Esơra 7:25-26
“Trong Kră Yang ‘lơ̆ng tơpăt, lu bơngai tơpăt gô yak trong noh; mă-lei lu bơngai pơm yoch glăi gô yak kơtơih pơ̆k tơ noh.” (Hôsia 14:9b)
Nơ̆r jet tơchĕng pơwao:
– Kră Yang yua pơtao Phersia athei ‘bok Esơra pơm kiơ?
– Tơdrong ‘nâu pơdah tơdrong tơpăt Kră Yang thoi yơ?
– Tơdrong tơpăt Kră Yang tơ’bôh tơpă thoi yơ dang ei?
Lăm sơnăm mă tơpơh sư pơgơ̆r, Pơtao Phersia anăn sư Artaserser chih hla bơar athei asong ăn kơ ‘bok Esơra wih brŏk tơ pơlei Jêrusalem hơdai hăm lu bơngai Juđê, Lu sư đei hơmet tơdrong pơgơ̆r kon pơlei Juđa kiơ̆ kơ khôi juăt ‘Bok Kei-Dei, Esơra 7:25-26 pơdah tơdrong tơpăt Kră Yang ‘Bok Kei-Dei kơplah Kră Yang yua Pơtao Phersia athei ‘bok Esơra; Athei pơjao tơdrong jang kơ lu bơngai hlôh băt tơdrong juăt Kră Yang pơm yŏng pơgơ̆r, athei bơtho khôi juăt ăn kơ lu bơngai tam mă băt, păng đei tơdrong sek tơlang tơpăt hăm apah tơpăt hơnơ̆ng kiơ̆ kơ khôi juăt. Đêl ‘bok soi adrĕch Arôn păng “đei ling lang lăng hŏk iŏk khôi juăt Kră Yang, wei răk pơm kiơ̆ păng bơtho ăn kơ kon pơlei Isơrael băt kơ dôm khôi juăt păng dôm tơdrong đei tơtă.” (Esơra 7:10). Thoi noh, ‘bok Esơra trŏ lăp hăm tơdrong jang ‘nâu.
Khôi juăt, dah khan khôi juăt Môis, mălei trŏ sư jơ̆ khôi juăt Kră Yang, đei mơjĭt nơ̆r tơtă. Dôm tơdrong pơkă gah tơdrong tơmam soi păng tơdrong juăt lăm kon pơlei. Lăm noh, mơjĭt nơ̆r tơtă bơih kăl hloh yua kơ tôm đĭ khôi juăt; lăm ‘bar tơdrong juăt tơmam soi păng tơdrong juăt lăm kon pơlei đei yua iŏk lăm dôm chăl ayơ noh đĕch. ‘Bar trong nơ̆r ‘Bok Kei-Dei năr ‘nâu tơ’bôh ăn khôi juăt kăl athei bơtho, wei răk păng… phak. Yua kơ kiơ? Yua kơ khôi juăt đei tơdrong kăl tơpă, ba ăn tơdrong arih kơ kon pơlei Isơrael (Lêwi 18:5). Thoi lĕ tơdrong juăt tơgŭm ăn kơ teh đak hơđơ̆ng. Khôi juăt kư̆m tơbăt ăn wă kơ đĭ đăng bơngai băt tơdrong ‘lơ̆ng tơpăt Kră Yang ‘Bok Kei-Dei: “Ih tơtă bơih tơdrong Ih bơtho ‘lơ̆ng tơpăt. Trŏ kơ lui gơnang tơpă” (Hơriso 119:138). Tơdrong ‘lơ̆ng tơpăt Kră Yang ưh kơ ăn kon bơngai pơrăm lê̆ tơdrong juăt Kră Yang. Lu sư gô đei pŭn hiôk tơdah chu yom pơm kiơ̆, gô răm tơdah ưh kơ chu yom pơm kiơ̆ (Bơtho khôi juăt 28:1-2, 15). Kơdih Kră Yang gô sek tơlang păng gô apah dah mă wă phak. Sư sek tơlang tơpăt păng ưh kơ đei pơdê; “Ơ Kră Yang, inh băt tơdrong Ih sek tơlang tơpăt, noh đơ̆ng tơdrong Ih tơpăt. Na Ih pơm kơ inh pơmat tat” (Hơriso 119:75). Tơdrong ‘lơ̆ng tơpăt Kră Yang tơ’bôh đơ̆ng khôi juăt tơpăt hơnơ̆ng tơgŭm bơ̆n băt hli yom kơ Kră Yang.
Dang ei, yua kơ ‘mêm mơnat, Kră Yang chang gô bơ̆n tơbral adrol kơ Sư sek tơlang: “Sư ưh kơ wă pơđunh ôh kơ tơdrong Sư pơkă khan wă ăn Yêsu Krist, thoi lu bơngai che bơle noh khan, Sư oei mơnat ră kơ kon bơngai bơ̆n, Sư ưh kơ wă minh ‘nu bơngai hiong lăm tơdrong Sư wă phak ră. Thoi noh, na Sư oei gô wă kơ đĭ đăng bơngai tơbral kơdih tơdrong yoch” (II Pêtrôs 3:9). Mălei khôi juăt Kră Yang oei tơpăt hơnơ̆ng, apah dah phak tơpăt hơnơ̆ng. Thoi noh bơ̆n athei arih mă ‘lơ̆ng tơpăt păng ră roi tơdrong dŏng pơklaih đơ̆ng Kră Yang ăn kơ lơ bơngai.
Ơ ‘Bă ‘lơ̆ng tơpăt, apinh Ih ăn kơ inh ling lang ‘blŏk khôi juăt Kră Yang tơpăt hơnơ̆ng wă kơ inh arih băt hli yom kơ Ih, đĭ jơhngơ̆m ră roi Anăn Kră Yang kơ lơ bơngai. Yua anăn Kră Yang Yêsu Krist, Amen.
Bơ̆n pơm kiơ mưh băt kơ bơ̆n gô dơ̆ng ‘bơ̆t anăp Kră Yang sek tơlang hăm tơdrong ‘lơ̆ng tơpăt Sư?
Đŏk Sơ̆p Hla bơar ‘Bok Kei-Dei lă pêng sơnăm: Tơdrong jang 22
Kênh Youtube BHKTHN:
