Klei Aê Diê Blŭ: Bruă Lêwi 19:9-18
Êlan kliăng: “Đăm đuôm nư arăng ôh, knŏng bi đuôm klei khăp hdơ̆ng diih; kyuadah hlei pô khăp kơ pô riêng gah ñu bi sĭt leh klei bhiăn.” (Rôm 13:8)
Klei êmuh ksiêm mĭn: Si klei Aê Diê mtă kơ phung ƀuôn sang Ñu dôk dơ̆ng ƀơ̆ng huă hŏng phung riêng gah? Ya mta klei bhiăn klei khăp mñă tinei? Si drei dôk hdĭp čiăng bi êdah klei kpă ênô leh anăn klei khăp Khua Yang?
Aê Diê mtô mtă kơ phung ƀuôn sang Ñu brei mđing uêñ, dlăng ba phung ƀun ƀin leh anăn phung dôk jưh bhiâo (êlan 9-10). Khua Yang amâo knŏng mtô brei kkuh mpŭ kơ Ñu ƀiădah wăt brei thâo khăp kơ phung riêng gah hŏng ai tiê kmah leh anăn thâo pap. Klei kpă ênô Khua Yang čoh čuăn klei mtăp mđơr, ƀiădah klei khăp Ñu ba brei klei pap. Phung anak ƀuôn sang Aê Diê mâo klei mtô mtă brei mđing uêñ kơ klei kƀah mnuih mkăn leh anăn hmiêt mkăp ai tiê kah mbha mnơ̆ng kơ digơ̆.
Hlăm dŭm êlan 11-13, Khua Yang mtô amâo dưi tlĕ, amâo luar amâodah mplư pô mkăn ôh. Jih jang klei soh anei soh hŏng klei bhiăn klei khăp. Klei blŭ luar bi luč klei đăo knang hdơ̆ng pô. Klei tlĕ jing soh kyua plah mă dŏ dô pô mkăn. Klei khăp leh anăn klei kpă ênô Khua Yang čoh čuăn brei drei dôk dơ̆ng ƀơ̆ng huă hŏng pô mkăn hŏng klei kpă ênô, mtăp mđơr leh anăn mpŭ. Kyuadah grăp čô drei Aê Diê hrih mjing leh tui si rup Ñu pô (Klei Mphŭn Dơ̆ng 1:27).
Êlan 14 brei ƀuh klei Khua Yang mđing uêñ mdê hĭn kơ “phung kngăl” leh anăn “phung bum ală”, jing phung ênưih tŭ klei ruă êka. Khua Yang dlăng ƀuh jih phung mnuih arăng wơr bĭt, phung arăng amâo mđing hmư̆ digơ̆. Klei kpă ênô Khua Yang răng mgang kơ phung mnuih amâo dưi răng kriê asei digơ̆ pô. Klei khăp Khua Yang răng mgang kơ phung awăt êdu. Hlăm klei hdĭp grăp hruê, phung anak ƀuôn sang Aê Diê mâo klei iêô mthưr amâo dưi mưč mač, ktư̆ juă amâodah ngă jhat kơ mnuih mkăn ôh, ƀiădah brei hŏng jih ai tiê đru dŏng digơ̆.
Tui čuê klei anăn, phung anak ƀuôn sang Aê Diê mâo klei mñă amâo dưi dlăng mnuih mdê mdê ôh, thâodah mnuih mdrŏng sah, mnuih mâo klei dưi, amâodah mnuih ƀun ƀin, leh anăn amâo dưi hiu blŭ mčeh amâodah ngă mnêč čiăng bi luč klei hdĭp mnuih mkăn ôh (êlan 15-16). Phung anak ƀuôn sang Aê Diê brei dôk tĭng kơ klei djŏ leh anăn thâo uêñ khăp hlăm klei blŭ hrăm.
Ti knhal tuč, Klei Aê Diê Blŭ kñăm kơ klei bhiăn klei khăp: Khăp bĕ msĕ si Khua Yang khăp leh kyuadah Ñu jing Yêhôwa (êlan 17-18). Klei Khua Yang khăp amâo knŏng klei blŭ ôh ƀiădah hŏng bruă ngă bi êdah. Phung anak ƀuôn sang Aê Diê amâo dưi bi êmut leh anăn amâo dưi đuôm ai amâodah duah êlan rŭ ênua ôh. Bi mklăk wĭt, brei khăp kơ pô riêng gah msĕ si kơ drei pô.
Klei bhiăn Khua Yang amâo knŏng jing hdră bhiăn klei dôk dơ̆ng ƀơ̆ng huă ôh, ƀiădah bi êdah kơ sa čô Aê Diê kpă ênô, bŏ hŏng klei khăp. Jing anak ƀuôn sang Aê Diê, drei mâo klei iêô mthưr bi êdah klei kpă ênô leh anăn klei khăp anăn hlăm jih jang klei bi mguôp, čuăn ai tiê leh anăn ngă hlăm knhuah hdĭp grăp hruê. Jih jang klei mtô lač anei brei ƀuh klei kpă ênô amâo knŏng ngă klei djŏ hŏng Aê Diê ƀiădah wăt ngă klei djŏ hŏng mnuih mkăn msĕ mơh. Tơdah drei khăp msĕ si Khua Yang khăp leh, snăn drei srăng dôk hdĭp hŏng phung riêng gah msĕ si klei Khua Yang mtô, ngă msĕ snăn jing drei ngă ênŭm klei bhiăn Ñu.
Si ngă drei khăp kơ mnuih riêng gah msĕ si Khua Yang khăp mơ̆?
Wah lač: Ơ Khua Yang, akâo Ih đru kâo thâo khăp kơ mnuih mkăn msĕ si Ih khăp, mâo ai tiê thâo săng, mtăp mđơr, thâo pap. Bi hriăm kâo êbat hlăm klei kpă ênô Ih, leh anăn đru kâo ngă bruă bi êdah ai tiê Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
