Lêwi 19:9-18
“Tơdrong bơ̆n hre kơ đe, bơ̆n athei jah ăn na jah tôch. Mă gah tơdrong ‘mêm kơ bôl buăl ưh kơ tôch ôh. Bơngai bu ‘mêm kơ bôl buăl, bơngai ‘noh ưh kơ hŭt ôh dôm tơdrong juăt ‘Bok Kei-Dei pơkă”
(Rôm 13:8)
Nơ̆r jet tơchĕng pơwao:
– Kră Yang bơtho tơ’bôh kơ kon pơlei Sư arih pơm thoi yơ hăm bôl buăl?
– Lu tơdrong juăt ‘mêm mơnat ayơ đei tơ’blŏk âu?
– Lu bơ̆n arih thoi yơ wă pơm tơ’bôh tơdrong ‘lơ̆ng tơpăt păng ‘mêm mơnat Kră Yang?
Kră Yang ‘Bok Kei-Dei bơtho kon pơlei Sư athei tơchĕng tơtăm, wei rong bơngai dơnuh păng bơngai tơmoi (trong 9-10). Kră Yang ưh kơsĭ bơtho lu sư athei kơkuh đĕch mă lei Sư kư̆m bơtho athei ‘mêm mơnat kơ bôl buăl hai mơ̆n đơ̆ng lăm jơhngơ̆m hơmrah păng ‘mêm mơnat. Tơdong ‘lơ̆ng tơpăt Kră Yang athei mă trŏ ‘blep, mă-lei tơdrong ‘mêm Kră Yang chĕp ba tơdrong ‘mêm mơnat. Kon pơlei Kră Yang đei bơtho athei tơchĕng tơtăm kơ tơdrong kăl yua kơ bơngai nai păng đei jơhngơ̆m tơgŭm.
Lăm lu trong 11-13, Kră Yang bơtho ưh kơ gơh tơtông, pơma hơlĕnh dah hơlĕnh bơngai nai. Dôm tơdrong yoch âu tă pơm yoch hăm tơdro g ‘mêm mơnat ngăl. Pơma hơlĕnh ‘noh pơrăm jơhngơ̆m đon lui. Tơtông klĕ noh pơm glăi hăm tơmam bơngai nai. Tơdrong ‘mêm mơnat păng tơdrong ‘lơ̆ng tơpăt Kră Yang wă kơ lu bơ̆n pơm tơ’bôh hăm đĭ-đăng bơngai mă tơpă, tơpăt hơnơ̆ng păng jơhngơ̆m pơ yom. Yua kơ rim ‘nu bơngai Kră Yang pơjing hơbŏ thoi rup Sư ( Blŭng a 1:27).
Trong 4 tơ’bôh ăn Kră Yang tơchĕng tơtăm hloh hăm lu “bơngai klĭk” păng “bơngai măt tol”, ‘noh jơ̆ lu bơngai mă pơmat tat dêh. Kră Yang lăng ‘bôh lu bơngai mă đe ngăl hiơt păng mơ̆ng nơ̆r lu bơngai mă đe ưh kơ mơ̆ng. Tơdrong ‘lơ̆ng tơpăt Kră Yang bơwei lu bơngai mă ưh kơ gơh bơwei akâu kơdih. Tơdrong ‘mêm mơnat Kră Yang bơwei lu bơngai rơdu tơrăn. Lăm tơdrong arih rim năr, kon pơlei Kră Yang đei krao pơtơm ‘nĕ kơ che bơle pơjăm, pơgŏ pơđep dah pơrăm bơngai nai, mă-lei athei đĭ jơhngơ̆m tơgŭm lu sư.
Pơtrơp dơ̆ng,kon pơlei Kră Yang đei tơ’blŏk ưh kơ gơh pơdê bu,lu bơngai mơdrŏng, lu bơngai pơm tih dah bơngai dơnuh, păng ưh kơ gơh chă tơdrong pơm kơnê̆ kơ đe dah pơm tơdrong mă hli krưp kơ bơngai nai (trong 15-16). Kon pơlei Kră Yang athei dơ̆ng gah tơdrong trŏ păng pơma mă ‘lơ̆ng mă hiôk.
Mă hơtuch, Nơ̆r Kră Yang pơma ‘bơm tơdrong juăt ‘mêm mơnat: Athei ‘mêm thoi Kră Yang đei ‘mêm yua kơ Sư bơih jơ̆ Kră Yang (trong 17-18 ). Tơdrong ‘mêm Kră Yang ưh kơ pơmơ̆ng lăng đĕch mă-lei ling-lang yak năm hăm tơdrong pơm hloi. Kon pơlei Kră Yang ưh kơ gơh hil areh păng chĕp tơdrong blĕk ơh dah chă đon pơm ‘mong. Hơlơ̆ dơ̆ng, athei ‘mêm kơ bôl buăl thoi ‘mêm kơ akâu kơdih.
Tơdrong juăt Kră Yang ưh kơsĭ răp pơm tơwih, mă-lei athei pơm tơ’bôh gah Kră Yang ‘Bok Kei-Dei ‘lơ̆ng tơpăt, ‘bĕnh blai tơdrong ‘mêm mơnat. Jơ̆ kon pơlei Kră Yang, lu bơ̆n đei krao pơtơm pơm tơ’bôh tơdrong ‘lơ̆ng tơpăt păng tơdrong ‘mêm mơnat ‘noh lăm tơdrong tơ’bưh dih băl, wă tơpă păng pơm hloi lăm tơdrong arih rim năr. Dôm nơ̆r bơtho âu wă tơ’bôh tơdrong ‘lơ̆ng tơpăt ưh kơsĭ kơ pơm trŏ hăm ‘Bok Kei-Dei đĕch, mă ‘noh jơ̆ pơm trŏ hăm bơngai nai hai mơ̆n. Kơplah lu bơ̆n đei ‘mêm thoi Kră Yang đei ‘mêm lei lu bơ̆n đei pơm ‘lơ̆ng hăm bôl buăl thoi nơ̆r Kră Yang bơtho, păng thoi noh lu bơ̆n pơm keh tôm tơdrong juăt Sư.
Ơ Kră Yang, apinh tơgŭm inh ‘mêm kơ bơngai nai thoi Ih ‘mêm, hăm jơhngơ̆m ‘brơ̆k mơnat, trŏ hơnơ̆ng băt mơnat ăn đĕch. Apinh bơtho inh yak năm lăm trong ‘lơ̆ng tơpăt Ih, păng tơgŭm inh pơm tơ’bôh jơhngơ̆m ‘mêm Ih. Yua anăn Kră Yang Yêsu Krist, Amen.
Lu bơ̆n hăm ‘mêm kơ bôl buăl thoi Kră Yang ‘mêm ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Jang 25.
Kênh Youtube BHKTHN:
