Klei Aê Diê Blŭ: I Y‑Samuel 12:16‑25
Êlan kliăng: “Bi kâo dê, êbeh kơ anăn, hơăi kâo amâo srăng ngă soh ôh hŏng Yêhôwa tơdah mdei hĕ wah lač kyua diih.” (I Y‑Samuel 12:23a)
Klei êmuh ksiêm mĭn: Ya klei Y‑Samuel ngă čiăng kơ phung ƀuôn sang Aê Diê ƀuh klei soh prŏng diñu ngă leh? Si ai tiê klei mĭn ñu wah lač brei kơ phung sang Aê Diê?Ya klei hriăm kơ drei mơ̆ng klei Y‑Samuel bi hmô kơ klei wah lač brei?
Y‑Samuel mă bruă kơ Aê Diê ti krah phung ƀuôn sang Israel hlăm klei jing khua ngă yang, khua pô hưn êlâo, leh anăn khua phat kđi. Ƀiădah êdei anăn phung ƀuôn sang Israel akâo čiăng mâo mtao kiă kriê, hngah hĕ Aê Diê yơh jing Mtao prŏng diñu. Y‑Samuel ktrâo brei kơ diñu ƀuh “klei jhat ƀai diih jing prŏng” kyuadah akâo leh sa čô mtao kŏ diñu. Ti anăp jih jang phung ƀuôn sang, Y‑Samuel iêô wah lač kơ Khua Yang leh anăn Aê Diê mơĭt grăm leh anăn êa hjan êjai yan wiă puôt mdiê. “jih jang phung ƀuôn sang huĭ snăk kơ Yêhôwa leh anăn kơ Y‑Samuel”. Diñu akâo kơ Y‑Samuel wah lač brei akâo kơ Aê Diê pap brei kơ klei soh diñu čiăng đăm diñu djiê ôh. Lŏ sa blư̆ dơ̆ng, Y‑Samuel bi wir ai tiê phung ƀuôn sang Israel kơ Aê Diê, mtô diñu đăm lui wir Aê Diê ôh leh anăn mă bruă kơ Aê Diê hŏng jih ai tiê. Ñu lŏ mñă kơ phung ƀuôn sang Aê Diê ƀuh snei, Aê Diê Pô yơh ruah leh diñu jing phung ƀuôn sang Ñu, snăn Ñu amâo srăng lui diñu ôh, tơdah diñu amâo lui wir kơ Aê Diê.
Lŏ čuê, Y‑Samuel lač klă hŏng phung ƀuôn sang kơ ai tiê sĭt suôr leh anăn klei ñu amâo mdei ôh wah lač brei kơ diñu. Wăt tơdah diñu ngă soh hŏng Aê Diê, amâo mđing kơ ñu dưn, ñu ăt amâo mdei ôh wah lač brei kơ diñu, kyuadah anăn jing bruă Aê Diê iêô ñu. Ñu ăt srăng mtô kơ diñu thâo “êlan jăk leh anăn êlan kpă” čiăng kơ diñu thâo huĭ mpŭ kơ Aê Diê leh anăn mă bruă kơ Aê Diê nanao. Kyua klei anăn, diñu srăng ƀuh bruă prŏng snăk Aê Diê ngă kơ phung ƀuôn sang Ñu. Bi tơdah amâo ngă snăn, ƀiădah bi kdơ̆ng hŏng Aê Diê leh anăn ngă klei jhat ƀai, snăn diñu pô mbĭt hŏng mtao diñu srăng rai luč.
Wăt tơdah Y‑Samuel amâo tŭ ư ôh klei phung ƀuôn sang Israel akâo kơ diñu sa čô mtao ƀiădah ñu amâo tuôm mdei ôh wah lač brei leh anăn mtô lač kơ diñu. Ñu sĭt suôr hŏng bruă Aê Diê iêô ñu leh anăn mdưm kơ ñu, wăt tơdah si phung ƀuôn sang jing dưn. Khua Yang ăt čiăng kơ drei sĭt suôr leh anăn dôk gĭr wah lač brei kơ mnuih mkăn (Êphêsô 6:18), leh anăn yua Klei Aê Diê Blŭ bi đru hdơ̆ng pô êbat hlăm êlan jăk leh anăn kpă nao kơ Khua Yang.
Y‑Samuel jing sa čô khua pô êlâo êdah klă hĭn bi hmô kơ klei wah lač brei kơ phung ƀuôn sang Aê Diê. Pô čih Klei Mmuñ Hđăp ăt lač klă Y‑Samuel jing mnuih kwưh akâo kơ Yêhôwa brei kơ phung ƀuôn sang Aê Diê (Klei Mmuñ Hđăp 99:6). Wăt tơdah boh klei truh dưi ngă kơ ñu amâo čiăng lŏ čiăng wah lač brei ôh kơ phung ƀuôn sang Aê Diê ôh, ƀiădah ñu ăt čuăn ai tiê sĭt suôr wah lač brei kơ diñu. Ñu amâo mâo kyua anak mnuih amâodah kyua klei truh, ngă soh amâo sĭt suôr hŏng Aê Diê kyua klei mdei wah lač brei. Anei jing sa klei bi hmô jăk brei drei ngă hlue. Khua Yang Yêsu mtô drei brei “wah lač brei kơ phung ngă jhat kơ diih” (Y‑Mathiơ 5:44). Hĭn êjai jing ayŏng adei hlăm găp djuê prŏng Khua Yang, thâodah drei amâo ư ai hdơ̆ng pô dưn ƀiădah amâo mdei ôh wah lač brei kơ hdơ̆ng pô.
Si ngă drei tuôm mdei wah lač brei kơ phung ayŏng adei drei mơ̆?
Wah lač: Ơ Khua Yang, rup bi hmô wah lač brei mơ̆ng Y‑Samuel bi mđĭ ai kâo hlăm ai tiê klei mĭn wah lač leh anăn wah lač brei. Akâo Khua Yang đru kâo sĭt suôr wah lač brei kơ phung ayŏng amai adei hlăm klei đăo čiăng kơ jih jang hmei mđrăm mbĭt êbat hlăm êlan jăk kpă leh anăn mă bruă kơ Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
