Mathiơ 20:8-16
“Lu bơ̆n âu bơih ‘Bok Kei-Dei ‘mêm mơnat, na rơih iŏk bơ̆n wă kơ bơ̆n jing kon Sư; na bơ̆n athei băt ‘mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt.”(Kôlôs 3:12)
Nơ̆r jet tơchĕng pơwao:
– Bơngai tơ’ngla mir ăn jên kơ lu bơngai jang kơ sư, sư ăn thoi yơ bơih, na yua kơ kiơ đei bơngai jŏk hil kơ tơ’ngla mir‘noh dơ̆ng?
– Tơ’ngla mir tơl lu bơngai mă jŏk hil ei thoi yơ?
– Kră Yang wă kơ bơ̆n awih awăn kơ Sư hăm jơhngơ̆m thoi yơ?
Đang kơ jang kơtĕch năr bơih, tơ’ngla mir krao lu bơngai jang kơ sư năm tơ sư wă apah đêl lu sư jang. Tơ’ngla mir apah rim ‘nu kơ lu sư dôm ăi minh hlak minh hlak jên, na lu bơngai mă jang đơ̆ng hrôih ei jŏk hil khan kơ tơ’ngla mir ưh kơ tơpăt hơnơ̆ng hăm sư. Mă khan lei ră lu sư hiơt bơih đêl lu sư hăm tơ’ngla mir pơma pơdrơ̆ng băl đơ̆ng blŭng a, tơdrong apah kơ lu sư jang noh minh năr minh hlak jên (tr.2), tơ’ngla mir ei ‘lơ̆ng đĕch ưh kơ đei pơgŏ păng ưh đei ham wă kơ lơi yua đơ̆ng jơhngơ̆m lu sư jang gleh hrat noh; tơ’ngla mir apah trŏ kơ tơdrong juăt tơpăt noh bơih. Na bơngai mă mơ̆t jang kơplah pơđăm jơ kơsơ̆ ei, tơ’ngla mir kư̆m apah sư minh hlak jên mơ̆n, ‘noh yua kơ jơhngơ̆m ‘bok tơ’ngla mir ei mơnat đĕch.Tơdah bơngai mă mơ̆t jang kơplah pơđăm jơ kơsơ̆ ei, tơ’ngla mir apah sư lăp minh lăm mơjĭt ‘bar hlak jên đĕch lei wă ‘me rong hnam dơnŏ sư ưh kơ mah ôh. Tơ’ngla mir băt kơ bơngai ei ưh kơ alah ôh, mă-lei yua kơ ưh kơ đei bơngai iŏk sư jang lei na prăt năr sư chă tơdrong jang ră ưh kơ đei.
Tơ’ngla mir pơm thoi ‘noh yua kơ sư mơnat đĕch. Sư gơh mơnat kư̆m gơh asong ăn kơ bơngai ayơ ei, sư wă kơ lu bơngai mă jang đơ̆ng hrôih noh trŏ sư, lu sư athei hlôh păng kư̆m đei jơhngơ̆m mơnat kơ lu ‘nhŏng oh sư ei; mă-lei yua kơ jơhngơ̆m kret tơsen,klai monh pơm kơ lu sư jŏk hil yua ưh kơ băt jơhngơ̆m tơ’ngla mir đei tơdrong mơnat tih, lu sư kư̆m ưh kơ đei jơhngơ̆m mơnat kơ bôl buăl mơ̆n.
Lăm Khul lui dang ei, oei đei ‘bôh tơdrong monh klai dih băl lăm tơdrong jang awih awăn kơ Kră Yang. Phŏ kơnh bơ̆n tơchĕng khan yua kơ kiơ inh jang kơ Kră Yang đunh hloh kơ bơngai nai mă-lei Kră Yang ưh kơ mơnat thoi lu bơngai mă ‘nao mơ̆t jang? Bơ̆n ưh kơ hiôk, ưh kơ lăp đon kơplah jang kơ Kră Yang,bơ̆n ơh kơ Kră Yang, bơ̆n pơting bơ̆n hăm ‘nhŏng oh, bơ̆n tơgar băl hăm lu ‘nhŏng oh mă jang hơdai bơ̆n. Kơplah bơ̆n’bôh bôl buăl gơh jang tơdrong mă bơ̆n ưh kơ gơh jang na jơhngơ̆m bơ̆n lăm to đei klai ơh blĕk, jŏk hil kơ Kră Yang,jŏk hil kơ bôl buăl. Kră Yang wă kơ bơ̆n awih awăn kơ Sư hăm đĭ jơhngơ̆m băt bơnê kơ Sư yua kơ “Ưh kơ sĭ iĕm krao Inh tơbôl păng iĕm ôh sơ̆,Inh krao iĕm bôl păng Inh păng Inh wơh iĕm…” (Yôhan 15:16), bơ̆n gơh đei oei lăm Kră Yang, gơh đei jang awih awăn kơ Sư ‘noh minh mơnat tih Sư ‘măn ăn kơ bơ̆n. Mưh bơ̆n awih awăn đunh sơnăm lăm hnam Kră Yang, bơ̆n athei kang rai hlôh kơ jơhngơ̆m Kră Yang hloh dơ̆ng, Kră Yang kư̆m wă kơ bơ̆n tơ’bôh jơhngơ̆m mơnat dih băl tơduă bơngai lui, bơngai bơ̆ jang hơdai “Lu bơ̆n âu bơih ‘Bok Kei-Dei ‘mêm mơnat, na rơih iŏk bơ̆n, wă kơ bơ̆n jing kon Sư; na bơ̆n athei băt ’mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt” (Kôlôs 3:12). Mưh bơ̆n klai monh kơ đe, bơ̆n’bônh kơ sơngah dah ’bônh kơ kơdŭn tơdrong jang awih awăn kơ Kră Yang,tuch luch sư, bơ̆n tơhiong lê̆ jơ trŏ kơ gơh awih awăn kơ Kră Yang noh păng kư̆m ưh kơ đei tơdrong apah đơ̆ng Kră Yang’măn ăn kơ lu bơngai mă awih awăn kơ Sư tơnăp truh kơ đĭ chăl arih.
Kơkuh kơ Ih Kră Yang, apinh Ih tơgŭm inh huay kơ jŏk hil, huay kơ klai monh kơ lu ‘nhŏng oh lăm tơdrong jang awih awăn kơ Ih, wă kơ inh hlôh kơ ‘nhŏng oh, ‘mêm mơnat, tơgŭm dih băl wă kơ hơdai băl awih awăn kơ Ih păng tơiung Khul Lui rai wơ̆ ‘lŏ, rai lơ dơ̆ng. Inh krao khan yua anăn Kră Yang Yêsu Krist, Amen!
Bơ̆n hăm hơtai oei arih hăm jơhngơ̆m ‘mêm mơnat mă đơ̆ng Kră Yang mơnat bơih kơ bơ̆n noh ưh?
Đŏk Sơ̆p Hlabơar’Bok Kei-Dei lăm pêng sơnăm: Êsai 19
Kênh Youtube BHKTHN:
