Loos 11:25-36
Nqe cim.
“Rau qhov Vajtswv ua kom txhua tus tsis mloog Vajtswv lus, Vajtswv thiaj zoo hlub lawv.” (Loos 11:32)
Lus nug rau sawvdaws xav:
– Timthawj Paulus nthuav tawm yam dabtsi nyob hauv tus Tswv txojkev npaj tseg cawmdim rau tus Tswv haivneeg thiab lwm haivneeg?
– Peb kawm tau yam dabtsi txog tus Tswv nplooj siab hlub tshua?
– Peb tau qhuab ntuas licas nyob hauv lubneej ntseeg txhua hnub?
Timthawj Paulus tau Vaj Ntsujplig tshoov los qhia tshwm Nws txojkev npaj tseg cawmdim rau cov Yixalayees thiab lwm haivneeg. Nyob rau lub sijhawm ntawd, vim ib feem neeg Yixalayees tseem muaj lub siab tawv ncauj, tus Tswv thiaj muab txojkev cawmdim nthuav dav mus rau lwm haivneeg lawm (nqe 25). Peb paub qhov no dhau zaj xwm Tswv Yexus piav txog tus Tswv rooj mov loj uas pub rau txhua tus qhua noj nyob hauv Lukas 14:15-24. Vajtswv yog tus paub txhua yam, Nws yeej paub ua ntej txhua yam yuav tshwmsim los. Tus Tswv qhia paub hais tias muaj ib hnub thaum Vajtswv coj lwm haivneeg los txhij lawm, ces tus Tswv yuav nthuav txojkev cawmdim rau Nws haivneeg, lub sijhawm ntawd “cov Yixalayees txhua tus yuav dim” (nqe 26). “Cov Yixalayees txhua tus” yog cov neeg twg? Cov tub sojntsuam Vajluskub muaj peb txojkev xav txog lo lus no. Thib ib, cov Yixalayees yog hais txog tagnrho cov Yixalayees uas ntseeg Tswv Yexus nyob thoob qabntuj. Thib ob, cov Yixalayees yog hais txog cov uas tau xaiv hauv tus Tswv haivneeg txij puag thaum ub los txog rau sijhawm no. Thib peb, yuav muaj ib txojkev hloov pauv ntawm cov Yixalayees ua rau txhua tus nyob tiam kawg puavleej tig los ntseeg Tswv Yexus.
Peb ntseeg hais tias tus Tswv yuav ua tej yam uas tibneeg xav tsis txog. Tus Tswv yuav “muab Yakhauj cov xeebntxwv tej kev txhaum tshem huv tibsi mus.” Vajtswv yog tus tsis pauv hloov, Nws yeej yuav ua tiav tej lus cogtseg pub rau Nws haivneeg cov yawgkoob (nqe 27).
Muaj ib qhov sib thooj ntawm no yog tagnrho lwm haivneeg thiab cov Yixalayees puavleej tau ntxeev siab rau tus Tswv, Nws fee plhu rau lawv, cia lawv ua neej li tibneeg txhaum kev ntshaw sab nqaij tawv thiab raug txim raws li lawv tej kev txhaum. Tiamsis, thaum txog tus Tswv lub sijhawm, Nws yuav cev tes los cawm lwm haivneeg, tomqab ntawd yog cawm cov Yixalayees. Txojkev cawmdim uas peb tau txais twb yog los ntawm tus Tswv txojkev hlub rau txhua tus tibneeg txhaum uas tsis tsimnyog txais, lossis txojkev cawmdim ntawd pib ntawm Leej Txiv saum ntuj txojkev hlub tuaj xwb (nqe 28-32).
Muaj tseeb li ntawd tiag! Tus Tswv txojkev npaj cawmdim loj siab thiab npluamias kawg, tsis muaj leejtwg yuav piav kom ntxaws tau! Zoo li Timthawj Paulus, peb tsuas paub ua Vajtswv tsaug thiab tsa suab qhuas hais tias: “Vajtswv yog tus uas muaj ib puas tsav yam nplua mias! Vajtswv muaj tswvyim thiab kev txawj ntse! Leejtwg thiaj yuav paub Vajtswv lub siab? Leejtwg thiaj yuav totaub tej uas Vajtswv ua?” (nqe 33). Peb tsuas paub nyo hau ua tsaug rau tus Tswv txojkev hlub, txais yuav Nws txojkev cawmdim xwb.
Thov Vajtswv,
Tus Tswv! Los ntawm Koj txoj kev hlub, tus neeg txhaum li nyuam yaus thiab tsis raug txim tuag thiab tau ua tus menyuam uas Koj hlub! Thov kom nyuam yaus lubneej nco ntsoov Koj txiaj ntsig, txhawb nqa Koj lub npe, tshajtawm txojkev cawmdim rau tibneeg yuamkev. Nyuam yaus tuav Yexus Khetos lub npe thov, Amees.
Peb puas zeem paub tus Tswv txojkev hlub peb loj siab, npluamias lawm tau?
Nyeem Vajluskub hauv peb lub xyoos: Lukas 10
Kênh Youtube BHKTHN:
