Levis Kevcai 19:9-18
Nqe cim:
“Nej tsis txhob tshuav leejtwg nqi, tib qho uas nej tshuav luag nqis ces yog ib leeg yuav tsum hlub ib leeg; tus uas hlub lwm tus thiaj yog nws ua raws li txoj kevcai qhia” (Loos 13:8)
Lus nug rau sawvdaws xav:
– Vajtswv qhia Nws haivneeg yuav tsum coj li cas rau kwvtij zej zog?
– Txoj cai kev hlub twg hais txog rau ntawm no?
– Peb ua neej li cas kom qhia tawm Vajtswv kev ncajncees thiab kev hlub?
Ib tsoom mloog txhua tus,
Vajtswv samhwm Nws haivneeg yuav tsum hmov tshua, saib xyuas cov neeg pluag, neeg txawv tebchaws (nqe 9-10). Vajtswv tsis yog qhia pehawm Nws xwb tiamsis tseem samhwm kom hlub kwvtij zej zog dhau los ntawm muaj lub siab davfo thiab hlub tshua. Vajtswv cov menyuam tau Nws qhia yuav tsum tau hmov tshua txog lwm tus kev cheemtsum thiab zoo siab muab tej uas yus muaj pub rau lwm tus.
Hauv nqe 11-13, Vajtswv qhia tsis ua tub sab, tsis hais dag, lossis dag lwm tus. Cov kev txhaum no puavleej ua txhaum rau txoj cai kev hlub. Hais lus dag yog ua poob kev ntseeg siab. Ua tub sab yog ua txhaum lwm tus tug. Vajtswv txoj kev hlub thiab ncajncees puavleej taij kom peb ua tseeb, ua ncaj thiab hwm txhua tus. Vim peb txhua tus puavleej tau tsim los muaj tus yam ntxwv zoo li Vajtswv (Chivkeeb 1:27).
Nqe 14 qhia pom Vajtswv hmov tshua tshwjxeeb rau cov “neeg lagntseg”, “digmuag” yog cov uas yoojyim muaj txoj kev nyuaj siab. Tus Tswv saib pom cov neeg uas luag hnov qab lawd thiab mloog cov neeg uas tsis muaj leejtwg mloog. Vajtswv txoj kev ncajncees tiv thaiv cov neeg uas tsis muaj peevxwm tiv thaiv lawv tus kheej. Vajtswv kev hlub tiv thaiv cov neeg uas tsis muaj zog. Hauv kev ua neej txhua hnub, Vajtswv cov menyuam tau Vajtswv hu los tsis yog los thuam tsim txom lwm tus, tiamsis hu los tas siab pab lawv.
Txuas ntxiv, ntuas Vajtswv haivneeg hais tias tsis tau xaiv ntsej muag, txawm npluanuj, muaj hwjchim, pluag txomnyem tsis tau liam txim thiab ua phem rau leejtwg (nqe 15-16). Vajtswv cov menyuam yuav tsum sawv rau qhov yog thiab txawj ua tib zoo hais.
Thaum kawg, Vajtswv Txojlus hais meej rau txoj cai kev hlub: Cia li hlub li Vajtswv tau hlub vim Nws yog Tus Tswv (nqe 17-18). Vajtswv kev hlub tsis nyob twjywm tiamsis mus ua ke nrog kev ua haujlwm. Vajtswv cov menyuam tsis tau ntxub thiab cim ntsoov luag kev txhaum lossis nrhiav kev ua pauj. Tsis tas li ntawd, hlub kwvtij zej zog ib yam li yus hlub yus lub cev.
Vajtswv txoj kevcai, tsis yog tej nyuag kev coj noj coj ua xwb, tiamsis yuav tsum qhia tawm Vajtswv kev ncajncees, puv npo kev hlub. Peb yog Vajtswv menyuam, peb tau hu los qhia tshwm txoj kev ncaj ncees thiab kev hlub ntawd hauv kev sib txuas nrog sawvdaws, peb yuav tsum txiav txim siab ua txhua hnub hauv peb lub neej. Tej lus qhia no qhia pom kev ncajncees tsis yog ua yam yog rau Vajtswv xwb, tiamsis yuav tsum ua yam yog rau lwm tus thiab. Yog thaum uas peb hlub li Vajtswv hlub lawd, ces peb yuav coj zoo rau kwvtij zej zog li Vajtswv Txojlus qhia, ua li ntawd ces yog peb coj tau tiav log Vajtswv Txoj Kevcai.
Thov Vajtswv,
Vajtswv, thov pab nyuam yaus hlub lwm tus li Koj hlub, hlub los ntawm kev ncajncees, lub siab hlub tshua, muaj nplooj siab dawb paug rau lwm tus. Thov pab nyuam yaus rhais ruam mus raws Koj txoj kev ncajncees thiab kev hlub kom tshwm Koj tus yam ntxwv rau lwm tus. Nyuam yaus tuav Tswv Yexus Khetos lub npe thov, Amees.
Peb puas hlub kwvtij zej zog li Vajtswv hlub?
Nyeem Vajluskub hauv peb lub xyoos: Tes Haujlwm 25
Kênh Youtube BHKTHN:
