Klei Aê Diê Blŭ: II Klei Yăl Dliê 7:1-10
Êlan kliăng: “Ơ phung ayŏng adei, kâo kwưh kơ diih hŏng anăn Khua Yang drei Yêsu Krist, brei jih jang diih blŭ klei msĕ, leh anăn đăm mâo klei bi kah mbha ôh hdơ̆ng diih, ƀiădah brei mâo klei bi mguôp hlăm sa klei mĭn leh anăn sa ai” (I Kôrantô 1:10).
Klei êmuh ksiêm mĭn: Ya bruă Mtao Y‑Salômôn leh anăn jing jang phung ƀuôn sang dôk ngă? Si ngă klei Aê Diê mơak hŏng bruă diñu ngă? Ya boh blŭ amâodah klei mĭn lŏ mñă wĭt lu bliư̆ hlăm trăn Klei Aê Diê Blŭ anei? Ya klei hriăm drei mâo kơ klei bi mguôp sa ai tiê?
Hlăk êjai Mtao Y‑Salômôn leh anăn jih jang phung ƀuôn sang sa ai tiê ngă klei Myơr Sang Yang snăn Aê Diê brei pui trŭn mơ̆ng adiê čuh mnơ̆ng myơr čuh leh anăn mnơ̆ng ngă yang bi êdah klei Aê Diê mơak kơ klei diñu kkuh mpŭ. Leh anăn, “jih jang phung ƀuôn sang Israel” buôn kŭp ƀô̆ diñu ti lăn leh anăn kkuh mpŭ bi mni kơ Yêhôwa. Leh anăn, “mtao leh anăn jih jang phung ƀuôn sang” myơr mnơ̆ng ngă yang ti anăp Yêhôwa.
Hlăm trăn Klei Aê Diê Blŭ anei, boh blŭ “jih jang”, “jih jang phung ƀuôn sang Israel” leh anăn “mtao leh anăn jih jang phung ƀuôn sang” lŏ mñă wĭt lu bliư̆. Tinei, drei ƀuh sa klei jăk snăk jing mtao leh anăn jih jang phung ƀuôn sang sa ai tiê myơr lu mnơ̆ng ngă yang kơ Aê Diê. Leh anăn jih jang sa ai tiê myơr Sang Yang kơ Aê Diê. Klei hrăm mbĭt sa ai tiê leh anăn hdră kñăm bi êdah mơ̆ng bruă kkuh mpŭ, myơr jih ai tiê jăk siam snăk leh anăn bŏ hŏng klei jăk. Ƀiădah sa ai tiê amâo djŏ bi mă sa bruă msĕ ôh. Hlăm klei myơr Sang Yang, phung khua ngă yang ngă bruă hluê si bruă mbha leh kơ diñu, dôk ngă bruă ti dŭm anôk arăng jao leh; phung Lêwi yua kdrăp tông ayŭ kkuh mpŭ leh anăn bi mni kơ Aê Diê; lŏ mâo phung khua ngă yang dôk ayŭ ki hlăk êjai phung ƀuôn sang “dôk dơ̆ng.” Grăp čô sa bruă hlăm klei kkuh mpŭ kơ Aê Diê ƀiădah mâo klei sa ai tiê kyua grăp čô mđing kơ Aê Diê.
Klei Aê Diê Blŭ brei thâo hlăk anăn “jih jang phung ƀuôn sang Israel” mơ̆ng grăp anôk nao hlăm knăm mphŭn ba yua Sang Yang hlăm kjuh hruê leh anăn Knăm Sang Čhiăm hlăm kjuh hruê dơ̆ng mơh. Leh anăn mtao brei phung ƀuôn sang wĭt, grăp čô ư ai leh anăn mơak kyua klei Aê Diê pap brei leh kơ Mtao Y‑Đawit, Mtao Y‑Salômôn leh anăn jih jang phung ƀuôn sang. Klă sĭt, mơ̆ng mtao truh kơ mnuih ƀuôn sang hrăm mbĭt sa ai tiê kkuh mpŭ leh anăn ngă kơ Aê Diê mơak. Klei bi mguôp ba klei jăk mơak prŏng kơ grăp čô mnuih leh anăn mâo klei hơ̆k mơak kơ klei jăk Aê Diê. Aê Diê bi êdah leh klei Ñu pap kơ Mtao Y‑Đawit si ngă snăn ară anei Ñu ăt bi êdah klei pap anăn kơ Mtao Y‑Salômôn leh anăn jih jang phung ƀuôn sang Aê Diê msĕ snăn mơh.
Sang Aê Diê sa ai tiê amâo djŏ ôh jing sa ai tiê klei mĭn hŏng anak mnuih ƀiădah wăt pô mgăt biăp leh anăn êpul biăp hrăm mbĭt sa ai tiê mđing kơ Aê Diê. Leh jih jang grăp čô lăm lui klei mdê hjăn, sa ai tiê hlăm klei kkuh mpŭ leh anăn mă bruă kơ Aê Diê hlăm klei Aê Diê brei leh anăn bruă klam hŏng Ñu snăn srăng mâo klei jăk mơak. Grăp čô mnuih srăng ƀuh klei guh kơang Aê Diê ti krah Sang Aê Diê.
Diih ksiêm mĭn mâo mơ̆ bruă mă, klei blŭ pô bi rai klei bi mguôp sa ai tiê hlăm Sang Aê Diê mơ̆?
Wah lač: Ơ Khua Yang, akâo kơ Ih đru kâo leh anăn phung ƀuôn sang Aê Diê mâo klei sa ai čiăng thâo klei jăk, klei mơak leh anăn dưi ƀuh klei guh kơang Ih hlăm Sang Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 17:38-58
Kênh Youtube BHKTHN:
