Klei Aê Diê Blŭ: Êphêsô 4:1-3
Êlan kliăng: “Hŏng jih klei luă gŭ, êdu êun, leh anăn klei gĭr, brei diih bi đru hdơ̆ng diih hŏng klei khăp” (Êphêsô 4:2).
Klei êmuh ksiêm mĭn: Khua ƀĭng kna Y-Pôl lông dlăng phung anak Aê Diê brei hdĭp bi năng hŏng ya mta klei? Mta klei anăn brei kơ si phung mnuih drei srăng jing? Ya mta klei drei dưi djă pioh hlăm Phung Sang Aê Diê găn hŏng mta klei anăn?
Khua Yang bi mtlaih drei, brei kơ drei klei dưi jing phung anak Ñu leh anăn dưm drei hlăm Phung Sang Aê Diê jing msĕ si phung bi ala kơ Khua Yang ti lăn ala anei. Kyuanăn yơh, khua ƀĭng kna Y-Pôl lông dlăng phung anak Aê diê brei hdĭp bi năng hŏng klei pap Aê Diê brei, brei jing mnuih “hŏng jih klei luă gŭ, êdu êun, leh anăn klei gĭr, brei diih bi đru hdơ̆ng diih hŏng klei khăp” (êlan 2).
“Luă gŭ” jing knuih yuôm snăn grăp čô pô đăo brei hriăm hĕ. Luă gŭ jing bi ti gŭ pô, yap pô mkăn jing yuôm hĭn kơ pô. Khua Yang Yêsu lui leh kơ drei rup bi hmô luă gŭ khut khat hlăk Ñu tŭ ư toh lui hĕ anôk jing dlông hĭn kdrăm kơah ti Ƀuôn Jăk, bi ti gŭ Ñu pô trŭn hriê ti lăn ala jing mnuih leh anăn tŭ klei djiê hêñ mlâo ti kyâo bi kal (Philip 2:1-11). Jing phung anak Aê Diê, brei drei tui hriăm klei Khua Yang bi hmô, hŏng jih klei luă gŭ, bi ti gŭ pô kyua mnuih mkăn leh anăn kyua klei guh kơang kơ Khua Yang.
“Êdu êun” jing knuih tui tluôn brei phung anak Aê bi bi mâo hĕ. Êdu êun amâodah ênang amâo djŏ čiăng lač kơ klei êdu awăt, klei êdu blao ôh, ƀiădah jing klei ktang dưi bi tluñ juh pô mkăn. Hlăm klei Grek, boh blŭ “êdu êun” arăng yua kơ sa mta êa drao bi êdu klei ruă, mblang jing bi êđăp klei suăi êmăn amâodah klei ruă ktang. Khua Yang Yêsu tuôm lač: “Brei diih đua knông kâo leh anăn hriăm mơ̆ng kâo, kyuadah kâo jing ênang leh anăn mâo ai tiê luă gŭ; leh anăn mngăt diih srăng mdei.” (Y-Mathiơ 11:29). Brei drei hriăm mơ̆ng klei Khua Yang bi hmô čiăng dưi mâo ai tiê “ênang, luă gŭ” kăp đru mnuih mkăn hriê kơ Khua Yang leh anăn dưi “mdei”.
“Gĭr” jing knuih hluê mbĭt hŏng ênang, êdu êun. Hlăm klei dôk dơ̆ng ƀơ̆ng huă hdơ̆ng găp, tơdah drei êdu êun drei srăng dưi gĭr, leh anăn tơdah drei dưi gĭr drei srăng dưi jing êdu êun. Gĭr jing sa hlăm lu mta klei siam phung đăo tơdah dôk hdĭp hlăm klei khăp kyuadah tơdah mâo klei khăp dôk mbĭt, snăn kơh drei dưi gĭr ư̆ leh anăn dưi gĭr tŭ pô mkăn. Khua ƀĭng kna Y-Pôl ăt hưn mdah mơh klei anei tơdah lŏ yăl dliê wĭt kơ klei khăp: “Klei khăp thâo gĭr” (I Kôrantô 13:4). Snăn, gĭr tŭ jing kăp ư̆ ăn ai tiê, amâo mâo bi kdơ̆ng leh anăn gĭr ư̆ mđing hmư̆ hŏng klei khăp leh anăn klei luă gŭ.
Tui tluôn, khua ƀĭng kna Y-Pôl mtă mtăn kơ phung anak Aê Diê “hŏng klei kă êđăp ênang brei diih gĭr djă pioh klei Yang Mngăt Jăk bi mguôp jing sa” (êlan 3). Phung Sang Aê Diê brei bi mâo hĕ klei bi mguôp jing sa, kyuanăn yơh grăp čô anak Aê Diê brei gĭr “yua klei kă êđăp ênang djă pioh klei bi mguôp jing sa” anăn. Klei êđăp ênang srăng dưi mâo tơdah phung anak Aê Diê thâo hdĭp hdơ̆ng găp hŏng ai tiê klei mĭn luă gŭ, êdu êun leh anăn gĭr tŭ. Phung Sang Aê Diê srăng đĭ kyar tơdah jih jang mnuih hdĭp êđăp ênang bi mguôp jing sa leh anăn mđrăm mbĭt rŭ mdơ̆ng Phung Sang Aê Diê.
Si ngă drei dôk hdĭp luă gŭ, êdu êun leh anăn gĭr tŭ hŏng jih jang mnuih mơ̆?
Ơ Khua Yang, akâo kơ Ih đru kâo nanao thâo hdĭp luă gŭ, êdu êun, gĭr tŭ leh anăn thâo ư̆ ăn ai tiê kơ pô mkăn hŏng klei khăp.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Bruă Lêwi 25:47-26:13
Kênh Youtube BHKTHN:
