Klei Aê Diê Blŭ: Rôm 11:25‑36
Êlan kliăng: “Kyuadah Aê Diê brei leh jih jang mnuih jing mnă kơ klei amâo gưt asăp, čiăng kơ Ñu dưi pap brei kơ jih jang” (Rôm 11:32)
Klei êmuh ksiêm mĭn: Khua ƀĭng kna Y‑Pôl bi êdah ya klei hgăm hlăm hdră bi mtlaih Aê Diê mkra leh pioh kơ phung Israel leh anăn kơ phung tue? Ya klei hriăm drei mâo kơ klei Aê Diê pap? Ya klei bi hriăm drei mâo hlăm klei hdĭp klei đăo grăp hruê?
Khua ƀĭng kna Y‑Pôl mâo klei Yang Mngăt Jăk mtrŭt brei bi êdah hdră Aê Diê bi mtlaih pioh leh kơ phung Israel wăt kơ phung tue.
Hlăm ênuk ară anei hin, kyuadah mâo sa kdrêč hlăm phung Israel ăt bi khăng ai tiê kyuanăn Aê Diê pŏk leh ƀăng bhă klei bi mtlaih kơ lu phung tue (êlan 25). Drei thâo klei anei mơ̆ng klei Khua Yang Yêsu blŭ klei bi hriêng kơ klei huă ƀơ̆ng prŏng Ñu pioh leh kơ phung mnuih êgar čih yăl dliê hlăm Y‑Luk 14:15‑24. Aê Diê jing Pô thâo jih jang mnơ̆ng, Ñu ƀuh êlâo sơăi ya klei srăng truh. Khua Yang brei thâo truh sa hruê, tơdah ênŭm leh ênoh Aê Diê bi kčah kơ phung tue đăo kơ Aê Diê, Ñu srăng pŏk prŏng ƀăng bhă klei bi mtlaih kơ phung tue, hlăk anăn kơh “jih jang phung Israel srăng tlaih” (êlan 26). “Jih jang phung Israel” hlei phung diñu jing? Phung hriăm êlam Klei Aê Diê Blŭ mâo tlâo mta klei mblang kơ pruê̆ blŭ anei. Tal sa, jih jang phung Israel lač tinei jing jih jang phung đăo kơ Khua Yang Yêsu tar ƀar lăn ala. Tal dua, jih jang phung Israel jing jih jang phung ƀuôn sang Aê Diê ruah leh mơ̆ng ênuk đưm hlŏng kơ ară anei hin. Tal tlâo, srăng mâo klei bi êrâo prŏng ti čar Israel tơl jih jang mnuih gưl knhal tuč srăng wĭt đăo kơ Khua Yang Yêsu sơăi.
Drei đăo sĭt Khua Yang dưi ngă klei mnuih amâo dưi mĭn ôh. Khua Yang pô srăng “suôt jih klei amâo đăo mơ̆ng phung Yakôp”. Aê Diê jing Pô amâo mlih ôh, jih jang klei Ñu ƀuăn leh kơ phung ƀuôn sang Ñu ruah leh srăng bi sĭt (êlan 27).
Mâo sa anôk msĕ tinei jing phung tue wăt phung Israel tuôm bi kdơ̆ng hŏng Aê Diê leh sơăi, Ñu wir leh ƀô̆ mta Ñu mơ̆ng digơ̆, lui măng ai si digơ̆ čiăng hdĭp tui si klei kđeh digơ̆ tluh leh anăn mă tŭ boh mơ̆ng klei soh digơ̆ ngă leh. Ƀiădah, truh ti mmông Aê Diê bi kčah leh, Ñu srăng yơr kngan bi mtlaih phung tue, leh anăn truh gưl phung Israel. Klei bi mtlaih drei mă tŭ jing klei bi mtlaih kyua klei pap Aê Diê pioh kơ phung mnuih soh amâo mâo klei năng ôh, amâodah lač snei, klei bi mtlaih anăn kluôm dhuôm kbiă hriê mơ̆ng klei pap Ama drei hlăm adiê (êlan 28‑32).
Sĭt nik hdră Aê Diê bi mtlaih dlông leh anăn êlam êdimi amâo mâo pô dưi mblang ôh! Msĕ si Khua ƀĭng kna Y‑Pôl, drei knŏng thâo mpŭ mni leh anăn hơêč hmưi snei: “Ơ, êlam êdi klei mdrŏng Aê Diê, klei thâo mĭn leh anăn klei thâo săng Ñu! Si dưi mblang klei Ñu phat kđi! Leh anăn si dưi thâo săng klei Ñu ngă!” (êlan 33). Drei knŏng bi luă gŭ drei pô ti anăp klei pap Khua Yang leh anăn mă tŭ klei Ñu bi mtlaih kyuadah jih jang drei kbiă hriê mơ̆ng Ñu, kyua Ñu leh anăn kơ Ñu!
Si ngă drei thâo mơ̆ klei Aê Diê pap kơ drei prŏng êlam snăk?
Wah lač: Ơ Khua Yang, kyua klei Ih pap yơh sa čô mnuih soh msĕ kâo dưi tlaih mơ̆ng klei bi kmhal hŏng klei djiê leh anăn jing anak Ih khăp êdimi! Jih hruê kâo dôk hdĭp kâo srăng hơêč hmưi, mpŭ mni kơ Anăn Ih. Hưn klei Ih bi mtlaih kơ jih jang phung anak Ih klah đuĕ leh mơ̆ng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
