Klei Aê Diê Blŭ: Y-Đaniel 1:1-2
Êlan kliăng: “Yêhôwa jao Y-Jêhôyakim mtao čar Yuđa leh anăn sa kdrêč čhiên mngan yua hlăm sang Aê Diê hlăm kngan Y-Nebukatnetsar” (Y-Đaniel 1:2a).
Klei êmuh ksiêm mĭn: Si klei khua pô hưn êlâo Y-Đaniel hưn mdah, leh anăn ksiêm ênoh kơ klei luč ƀuôn prŏng Yêrusalem? Si klei phung ƀuôn sang Aê Diê tlă anăp hŏng klei truh anei? Si knhuah drei bi êdah ti anăp klei dluh lĕ hlăm klei hdĭp?
Knŏng hŏng dua êlan tal êlâo mơ̆ng hdruôm hră, khua pô hưn êlâo Y-Đaniel brei drei thâo leh akŏ kơ kluôm jih hdruôm hră: Aê Diê kiă kriê hƀuê ênuk phung mnuih. “mtao čar Ƀaƀilôn hriê wang čiăng ngă kơ ƀuôn Yêrusalem” leh anăn ba čhiên mngan yua hlăm sang Aê Diê kơ čar ñu, amâo djŏ dưm hlăm anôk mpŭ ôh, ƀiădah hlăm “sang ngăn” yang ñu (êlan 1-2). Anăn jing kčŏ gru knăl ruê̆ jih leh yơh kơ sa ƀuôn ala mtao Yuđa mâo klei êngiê. Anăn jing msĕ si klei dluh lĕ hêñ mlâo kơ Yuđa leh anăn wăt kơ Yêhôwa Aê Diê mơh, kyuadah tui si hdră mĭn mnuih ênuk anăn, Ƀaƀilôn yơh jing pô mâo klei dưi hĭn. Ƀuôn Aê Diê luč lĕ. Ƀuôn sang Aê Diê luh liê kjham kjhuê̆. Yêhôwa Aê Diê kơ phung Yuđa msĕ si jih ênuk leh. Aê Diê mâo klei ktang “hŏng kngan myang leh anăn păl yơr leh” (Klei Mtô Mñă Klei Bhiăn 26:8; I Bruă Mtao 8:42) pătdah jing klei ti tluôn êgao leh. Msĕ mơh khua pô hưn êlâo Y-Haƀakuk, năng ai wăt phung ƀuôn sang Yuđa sĭt nik ăt bi êmuh mơh diñu pô, ti anôk Yêhôwa dôk hlăm jih jang klei truh ruă ênguôt, hêñ mlâo anei? Si ngă Pô diñu kkuh mpŭ jing prŏng hĭn kơ yang phung tue mơh hĕ?
Wăt tơdah hưn răk kơ hƀuê ênuk hŏng klei dlăng mơ̆ng êngao, ƀiădah khua pô hưn êlâo Y-Đaniel ăt mâo ală ƀuh hŏng klei mngač mngăt myang, thâo săng jih jang klei truh kơ phung ƀuôn sang Aê Diê jing boh mơ̆ng bruă “Yêhôwa jao” (êlan 2). Klei luč ƀuôn prŏng amâo djŏ ôh kyuadah Yêhôwa êdu pliê! Aê Diê yua leh lu phung khua pô hưn êlâo hriê hưn mthâo êlâo kơ phung ƀuôn sang Ñu, tơdah diñu ăt kmăng dôk kkuh kơ rup yang, dôk dơ̆ng amâo mtăp mđơr ôh hŏng phung ƀun ƀin leh anăn dôk hdĭp măk ƀai, Aê Diê srăng yua phung ƀuôn sang đăo kơ yang mkăn plah mă čar (Y-Mika 4:10). Mĭndah Aê Diê knŏng bi huĭ mang, knŏng “yơr dlông čăm djơ djĕ” đuč, ƀiădah găn lu ênuk phung ƀuôn sang Yuđa ăt dôk kram hlăm klei jhat ƀai mơh. Kyuanăn yơh, hlăk klei ruă ênguôt anei truh, khua pô hưn êlâo Y-Đaniel thâo săng klei anei jing boh mơ̆ng bruă “Yêhôwa jao”, amâodah msĕ si đa đa hră mkăn mblang, “Aê Diê jao”, “Aê Diê brei klei dưi”, “Aê Diê brei”. Warren Wiersbe, pô mblang Klei Aê Diê Blŭ lač snei: “Aê Diê lui phung ƀuôn sang Ñu, jăk ƀiă hdĭp jing mnă hêñ mlâo hlăm čar phung kkuh rup yang mơh, hŏng klei diñu hdĭp msĕ si phung amâo mâo đăo hlăm Lăn Čar Doh Jăk leh anăn bi čhŏ Anăn Aê Diê.” Klei luč ƀuôn anei jing sa knhuang dưi hĭn, hlăm hdră bruă Yêhôwa Aê Diê čiăng kơ phung ƀuôn sang Ñu hruê êdei anăp jing jăk hĭn, sa phung ƀuôn sang Aê Diê mkra mjing bi doh hŏng klei bi kmhal.
Si ngă drei ăt kmăng dôk hlăm klei ngă soh mơ̆, rông pioh lu mta rup čhŏ mrŏ, amâo thâo mpŭ, mrưh hŏng amĭ ama, alah kba hlăm klei hriăm hră mơar, bruă mă, … ƀiădah ăt dôk mĭndah Aê Diê amâo srăng bi kmhal ktang drei ôh? Đăm dlăng hơăi mang ôh, Aê Diê khăp hơiêng ƀiădah Ñu amâo mdhuk mơŭng ôh.
Si ngă drei ƀuh mơ̆ Khua Yang êjai dôk tlă anăp hŏng klei dluh lĕ hlăm klei hdĭp drei?
Ơ Khua Yang, bi mni lač jăk kơ Ih kyua hƀuê ênuk jing klei yăl dliê Ih. Akâo Ih đru kâo mâo ală mngăt myang čiăng thâo ƀuh leh anăn đăo knang kơ Aê Diê kâo, jing prŏng hĭn kơ klei kâo dôk dluh lĕ ară anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 24:1-25:4
Kênh Youtube BHKTHN:
