Tơdrong jang 2:42-47
“Rim năr lu sư mơ̆ng lu jơ̆ng ‘bang bơtho. Lu sư pơgơ̆p băl thoi ‘nhŏng oh, sŏng sa ‘blŏk hơdơ̆r kơ Yêsu hăm krao khan kơ ‘Bok Kei-Dei hơdai.” (Tơdrong jang 2:42)
Nơ̆r jet tơchĕng pơwao:
– Khul bơngai lui blŭng a pơm tơ’bôh đon lui lu sư thoi yơ?
– Lu sư hlôi arih ‘lơ̆ng tơpăt păng băt ‘mêm mơnat? Đei lĕch yua liơ?
– Lu bơ̆n đei tơ’blŏk arih thoi yơ?
Khul lui blŭng a đei roi jơ̆ khul tơpôl đei tơplih. Đơ̆ng rŏng kơ Yang Bơhngol ‘Lơ̆ng jur, dôm lu khul bơngai lui đei akŭm kơkuh kơ Kră Yang, mă arih lăm minh pôm hnam dơnŏ gah bơhngol, chăl arih lu sư pơchrang rơđah tơdrong ‘lơ̆ng tơpăt păng jơhngơ̆m băt ‘mêm mơnat đơ̆ng ‘Bok Kei-Dei.
Khul lui blŭng a kư̆m đĭ jơhngơ̆m tơ’bôh đon lui đơ̆ng jơhngơ̆m ‘maih hŏk pơhrăm nơ̆r Kră Yang, bơwei tơdrong tơ’bưh tơduă khul bơngai lui blŭng a hơdai băl păng krao khan (trong 42). Pơm hơnă chăl arih ‘lơ̆ng tơpăt đơ̆ng nơ̆r Kră Yang. Lu sư ưh kơ arih pơm ngôi pơ hơi mălei dan nơ̆r Kră Yang pơm tơm kăl, hơmet trong tơchĕng, dah pơm, păng lu sư tơ’bôh ‘mêm băl. Kơplah khul lui arih kiơ̆ nơ̆r Kră Yang, chăl arih gô tơplih kiơ̆ trong ‘Bok Kei-Dei. Thim lăm tơdrong noh, lu sư arih tơpăt tơpă tơduă. Ưh kơ trŏ khan tơ’bơ̆p băl gah ‘nguaih, mălei jơ̆ tơdrong tơguăt tơpă đĭ jơhngơ̆m, pôk tơiung păng pơlung băl lăm đon lui. Lu sư kư̆m yak năm, klah asong tơdrong chơt hiôk hăm tơdrong pŭ trăp, păng ngơk lăng tơ Kră Yang, bơih tơm tơdrong chang hơmĕng lu sư.
Tơdrong hlĭch hloh dơ̆ng, lu sư tơ’bôh tơdrong ‘mêm mơnat tơpă. Khul lui đei pôm jơhngơ̆m đon păng iŏk dôm tơmam lu sư hơdai, pơ̆n tĕch dôm tơmam wă tơgŭm bơngai đei kăl (trong 44-45). Dôm tơdrong ‘nâu tơ’bôh jơhngơ̆m băt ‘mêm mơnat ưh kơsĭ khan kiơ̆ kơ tơdrong mơn, mă tơpă pơm tơ’bôh hăm tơdrong chu hŭt đĭ yua kơ băt ‘mêm mơnat. Lu sư arih ưh kơ kret tơsen, mălei lăng dôm tơdrong kăl lơ bơngai noh bơih tơdrong bơ̆n kăl kơ ‘blŏk hiơ̆k tơgŭm băl. Dah khul lui thoi noh, tơdrong ‘Bok Kei-Dei tơ’bôh rơđah hloh. ‘Nâu bơih tơdrong ‘nao ‘lơ̆ng: Lu bơ̆n đei tơdrong mơnat thoi noh athei asong ăn hloi kơ bơngai nai. Tơdrong ‘nao ‘lơ̆ng Luka đei chih roi “Mă năr ayơ kư̆m pơm thoi noh, rim năr lu sư năm kơkuh kơ Kră Yang lăm hnam Akŭm, tơ hnam, tơ hnam sŏng sa hơdai păng chơt hiôk tơpă” (trong 46). Tơ’bôh minh tơpôl arih pran kơtang. Kon pơlei Kră Yang “pơnam” akŭm pơgơ̆p băl hơdai đei jơhngơ̆m ‘mêm, chơt hiôk, tơpăt tơpă. Chăl arih đei hli yom ưh kơ trŏ khan pŭ trăp, mă tơdrong chơt hiôk lĕch đơ̆ng lăm jơhngơ̆m tơpă.
Đei lĕch yua đơ̆ng minh khul lui thoi noh “gơh ‘bôh tơdrong lăm kơdih, rim năr Kră Yang krao iŏk lơ bơngai thim lăm khul lui” (trong 47). Minh tơpôl arih ‘lơ̆ng tơpăt păng băt ‘mêm mơnat pơsĭt tơdrong pran kơtang. Lu bơngai nai ưh kơsĭ mơ̆ng tơdrong ‘nao ‘lơ̆ng đĕch mă tơpă tơ’bôh trong lu bơ̆n arih rim năr lăm khul lui. Nơ̆r Kră Yang năr ‘nâu tơ’blŏk pơtrŭt lu bơ̆n. Khul lui ưh kơsĭ khan anih mă lu bơ̆n năm rim giĕng, mă tơpă anih mă lu kon Kră Yang hơdai tơplih, arih ‘lơ̆ñg tơpăt păng băt ‘mêm mơnat.
Ơ Kră Yang, apinh tơ’blŏk kơ inh băt tơgŭm hơdai pơjing pơdơ̆ng khul lui jing anih đei tơdrong ‘lơ̆ng tơpăt đei arih tơ’bôh, jơhngơ̆m băt mơnat gô lanh păng tơdrong ‘Bok Kei-Dei oei hơdai ‘bôh rơđah. Krao khan yua Anăn Yêsu Krist, Amen.
Lu bơ̆n pơchrang tơ’bôh ăn kơ lơ bơngai thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Jop 1
Kênh Youtube BHKTHN:
