist, Amen!
Bơ̆n hăm lui, hăm băt tơpă kơ bơ̆n đei iŏk bơih tơdrong Kră Yang pơklaih bơ̆n?
Đŏk Sơ̆p Hlabơar’Bok Kei-Dei lăm pêng sơnăm: Êsai 17-18.
Kênh Youtube BHKTHN:
