Klei Aê Diê Blŭ: Y-Luk 14:25-27
Êlan kliăng: “Hlei pô amâo klam kyâo bi kal ñu pô leh anăn tui hlue Kâo amâo dưi jing ƀĭng kna Kâo ôh” (Y-Luk 14:27)
Klei êmuh ksiêm mĭn: Phă knhuang êlan Khua Yang Yêsu dôk êbat nao leh anăn klei mtô anei pioh kơ hlei pô? Si klei mblang kơ klam kyâo bi kal jing? Si klei mtô anei lông dlăng kơ klei đăo ih?
Khua Yang Yêsu hlăk êbat ti knhuang êlan knhal tuč nao kơ Yêrusalem, leh anăn “mâo phung lu” dôk tui hlue Ñu, ƀiădah lĕ Khua Yang thâo kơ diñu amâo thâo săng sĭt ôh si klei tui hlue Khua Yang jing. Hŏng rup kyâo bi kal, Khua Yang brei thâo klei čoh čuăn kơ pô tui hlue Ñu brei tla sa ênoh, anăn jing lui hĕ ya mta klei yuôm hĭn kơ ñu pô.
Klei Mrâo Mrang Jăk Y-Markôs 8:34 lŏ thiăm boh blŭ “hngah hĕ klei ñu pô čiăng” hlăm klei blŭ phŭn jing “lui ñu pô”. Anei jing sa boh blŭ ktang snăk mblang jing “amâo lŏ mâo klei bi mguôp hŏng…” amâodah “lui jih kluôm dhuôm klei dưi hŏng ya dŏ mâo”. Klei mblang anei klă mngač hĭn hŏng rup “klam kyâo bi kal”. Lač kơ kyâo bi kal jing lač kơ klei ruă knap, ƀiădah mta klei kjham kjhuê̆ hĭn jing klei hêñ mlâo, msĕ si sa čô klam kyâo bi kal ñu pô nao kơ anôk arăng bi mdjiê ñu. Blŭ mdê, klei mblang kơ “klam kyâo bi kal” jing lui hĕ pô yơh, čiăng lač amâo tui duah ya klei bi mơak kơ pô ôh ƀiădah gưt ngă klei Khua Yang čiăng. Pô tui hlue Khua Yang, hrô kơ klei tui duah klei hdĭp êlưih leh anăn đĭ jing, brei hmiêt mkăp ai tiê tŭ klei arăng ngă jhat, arăng hngah lui, klei ruă knap, klei lông dlăng, tơl wăt klei djiê kyua Anăn Khua Yang. Khua Yang Yêsu “klam kyâo bi kal” leh, leh anăn phung tui hlue Khua Yang mâo klei iêô mthưr brei “klam kyâo bi kal” – čiăng lač jing sa hŏng Khua Yang- “čiăng kơ kâo dưi thâo kral Krist leh anăn klei myang mơ̆ng klei Ñu kbiă lŏ hdĭp, leh anăn dưi tŭ klei knap mñai mbĭt hŏng Ñu, leh anăn dơ̆ng jing msĕ si Ñu hlăm klei Ñu djiê,” (Philip 3:10b). Kyuanăn, “klam kyâo bi kal” amâo djŏ knŏng lač kơ klei tŭ klei knap mñai ôh, ƀiădah wăt kơ klei sĭt suôr leh anăn klei bi mguôp hŏng Khua Yang.
Klam kyâo bi kal drei pô leh anăn “tui hlue Ñu”. Tui hlue Khua Yang amâo djŏ ôh knŏng sa blư̆, ƀiădah jing knhuang êbat grăp hruê, hdĭp nanao hlăm klei bi mguôp hŏng Khua Yang Yêsu, gưt asăp Ñu, leh anăn brei Ñu jing Khua Yang sĭt kơ klei hdĭp drei.
Thomas à Kempis čih leh snei: “Lu mnuih khăp kơ Ƀuôn Ala Mtao Khua Yang Yêsu ƀiădah ƀiă mnuih čiăng klam kyâo bi kal diñu pô tui hlue Khua Yang. Lu mnuih čiăng tui hlue Khua Yang hŏng klei êlưih ƀiădah knŏng ƀiă mnuih čiăng tŭ klei dleh dlan. Lu mnuih nao kơ klei ƀơ̆ng huă Khua Yang ƀiădah ƀiă mnuih kăm ƀơ̆ng huă mbĭt hŏng Khua Yang… Lu mnuih tui hlue Khua Yang Yêsu truh kơ knăm kjoh kpŭng ƀiădah ƀiă mnuih mnăm kčok klei knap mñai. Lu mnuih mpŭ kơ klei yuôm bhăn Khua Yang ngă ƀiădah ƀiă mnuih tui hlue Ñu hlăm klei hêñ mlâo kyâo bi kal. Lu mnuih khăp kơ Khua Yang Yêsu ƀiădah khă đăm mâo klei dleh dlan truh kơ diñu ôh.”
Klei Aê Diê Blŭ hruê anei brei drei ƀuh, klei lông dlăng klei đăo kơ grăp čô drei tơdah tui hlue Khua Yang jing klei klam kyâo bi kal drei pô grăp hruê yơh. Ƀiădah lĕ, Khua Yang ăt ƀuăn mơh srăng brei klei hơ̆k mơak leh anăn klei guh kơang hlăm hruê Khua Yang bi êdah kơ hlei pô hmiêt mkăp hgao klei lông dlăng čiăng dôk sĭt suôr tui hlue Ñu (I Y-Pêtrôs 4:12-14).
Si ngă drei sĭt êmĭt klam kyâo bi kal drei pô grăp hruê leh mơ̆?
Wah lač: Ơ Khua Yang, kyua klei khăp, ih klam leh kyâo bi kal leh anăn tŭ klei djiê bi tui klei soh, hrô brei kơ kâo. Ơ Khua Yang, akâo Ih thiăm brei ai ktang čiăng kơ kâo dôk sĭt suôr tui hlue kru jơ̆ng Khua Yang grăp hruê, klam kyâo bi kal pô tui hlue Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
