Klei Aê Diê Blŭ: Klei Bi Hriêng 13:1-6.
Êlan kliăng: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mông găl, čiăng dưi bi mbha klei pap kơ phung dôk hmư̆.” (Êphêsô 4:29).
Klei êmuh ksiêm mĭn: Ya klei bhiăn hriăm blŭ Mtao Y‑Salômôn bi hriăm anak? Răng klei blŭ, blŭ klei kpă ênô ya mta klei jăk srăng dưi mâo? Ya klei soh diih khăng mâo hlăm klei blŭ, amâodah hlăm mông blŭ? Ya klei drei akâo kơ Aê Diê đru drei bi mlih hlăm klei blŭ?
Hlăm trăn Klei Aê Diê Blŭ hruê anei, Mtao Y‑Salômôn bi hriăm anak ñu si blŭ čiăng dưi jing mnuih thâo mĭn. Ñu bi hriăm anak pă boh phŭn hlăm klei hriăm blŭ. Klei bhiăn tal sa mơ̆ng klei hriăm blŭ jing brei anak thâo mđing hmư̆. Brei anak mđing hmư̆ klei amĭ ama mtô msĕ si ñu bi hriăm leh hlăm Klei Bi Hriêng 1:8, “Anak kâo, dôk hmư̆ bĕ klei ama ih bi hriăm ih, leh anăn đăm hngah hĕ ôh klei amĭ ih mtô.” Mđing hmư̆ amâo djŏ ôh knŏng hmư̆ amâo nik, hmư̆ msĕ si êa tuh dlông hla êbua, ƀiădah brei mđing hmư̆, ksiêm mĭn leh anăn hluê ngă. Klei bhiăn tal dua jing brei anak hdơr mnuih thâo mĭn brei mâo knga mđing hmư̆ (êlan 1a) leh anăn răng kriê ƀăng êgei (êlan 3a); đăm msĕ ôh phung mưč kơ klei arăng ƀuah (êlan 1b) leh anăn ha prŏng ƀăng êgei (êlan 3b). Klei bhiăn tal tlâo jing brei anak thâo răng kơ klei pô blŭ. Sĭt anak “răng kriê klei pô blŭ”, anak srăng dưi mâo boh jăk mơ̆ng klei pô blŭ, dưi mâo klei jăk (êlan 2), dưi răng kriê klei hdĭp (êlan 3). Mklăk wĭt, tơdah anak kƀah klei răng hlăm klei blŭ, anak srăng mâo klei truh jhat leh anăn srăng ba klei amâo jăk kơ pô. Klei bhiăn tal pă jing brei anak blŭ klei kpă ênô, bi êdah klei sĭt nik, knhuah jăk. Hlăm djăp boh klei, klei anak blŭ brei kpă ênô bi êdah knhuah hdĭp jăk răng mgang phung kpă ênô (êlan 5-6). Klei blŭ luar srăng ngă kơ anak hêñ leh anăn srăng ngă kơ bruă anak dlưh rai.
Phung đưm bi hriăm: “Hriăm ƀơ̆ng, hriăm blŭ, hriăm đŭng, hriăm pŏk”. Klei blŭ bi êdah dhar kreh, klei thâo leh anăn knhuah hdĭp jăk mơ̆ng anak mnuih, kyua anăn Y‑Yakơ mtă “Ơ phung ayŏng adei kâo khăp, brei diih thâo klei anei: brei jih jang mnuih djăl hmư̆, amâo ruăt blŭ, amâo djăl ăl” (Y‑Yakơ 1:19). Phung đaŏ kơ Krist khăng mâo lu klei ngă soh hlăm klei blŭ (Y‑Yakơ 3 :2), kyua anăn brei hriăm blŭ, hriăm mơ̆ng boh phŭn klei blŭ truh kơ boh pô srăng blŭ. Boh phŭn brei ênuah ênô; blŭ hŏng klei thâo răng, thâo mĭn, djŏ mông, djŏ mnuih, djŏ anôk. Khua ƀĭng kna Y‑Pôl bi hriăm: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mông găl, čiăng dưi bi mbha klei pap kơ phung dôk hmư̆.” (Êphêsô 4:29).
Hmăng hmưi djăp boh blŭ drei bi êdah nanao klei kpă ênô, klei Aê Diê khăp kơ grăp čô mnuih. Boh blŭ drei amâo djŏ knŏng ba klei mơak, klei tŭ dưn kơ klei hdĭp ti lăn ala anei đuč ôh, ƀiădah lŏ mđing kơ phung dôk hmư̆ kơ klei hdĭp lă lar.
Drei mđĭng hriăm blŭ čiăng đăm ngă soh hlăm klei hdĭp mơ̆?
Wah lač: Ơ Khua Yang, kâo bi mni lač jăk kơ Ih kyua Klei Aê Diê Blŭ mñă kơ kâo thâo răng hlăm klei blŭ. Akâo kơ Khua Yang brei kâo mâo klei thâo mĭn hlăm klei blŭ, knhuah hdĭp leh anăn ăt brei kâo thâo răng yua klei blŭ êdu êun bi mơak kơ grăp čô mnuih, bi guh kơang Anăn Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 17:1-37
Kênh Youtube BHKTHN:
